Hakerek ne'e nosi ha'u, Paulus, mak Na'i Maromak ain-liman no Yesus Kristus klosan. Na'i Maromak solok ha'u atu kaliku ema mak Nia boi atu fiar baa Nia. Nia moos solok ha'u atu kanorin dalan moris mak loos, nebee Niakaan ema sia bele natene moris tuir Niakaan hakaran. Hodi nunia, sia bele moris namutuk no Nia nima-nimak. Na'i Maromak sei la nase'i raiklaran ne'e dauk, Nia nameno ti'an atu nalo nunia. Tebes. Nia la naktolek. To'o baa niakaan oras, Nia foo natene na'ak, Nia nakara sori ema nosi siakaan salan, nebee sia bele moris no Nia nima-nimak. Hotu, Nia naruka ha'u atu katak Niakaan Manfatin nia bodik ema hotu-hotu.

Titus! Tuir ha'u, o nu'u ha'ukaan oan du'uk, tan o mo ha'u fiar bele-bele baa Kristus. Ha'u kamulak baa itakaan Ama Maromak no itakaan Maksorin Yesus Kristus, nebee natudu laran di'ak baa o, nebee o bele moris manek no dame.^a

5 Hori hirak ha'u kla'o kela o iha rai Kreta, nebee o bele babilan mola lia hira iha nia. Nebee o foti ema mak fatan dadi baa sarani ulun iha sura kota. Keta malu'a lia lala'ok mak ha'u katak ti'an baa o nia, kona baa ema sarani ulun. Lia nune'e: 6 Kalo hakara foti sarani ulun, niakaan moris la bele noo sala. Nia musti moris moon no feen ida. Niakaan oan sia musti fiar baa Yesus Kristus. La bele noo ema mak nasalak na'ak, niakaan oan sia maktokar no maksakar. 7 Tan sarani ulun nala'ok Na'i Maromak serwisu, nia musti moris moon. Musti noo naran di'ak. Keta foti ema mak naksa'ek aan, mak nawan aat, mak kanarak aat, mak tua lanuk aat, makaat aat, no mak rotus osan. 8 Sarani ulun musti laran maluak. Musti nakara lia di'ak. Musti moris mamatek. Musti ema mak la kli'is sorin baluk. Musti neon moon. Musti natene netu aan. 9 Musti kaer tebe-tebes Maromak Manfatin mak ita hanorin ti'an baa sia. Hodi nunia, ema sarani ulun bele natudu Na'i Maromak dalan moris loos baa ema seluk, no bele naloos hanorin kale'uk sia.^b

10 Ema wa'in sakar hanorin loos nodi dale lia mak la noo huun-dikin no lia tolek teen. Kaliuk ema Yahudi mak nanorin kale'uk na'ak, ema hotu-hotu mak nakara moris, musti namane aan. 11 Sia dada nola famili balu sees nosi hanorin loos ti'an. Sia be'ur ema atu buka osan. O musti taka ema nia sia ibun, nebee sia keta nalo nunia ona. 12 Ema Kreta siakaan ema matenek ida katak du'uk na'ak,

13 Tebes! Ema Kreta sia moris nunia tebes. Tan lia nia, o musti dada mola mikar ema mak kona be'ur sia, nebee makbiit mikar siakaan fiar baa Na'i Maromak. 14 Sia keta rona tenik ema Yahudi siakaan lia aikanoik mak la noo folin. Sia keta tuir ema mak soe hanorin loos ona.

15 Manoin di'a-di'ak! Bodik ema neon moon, hotu-hotu moon. Mais bodik ema neon kadoor no ema mak la fiar baa Na'i Maromak, la noo kedan lia moon. Tan siakaan laran no kakutak kadoor hotu. 16 Sia katak na'ak, sia natene Maromak. Mais sia moris nu'u la natene Maromak. Sia dale seluk, sia nalo seluk. Sia huun dois. Sia la no'uk tuir Na'i Maromak hakaran no la natene nalo lia di'ak.