Baa katak Na'i Maromak Manfatin
4
1-2 Loron ikus, oras Yesus Kristus namaan aan mai nikar raiklaran ne'e, nia atu kaer ukun hanesan na'in. Ema mak moris no ema mak mate ti'an sia bele-bele nasoru Nia, nebee Nia tetu siakaan moris. Tan baa nia, ha'u kusu baa o iha Na'i Maromak oin no Yesus Kristus oin, nebee o baa katak Manfatin Di'ak baa ema. Madi'a aan nohuun baa oras nabee dei. Matudu ema salan, surak modi neon naruk. Makbiit ema neon, modi hanorin loos.3 Awan-wainrua, ema la no'uk rona tenik hanorin loos. Sia atu libur nola ema mak nanorin sia tuir siakaan hakara dei. 4 Sia sulan tilun baa hanorin loos, mais sia ta'an tilun baa aikanoik bosok teen.
5 Masik nunia moos, o musti mamatek dei. Mariik metin iha susar laran. Baa katak Manfatin Di'ak baa ema, nebee sia simu Yesus Kristus. Maliku ema modi neon no laran, to'o serwisu mohu. Keta manawa baa klaran.
6 Lalika manoin ha'u, tan oras ha'u kmate, kre'is ona. Ha'u ne'e, nu'u hemu fatik mak atu mamuk ona.a 7 Ha'u kalai sita di'a-di'ak, to'o kladik ti'an, tan tuir bei-beik Yesus Kristus. 8 Oras ne'e, ha'u ksei kein simu fafa'ek mak itakaan Na'in rai nela bodik ema mak moris loos. Nia atu tetu ema hotu-hotu moris nodi moon. To'o niakaan oras, nanis Nia latan fafa'ek nia baa ha'u. Mais lahoos baa ha'u kmesan dei. Nia moos latan baa ema hotu-hotu mak nadomi Nia, no nein Niakaan mamain.
Paulus nameno nela lia oi-oik
9 Timo! Mai lai-lais maree ha'u lai! 10 Oras ne'e, ha'u kmesan dei. Kreskes baa rai Galatia ti'an. Titus baa rai Dalmatia ti'an. Demas nakara buka kabaas no furak iha raiklaran dei, dadi nia la'o nela ha'u ti'an baa kota Tesalonika.b 11 Hela mesan Lukas mak no ha'u. Buka mola Markus, nebee emi rua mai bele-bele. Tan nia bele tulun ha'u oi-oik.c 12 Ha'u ksolok Tikikus baa kota Efesus ti'an.d 13 Kalo o mai, keta malu'a ha'ukaan faru manas, mak ha'u krai kela iha Karpus uman iha kota Troas. Keta malu'a no ha'ukaan hakerek sia, kaliuk hakerek mak iha kulit nia sia.e
14 Aleksander, badaen riti besi nia, nalo aat wa'in baa ha'u ti'an. Habusik baa, tan Na'i Maromak mak selu tuir niakaan hahalok nia.f 15 Sintidu mo ema nia, tan nia sakar bei-beik itakaan lia fuan.
16 Uluk fohon oras ha'u kariik iha makotu lia oin kodi kaloos lia, la noo ema ida namalu ha'u. Hotu-hotu la'o nela ha'u. Habusik baa! Lalika halo sa-saa. 17 Masik hotu-hotu la'o nela ha'u moos, Na'i Maromak lale. Nia nakbiit ha'u, nebee ha'u kbele katak Niakaan Manfatin kodi la mukit saa ida. Ha'u katak nunia baa ema lahoos Yahudi sia, nebee sia moos bele rona. Ha'u moos kakbois sai hosi dinu boot. 18 Nosi ikus, Na'i Maromak atu nasai ha'u nosi a'aat hotu-hotu, no nala'o ha'u di'a-di'ak tama lale'an. Iha nebaa, Nia mak kaer ukun.
Na'i Maromak boot kaliuk! Ha'u ktonu no foti-kahaas Nia nima-nimak! Tebes!
Paulus narohan hakerek
19 Keta malu'a foo tabe baa Bii Priskila no la'en, Mau Akila. Nunia moos bodik Onesiforus familin hotu-hotu.g 20 Erastus nein iha kota Korintus. Hori hirak nia, ha'u kla'o kela Trofimus iha kota Miletus, tan nia moras todan.h 21 Timo, marui aan, nebee oras rai malirin sei la to'o dauk, o mai ti'an. Mamaluk iha ne'e sia, mak ne'e: Ebulus, Pudes, Linus no Bii Klaudia. Sia hotu-hotu foo tabe baa emi no baa mamaluk sarani rumak sia.
22 Nebee, Na'i Maromak namutuk bei-beik no o, nodi natudu laran di'ak baa o.
Ha'ukaan hakerek to'o ne'e dei.
Paulus