Hanorin loos dadi baa moris tatuur loos
2
Mais Titus, o keta nunia! O musti madalan ema nebee sia moris tuir hanorin loos. 2 Katak baa katuas sia, nebee sia moris netu aan. Sia musti daka naran di'ak, no moris mamatek. Sia musti fiar metin baa hanorin loos. Sia musti nadomi ema seluk.3 Nunia moos, ferik sia. Katak baa sia nebee daka di'a-di'ak siakaan tuur-hariik no moris tuir Na'i Maromak hakaran nohuun. Sia keta dale nadois ema naran. Sia keta natoos aan baa tua. Mais sia musti nanorin ema atu moris di'ak. 4 Hodi nunia, sia foo knaninuk baa feto nurak sia, nebee nadomi la'en no oan sia. 5 Nebee moris mamatek no moon. Nebee nahulin uma kain di'a-di'ak no nanono baa la'en. Kalo sia moris nunia, la noo ema mak dale nahaat Maromak Manfatin.
6 Nunia moos, foo tate'an baa mane nurak sia, nebee sia moris mamatek.
7 Titus! O musti moris di'a-di'ak, nebee dadi knaninuk bodik ema seluk. Oras manorin ema, o moos musti malo tuir hanorin nia! Keta makdiuk mo okaan serwisu. 8 Musti manorin lia loos, nebee ema la bele nalolo hanorin nia. Hodi nunia, ema mak sakar ita, sia moe aan du'uk, tan soa la noo tatuur atu sakar ita.
9 Manorin ata sia, nebee rona baa siakaan na'in iha lia hotu-hotu mak kona baa na'in neon. Sia keta toe malu no siakaan na'in. 10 Sia keta nana'o siakaan na'in nahan. Sia musti serwisu di'a-di'ak to'o na'in fiar sia. Sia musti natudu lisan di'ak. Kalo sia moris nunia, ema luan nanis nasee na'ak, hanorin nosi Na'i Maromak, itakaan Maksorin, kabaas tebes.
11 Na'i Maromak natudu laran di'ak baa ema hotu-hotu, nodi loke dalan atu sori sia nosi siakaan salan. 12 Tan baa nia, ita musti dudu sees dalan moris mak kale'uk. Ita musti soe hahalok aat hotu-hotu. Oras ita sei moris iha raiklaran ne'e, ita musti moris moon, hodi hetu aan no tuir bei-beik Na'i Maromak hakaran. 13 Oras ne'e, ita sei hein Yesus Kristus namaan aan mai nikar. Lia nia atu dadi matak-malirin boot bodik ita hotu-hotu, tan ita atu haree ahar boot nosi Na'i Maromak mak Boot Kaliuk, no nosi Yesus Kristus itakaan Maksorin. 14 Nia latan isin lolon atu sori ita nosi sala. Nia namoos ita, nebee ita fatan dadi baa Niakaan ema mak nalo lia di'ak nohuun.a
15 Titus, manorin lia ne'e sia baa ema sarani sia. Makbiit sia nebee tuir hanorin nia hotu-hotu. Ema mak nalo sala, matudu dalan di'ak baa nia. Ema keta naraik o, tan o moo beran malo nunia