Ema aat sia baa oras rai atu falu fila
3
Timo! Oras rai falu fila kre'is mai ona, susar wa'in moos atu naksain. Tan lia nia, ha'u katak kedan lia ne'e baa o. 2 Oras nia to'o mai, ema nadomi aan du'uk dei. Sia rotus osan. Sia loko aan. Sia titu naraik ema. Sia dale lia aat. Sia la rona inan-aman. Sia la natene sera dodan. Sia notar lalek. Sia hirus lia Maromak. 3 Sia la noo dadomin. Sia la no'uk dame malu. Sia dale nahaat ema naran. Sia la netu aan. Sia lisan aat. Sia la nakara lia di'ak. 4 Sia beer fa'an mamaluk. Sia la naneo naruk. Sia nalo aan matenek. Sia la tuir Na'i Maromak beer, mais tuir siakaan beer du'uk. 5 Sia nalo aan moon, mais mamuk, tan Na'i Maromak beran la noo iha siakaan neon. Timo, o keta kre'is baa ema nunia sia.6 Ema nunia sia, tama ema uman atu bosok nola feto neon mamar mak maus kona sokur. Feto oin nunia sia, natiu sala wa'in, tan sia tuir siakaan beer aat. 7 Kalo sia rona na'ak ema nanorin lia foun iha nabee, sia moos tuir kedas. Sia nalo rua-ruan nunia, mais sia sei la natene hanorin nabee mak loos no nabee mak kale'uk. 8 Timo! O sei manoin lia uluk nosi Yanes no Yamres ka, lale?a Baa oras nia, sia rua sakar Bei Musa. Ema manorik bosok teen sia, siakaan hahalok moos nunia. Sia sakar hanorin loos. Siakaan kakutak aat ti'an, no siakaan fiar moos dodok. 9 Mais sia la bele terus. Kleu-leur ema hotu-hotu atu natene siakaan lisan! Hanesan uluk ema moos natene Yanes no Yamres lisan.
Kaer metin hanorin mak o simu ti'an
10 Timo! O musti tuir ha'ukaan knaninuk. O matene ti'an hotu-hotu mak ha'u kanorin. O moos matene ti'an ha'ukaan lala'ok, ha'ukaan hakara, no ha'ukaan fiar. O du'uk maree ti'an ha'ukaan neon naruk no ha'ukaan dadomin baa ema. O matene oin nunabee ha'u kariik metin baa lia hotu-hotu. 11 O moos matene, ema ta'e nakdiuk ha'u, no nasusar ha'u oi-oik iha kota Antiokia, kota Ikonium, no kota Listra. Mais Na'i Maromak nasai ha'u nosi lia nia sia hotu-hotu.b 12 Tebes! Ema hotu-hotu mak fiar baa Yesus Kristus, no nakara moris moos tuir Na'i Maromak hakaran, nanis ema nasusar sia. 13 Hanoin! Ema aat no tolek teen sia hetak tu'an aat. Sia be'ur ema, mais sia moos kona be'ur.
14 Tan baa nia, o musti kaer metin hanorin mak o simu ti'an. No tuir bei-beik saa mak o fiar. Tan nia mak loos. O matene tebes, see mak nanorin o, to'o o bele fiar baa sia. 15 Hori o sei ki'ik, ema nanorin Na'i Maromak Hakerek Moon baa o. Nosi Hakerek nia o bele matene dalan atu metan moris, tan fiar baa Yesus Kristus. 16 Lia hotu-hotu iha Hakerek Moon, Na'i Maromak du'uk mak natuun baa Niakaan ema makerek sia. Hakerek nia folin mak ne'e: Ita hodi hanorin ema lia mak loos. Ita hodi hatudu ema salan. Ita hodi dada hikar ema baa dalan loos. Ita hodi hanorin ema atu moris sura loron tuir Na'i Maromak beer. 17 Nodi nunia, Hakerek Moon nia, nalo nato'o Na'i Maromak eman sia, nebee sia bele nalo serwisu di'ak hotu-hotu.