Na'i Maromak Niakaan Oan loke dalan foun atu sori ita
2
Tan lia nia, ita musti kaer metin saa mak ita rona ti'an hosi lia Na'i Maromak Oan, nebee ita keta halu'a lakon. 2 Uluk, Na'i Maromak nodi Niakaan makbukar lale'an, katak Niakaan lia menon baa itakaan bei uluk sia. Lia menon nia, tebes. Mais kalo bei uluk sia nakur, sia nanis kona kastikar. 3 Uluk nunia tebes. Mais oras ne'e, Na'i Maromak Oan Yesus Kristus loke dalan foun atu sori ema raiklaran. Baa oras Yesus moris iha raiklaran, Nia katak du'uk lia nosi dalan moris maka'as nia baa ema mak tuir Nia. Nunia hotu, ema nia sia katak baa ita, nebee ita bele fiar. Mais kalo ita dudu fila dalan moris maka'as nia, ita susar ti'an! 4 Na'i Maromak moos natebes ema nia sia mak tuir Yesus, nodi latan beran baa sia, nebee sia nalo tadak blaar oi-oik. Nia moos natuun Niakaan Kmalar Lulik baa sia, nebee sia nalo lia wa'in seluk, tuir Niakaan hakara. Tan Na'i Maromak Niakaan hahalok nia sia, ita hatene ha'ak, Niakaan dalan moris nia, loos tebes.Na'i Maromak Niakaan Oan naraik aan atu dadi baa ema raiklaran
5 Oras ne'e, ha'u kdale lia raiklaran foun mak atu dadi baa loron ikus. Na'i Maromak la dala ida dauk katak baa Niakaan makbukar lale'an sia na'ak, sia mak atu babilan raiklaran nia, tan ema raiklaran mak atu babilan. 6 Iha Hakerek Moon, Bei Daud nusu baa Na'i Maromak lia nosi ema raiklaran folin na'ak,
“Na'i Maromak!
Tan saa Na'i Maromak titu ema raiklaran?
Tan saa Na'i Maromak nadomi sia?
Sia ema raiklaran da-daun dei!
7 Mais Na'i Maromak latan beran baa sia ti'an,
nebee sia dadi kre'is manesak no makbukar lale'an.
Na'i Maromak moos foo kneter baa sia,
nodi foti sia,
8 nebee sia ukun baa sa-saa hotu-hotu mak Na'i Maromak nase'i ti'an nia.”a
Tebes. Tuir Bei Daud niakaan hakerek ne'e, Na'i Maromak nase'i ema raiklaran dadi baa ulun, nebee babilan hotu-hotu mak Nia nase'i ti'an. Mais tuir loos, ita sei la dala ida dauk hatene ema raiklaran ida mak ukun baa sa-saa hotu-hotu nunia.
9 Mais noo Ida mak bele ukun baa sa-saa hotu-hotu. Nia, mak Yesus. Nia namaan aan mai nein heik iha raiklaran, atu dadi baa ema raiklaran, mak natiu susar to'o mate. Nia mate nunia atu natudu Na'i Maromak laran di'ak baa ema raiklaran. Hotu, Na'i Maromak tonu Nia nodi foti-nahaas Nia, nebee Nia ukun baa sa-saa hotu-hotu mak Na'i Maromak nase'i ti'an. 10 Makonak ti'an! Na'i Maromak nalo Yesus natiu susar, nebee Yesus bele loke dalan moris bodik ema raiklaran. Na'i Maromak nakara nunia, nebee ema wa'in bele moris namutuk no Nia iha lale'an. Nia, mak nase'i hotu-hotu. Hotu-hotu moris, tan Nia.
11 Kalo ema tuir Yesus dalan moris, Na'i Maromak nanis simu di'a-di'ak sia, nebee sia dadi baa Niakaan oan sia. Tan Na'i Maromak moos Yesus Aman, Yesus la moe temi sia na'ak,
“Emi ne'e, Ha'ukaan maun-biin-alin du'uk.”
12 Yesus katak ti'an baa Niakaan Ama na'ak,
“Ha'u atu katak baa Ha'ukaan maun-biin-alin sia,
lia nosi Ama Niakaan dadi'ak!
Ha'u atu kananu iha siakaan klaran,
lia nosi Ama Niakaan maka'as!”b
13 Yesus moos dale na'ak,
“Ha'u atu kaloon baa Na'i Maromak nohuun.”
Hotu, Yesus dale tenik na'ak,
“Mana mai lai! Ha'u iha ne'e,
kamutuk ko Na'i Maromak oan sia,
mak Nia latan baa Ha'u atu babilan.”c
14 Na'i Maromak oan nia sia, ema raiklaran nanis. Tan baa nia, Yesus moos musti dadi baa ema raiklaran nu'u sia lai, foin Nia bele mate. Nodi mate, Nia bele nadau nola beran nosi diabu ulun. Diabu ulun nia aat basuk. Nia kaer beran atu babilan lia mak natali aan no lia mate. 15 Nia moos nalo ema raiklaran nata'uk lia mate, to'o sia tuir niakaan hakara, hanesan ata. Mais oras ne'e, Yesus sori ema raiklaran nosi siakaan ta'uk nia ti'an. 16 Malorek ti'an, Yesus mai lahoos atu tau matan baa Na'i Maromak Niakaan makbukar lale'an sia. Mais, Nia mai atu tau matan baa ita mak Bei Abraham husar-binan ne'e. 17 Tan lia nia, Yesus dadi manesak no ita mak Niakaan maun-biin-alin sia. Hodi nunia, Nia moos bele dadi baa itakaan na'ilulik boot mak tulun ita nohuun atu tuir Na'i Maromak hakaran. Nia moos natudu Niakaan dodan baa ita. Uluk, itakaan bei uluk sia nusu siakaan na'ilulik sia atu nalo sera, nebee Na'i Maromak kasu mohu siakaan salan. Mais oras ne'e, Yesus du'uk dadi baa sera ti'an, nebee Na'i Maromak kasu mohu itakaan salan. 18 Baa oras Yesus moris iha raiklaran, Nia netan susar wa'in basuk. Ema moos namaus Nia atu nalo sala. Mais Nia la monu. Tan lia nia, kalo ema namaus ita atu halo sala, Yesus bele tulun ita nebee ita keta monu.