Ema sarani musti moris moon
3
Foo matene baa ema sarani nebee nanono baa ukunrai no makaer ukun sia. Sia moos musti nadi'a aan nalo lia di'ak nohuun. 2 Sia keta dale nahaat ema naran. Sia keta toe malu. Di'ak liu, sia moris furak no laran di'ak baa ema hotu-hotu.3 Uluk, oras ita sei la hatene Kristus dauk, ita la hatene sa-saa, no ita maus kona be'ur. Ita la hanono baa ema seluk. Ita moris tuir laran aat, to'o hatoos aan baa itakaan beer aat oi-oik. Ita dale hahaat ema naran no ita hirus sia. Sia moos hirus nikar ita.
4 Masik ita moris aat nunia moos, Na'i Maromak sori ita nodi natudu Niakaan dadomin no laran di'ak baa ita. 5 Nia sori ita, lahoos tan ita harui aan halo lia di'ak, mais tan Nia nadomi ita. Nia fasi mohu itakaan salan no nafou itakaan moris nodi Kmalar Lulik. 6 Na'i Maromak fakar natuun Niakaan Kmalar Lulik baa ita, tan ita fiar baa Yesus Kristus, itakaan Maksorin. 7 Tan Nia laran di'ak, Nia naloos ita iha Na'i Maromak oin. Oras ne'e, ita ho Na'i Maromak, nu'u oan no Aman. Ne'e na'ak, ita bele simu sasoin nosi Ama. Sasoin nia, mak ita moris nima-nimak ho Nia. 8 Ha'u kdale ne'e, tebes no loos.
Lia mak ha'u kanorin ne'e, folin boot bodik ema hotu-hotu. O musti madalan ema atu tuir tebe-tebes hanorin ne'e. Ema mak fiar baa Na'i Maromak musti naka'as aan nalo lia di'ak. 9 Keta kahur lia bosok teen, hanesan toe malu baa lia huun-dikin lalek sia. Keta hakaat karin. Keta toe hosi lia, see niakaan husar-binan mak kneter kaliuk. Keta hakaat malu baa lia ukun Yahudi. Lia nia sia la noo folin no soe butan leet! 10 Ha'u katene noo ema ida mak sasa karin ema sarani sia. Manorin ema nia. Kalo nia la nanawa, de'an malo maka'as. Kalo nia sei la nanawa, lalika titu nia ona. 11 Tan ema oin nunia, kakutak kadoor ti'an. Niakaan hahalok du'uk nalore niakaan a'aat baa ema hotu-hotu.
Paulus narohan hakerek
12 Ha'u atu ksolok Artemis, lale Tikikus, atu mai nasoru o iha rai Kreta. Kalo nia to'o nebaa ti'an, maka'as aan mai lai-lais masoru ha'u iha kota Nikopolis. Tan oras rai malirin ne'e, ha'u kakara kein iha nebaa.a 13 O matene ema matenek ukun mak naran Senas, no niakaan maluk naran Apolos ka, lale? Ami solok sia baa fatin dook. Dadi, tulun maliku sia, nebee sia keta susar iha dalan.b 14 Ema mak tuir Na'i Yesus la bele tuur nako'ak liman. Sia musti nanorin aan atu nalo lia di'ak, no tulun ema mukit. Hodi nunia, siakaan moris noo folin.
15 Ami hotu-hotu iha ne'e solok tabe baa o, Titus. Ami moos foo tabe baa mamaluk makfiar sia.
Kakro'an, nebee Na'i Maromak natudu laran di'ak baa emi hotu-hotu.
Ha'ukaan hakerek to'o ne'e dei.
Paulus