Tabe nosi ha'u, Paulus. Ha'u ne'e Yesus Kristus klosan, tuir Na'i Maromak hakaran no Yesus Kristus hakaran. Ita haloon baa Yesus Kristus, tan Na'i Maromak sori nola ita nosi itakaan salan.

Timo! Tuir ha'u, o nu'u ha'ukaan oan du'uk, tan ha'u mak katudu dalan, to'o o fiar Kristus. Ha'u kamulak baa itakaan Ama Maromak no itakaan Na'in Yesus Kristus, nebee natudu laran di'ak nodi foo moris dame no manek baa o.^a

3 Hori hirak nia, ita rua hamutuk iha kota Efesus. Oras ha'u atu kbaa rai Makedonia, ha'u kamaus o mein iha Efesus, tan noo ema balu mak nanorin ema sarani sia nodi hanorin kale'uk. Ha'u karuka o matuka mola ema mak nanorin kale'uk nia. 4 Sia soe butan leet nodi toe malu baa lia aikanoik bosok teen no lia husar-binan sia. Lia nunia soran ema dei, to'o sia la fiar baa Na'i Maromak.

5 Ha'u kfoo lia tate'an ne'e atu kanorin ema makfiar sia, nebee sia bele moris hadomi malu. Ita bele moris hadomi malu, kalo dadomin nia sai nosi itakaan neon moos, itakaan kakutak moon, no ita fiar tebe-tebes, la oin-kotuk. 6 Mais noo ema manorik balu mak sees nela ha'ukaan tate'an ne'e. Sia toe malu baa lia mak la noo folin. 7 Sia nalo aan nu'u ema mak matenek nanorin Ukun-badu Bei Musa, mais sia du'uk la natene Ukun-badu nia isin.

8 Ita hotu-hotu hatene Ukun-Badu nia, di'ak. Surak ita hala'ok tuir Na'i Maromak hakaran. 9 Na'i Maromak foo Ukun-Badu nia, lahoos bodik ema mak moris loos ti'an. Nia foo bodik ema mak sakar ukun, ema mak tokar lauk, ema mak se'i kotuk baa Maromak, ema mak nalo aat, ema mak la titu Maromak, ema mak naraik lia moon, ema mak no'o ema, no ema mak no'o inan-aman du'uk. 10 Nia moos foo Ukun-Badu nia bodik ema mak nalo lia kfo'er, mane mak toba no mane, feto mak toba no feto, ema mak nana'o ema nodi buka osan, ema mak tokar lauk, ema mak narai aan bosok, no ema hotu-hotu mak sakar hanorin loos. 11 Hanorin loos mai nosi Na'i Maromak Manfatin Di'ak mak Nia latan baa ha'u. Na'i Maromak nia, Beran Kaliuk. Etuk ita foti-hahaas Nia.

12 Ha'u kamulak kodi sera dodan baa itakaan Na'in Yesus Kristus, tan Nia fiar ha'u no nakbiit ha'u to'o bele kala'ok Niakaan serwisu. 13-14 Tuir loos, uluk ha'u lahoos nunia. Ha'u kakara kahonu Yesus naran kodi kasusar ema mak tuir Nia, to'o ha'u ktonan kadodok sia. Ha'u kalo aat nunia, tan sei la katene dauk itakaan Na'in Yesus Kristus, no sei la fiar dauk baa Nia. Mais Nia la nalu'a ha'u. Nia nadomi ha'u, to'o natudu laran di'ak baa ha'u. Nia fakar matak-malirin baa ha'u, to'o ha'u kbele fiar biit baa Nia, no kadomi ema hanesan Nia nadomi ha'u.^b

15 Noo ema mak dale na'ak, “Yesus Kristus mai raiklaran ne'e atu sori ema maksalan.” Tebes! Nosi ema maksalan hotu-hotu, ha'u ne'e mak aat kaliuk. 16 Masik ha'u aat nunia moos, Na'i Maromak la kastikar ha'u, tan Nia nakara nalo ha'u baa knaninuk atu natudu na'ak, Yesus Kristus neon naruk baa ema aat nu'u ha'u ne'e. Hodi nunia, ema seluk sia moos bele fiar baa Nia no simu moris nima-nimak no Nia.

18 Oa Timo! Ha'u katak lia ne'e sia baa o, nebee o mala'ok iha okaan serwisu. Lia ne'e sia tuir saa mak Maromak mako'an sia dale kedan kona baa o. Kalo o malo tuir mako'an sia lian malo moon, o hanesan sondadu mak natene natuda sakar a'aat. 19 Fiar metis baa Kristus. Daka okaan neon, nebee moon nohuun. Noo ema mak la rona siakaan neon ain botu, to'o nadodok siakaan fiar, hanesan roo sa'e tan fatuk moris. 20 Himeneus no Aleksander siakaan fiar, nunia ti'an! Tan baa nia, ha'u klatan sia baa diabu ulun, atu kanorin sia nebee keta nahaat Na'i Maromak naran.