Ema maktuir Kristus musti moris hanesan sondadu mak tuir ulun bei-beik
2
Oa Timo mak ha'u kadomi! Tan Yesus Kristus laran di'ak, Nia nadi'a aan nakbiit o. Dadi o musti makara, tan o talin malu mo Nia ti'an. 2 Uluk, ha'u kanorin o lia Na'i Maromak dalan loos iha ema lear oin. Oras ne'e, ha'u kusu nebee lia hotu-hotu mak o rona mosi ha'u nia, o baa manorin mikar baa ema mak o bele fiar. Hotu, ema nia sia musti bele baa nanorin natutan nunia baa ema seluk tenik.3 Ita hotu-hotu ne'e, Yesus Kristus sondadun. O musti madi'a aan matiu susar bele-bele mo Nia. 4 Sondadu mak nala'ok niakaan serwisu di'a-di'ak, la kahur no serwisu seluk. Nodi nunia, niakaan lisan kona baa niakaan ulun neon.
5 Hola lia hatetek seluk hosi lia halai sita malu. Kalo ema nalai sita malu, musti nalai tuir ukun. Kalo lale, nia nanis sai! Nunia moos, kalo hala'ok Na'i Maromak serwisu. Musti hala'ok tuir ukun.
6 Haree baa ema mak nalo to'os. Nia serwisu susi ruin iha to'os. Tan lia nia, nia mak netan uluk to'os isin. 7 Hanoin di'a-di'ak lia hatetek nia sia, nebee Na'i Maromak nalore lia isin baa o.
8 Hanoin di'a-di'ak Yesus Kristus. Nia, na'i Daud husar-binan. Nia mate, mais Na'i Maromak nalo Nia moris nikar. Lia nia, Manfatin Di'ak mak ha'u kbaa katak iha fatin hotu-hotu. 9 Tan ha'u kala'ok serwisu nia, ha'u ketan susar, to'o ema neti ha'u nodi besi talik, hanesan ha'u ne'e, ema aat. Masik nunia moos, sia la bele saseni Maromak Manfatin. 10 Tan baa nia, ha'u kadi'a aan katiu susar oi-oik. Surak Na'i Maromak eman mak Nia boi ti'an sia, bele netan moris. Nosi ikus Nia atu foti-nahaas sia, tan sia Yesus Kristus eman. 11 Lia fuan ne'e sia, tebes no loos:
“Kalo ita simu mate tan tuir Kristus,
ita moos moris ho Kristus.
12 Kalo ita terus aan,
ita kaer ukun ho Nia.
Kalo ita heli Nia,
Nia moos neli ita.a
13 Masik ita la loos,
Nia loos nohuun,
tan saa mak Nia dale, Nia nanis nalo.”
Ema serwisu mak Na'i Maromak mose
14 Timo! Foo matene baa makfiar sia, nebee sia keta nalu'a lia ne'e sia. Maruka sia modi Na'i Maromak naran, nebee sia nanawa toe nosi lia mak la noo folin. Hahalok nunia nahaat ema mak rona neon. 15 Marui aan dadi Na'i Maromak eman serwisu mak fatan Nia mose. Manorin malo loos Niakaan Manfatin, tan Manfatin nia tebes no loos. O serwisu di'ak nunia, o lalika moe. 16 Madook aan mosi lia fuan mak la noo huun-dikin, no lia fuan mak la nakneter Na'i Maromak. Tan lia fuan nunia hetak nahaat ema wa'in, 17 nu'u kanek aat nakrabat. Himeneus no Filetus siakaan lia fuan, nunia nanis. 18 Sia rua nanorin kale'uk na'ak, Na'i Maromak oras nalo ema mak mate ti'an moris nikar, siku liu ti'an. Sia naksees ti'an nosi hanorin loos, to'o nahaat ema balu siakaan fiar.
19 Masik nunia moos, Maromak Manfatin nafati, hanesan lia tatuur mak la kakoen. Iha Manfatin nia noo hakerek na'ak, “Na'i Maromak natene Niakaan ema sia.” Noo hakerek tenik na'ak, “Ema mak lo'u-sudur baa Na'i Maromak, musti nakdook aan nosi a'aat.”b
20-21 Iha ema maksoin uman, noo baho'ak oi-oik. Noo baho'ak kabaas nosi mean no mutin, no baho'ak mak tau loron-loron nosi ai no rai mean. Oras noo dahur boot, uma na'in neon boot tau baho'ak kabaas nia sia. Mais nia moe aan tau baho'ak loron-loron nia sia iha ema lear oin. Nunia moos ita. Kalo ita hadook aan hosi a'aat, ita nu'u baho'ak kabaas nia sia. Uma na'in nakara nodi ita, tan ita hoo folin atu halo serwisu di'ak bodik nia.
22 Ema nurak sia maus beer aat. Mais Timo, o keta nunia. O musti daka aan di'a-di'ak, nebee keta tuir sia nunia. Malo lia di'ak bei-beik. Fiar bei-beik baa Na'i Maromak. Moris madomi malu, dame malu mo ema hotu-hotu. Ema mak fiar baa Na'i Maromak, neon moon, no nalo lia di'ak bei-beik. Timo, o musti moris nunia! 23 Keta kahur lia modi toe malu baa lia mak la folin. Tan lia nunia sia soran ema dei. 24 Ema mak toe malu la fatan dadi Na'i Maromak eman serwisu. Tan Niakaan eman serwisu musti di'a-di'ak no ema hotu-hotu, musti natene nanorin ema, no natene netu aan baa ema seluk. 25 Sia moos musti dale mamamar no ema mak sakar sia. Hodi nunia, see mak natene? Na'i Maromak bele filas ema mak sakar neon to'o sia nalo neon aat, no simu hanorin loos. 26 Hodi nunia, siakaan kakutak bele moon nikar, to'o sia nakbois sai nosi diabu ulun mak uluk kesi sia.