2 Timotius
Paulus nakerek dala rua
bodik belun Timotius
Paulus foo tabe
1
1-2 Timotius mak di'ak!Hakerek ne'e nosi ha'u, Paulus. Na'i Maromak du'uk mak boi ha'u kdadi Yesus Kristus klosan. Sia solok ha'u kbaa katak lia moris mak Na'i Maromak nameno ti'an bodik makfiar Yesus Kristus.
Timo! Tuir ha'u, o nu'u ha'ukaan oan du'uk. Tan lia nia, ha'u kamulak nebee, itakaan Ama Maromak no itakaan Na'in Yesus Kristus, nadomi o, natudu laran di'ak baa o, no foo moris dame baa o.a
Paulus namulak nodi sera dodan baa Na'i Maromak
3 Loron-kalan ha'u kamulak bodik o. Ha'u ksera dodan baa Na'i Maromak nohuun, tan o tuir Nia bei-beik. Ha'u kaliku Nia kodi neon moon, manesak no ha'ukaan bei uluk sia naliku Nia. 4 Ha'u ksei kanoin o luun turu, baa oras ita rua fa'e malu. Tan baa nia, kalo ha'u kasoru kikar o, ha'u neon di'ak.
5 Ha'u kanoin oras o mahuu fiar tebe-tebes baa Na'i Yesus. Okaan fiar nunia nahabut kedan uluk baa o bein Luisa neon no o inan Eunike neon. Oras ne'e ha'u katene ka'ak, siakaan fiar nia moos moris iha okaan neon.b
Paulus nusu Timotius nala'ok babelen mak Na'i Maromak foo baa nia
6 Uluk, baa oras ha'u krai liman baa o ulun kodi kamulak bodik o, Na'i Maromak natuun babelen nebee o bele serwisu bodik Nia. Tan baa nia, oras ne'e ha'u kusu nebee kakehe malaka okaan babelen nia. 7 Na'i Maromak la foo Niakaan Kmalar baa ita atu moris ta'uk teen. Lale! Nia foo Niakaan Kmalar baa ita nebee ita bele haberan aan, bele hadomi malu, no bele hetu aan. 8 Tan baa nia, keta moe aan katak lia nosi itakaan Na'in Yesus Kristus. O moos keta moe, tan ha'u ne'e ema bui. Tuir loos, ha'u ktama bui ne'e tan ha'u kaliku Nia. Kalo o baa katak Niakaan Manfatin Di'ak, o musti madi'a aan atu matiu susar nu'u ha'u. Mais baa oras o metan susar nunia, Na'i Maromak nanis nakbiit o.
9 Na'i Maromak sori nola ita nosi itakaan salan,
no boi nola ita dadi Niakaan ema moon.
Masik ita la halo sa-saa moos, ita bele simu Niakaan dadi'ak nia.
Na'i Maromak sei la nase'i raiklaran dauk, Nia nakotu ti'an atu solok Yesus Kristus mai,
nebee natudu laran di'ak nodi sori ita.
10 Oras ne'e, Yesus Kristus mai ti'an, atu nato'o Na'i Maromak lia kakotun nia.
Kalo ema fiar baa Na'i Yesus, nia la mate dodok ona, mais netan moris nima-nimak no Na'i Maromak.
Lia ne'e, Manfatin Di'ak mak keke lema rai.
11 Tan Manfatin Di'ak nia, Na'i Maromak foti ha'u kdadi baa Yesus Kristus klosan atu katak no kanorin ema.c 12 Oras ne'e, ha'u ktama bui ti'an tan Manfatin nia. Mais ha'u la kmoe! Tan ha'u katene see mak ha'u kfiar baa ne'e, Na'i Yesus du'uk. Nia mak rai serwisu ne'e baa ha'u, nodi foo babelen nebee ha'u kbele kala'ok to'o Nia mai nikar. 13 O musti tuir knaninuk moris nosi hanorin loos mak ha'u katudu baa o. Kalo o fiar bei-beik, modi madomi ema hotu-hotu, ne'e na'ak, o talin malu ti'an mo Yesus Kristus. 14 Na'i Maromak foo sasoin ida mak folin kaliuk baa o ti'an. Sasoin nia, mak hanorin loos. Bali sasoin nia di'a-di'ak. Musu Kmalar Lulik mak moris iha itakaan neon, nebee Nia tulun o atu matene bali sasoin nia.
Onesiforus tulun Paulus iha bui
15 Timo! O matene Figelus no Hermogenes no ema seluk nosi rai Asia ka?d Sia se'i kotuk baa ha'u ti'an. 16-18 Mais Onesiforus lale. O matene baa oras ha'u ksei iha kota Efesus, nia tulun ha'u bei-beik. Oras ne'e, nia iha kota Roma ti'an. Oras nia to'o mai, nia nasirin fatin hotu-hotu buka ha'u, foin nia netan ha'u iha bui laran. Mais nia la moe. Nia mai naree ha'u bei-beik atu nakbiit ha'ukaan neon.
Tan lia nia, ha'u kamulak kodi kakro'an, nebee Na'i Maromak natudu laran di'ak baa Onesiforus no familin hotu-hotu. Nebee, baa oras rai falu fila Na'i Maromak nakotu ema raiklaran lian, Nia moos nakotu lia di'ak bodik Onesiforus sia.