Lia ata no na'in
6
Ata mak fiar baa Na'i Yesus musti nakneter na'in. Hodi nunia, ema seluk la netan lia krarain atu dale nahaat Na'i Maromak naran no itakaan hanorin. 2a Na'in mak fiar baa Na'i Yesus, niakaan ata sia musti nakneter nia bei-beik, masik sia hotu-hotu manesak iha Na'i Maromak oin. Ata sia musti naliku na'in nia di'ak liu tenik, tan sia hotu-hotu fiar bele-bele baa Kristus. Sia hotu-hotu moos musti moris nadomi malu.Ema mak nanorin kale'uk no ema mak rotus osan
2b Timo! Manorin lia ne'e sia hotu-hotu modi makbiit ema sarani sia, nebee sia nalo tuir. 3 Itakaan hanorin loos ne'e, dadi tatuur baa moris dalan mak tuir Na'i Maromak hakaran hotu-hotu. Ema mak nanorin seluk, dudu sees Na'i Yesus Kristus hanorin loos. 4 Sia loko aan, mais mamuk! Sia toe mamuk. Siakaan hahalok nunia nalo ema hirus malu, ema nakaat malu, ema dale nahaat ema seluk naran, no ema naneo aat baa ema seluk. 5 Sia tokar lauk bei-beik. Siakaan kakutak dois. Sia la titu lia loos. Sia naneo sala na'ak, kalo sia madinas tuir Na'i Maromak hakaran, sia bele soi.
6 Tebes! Kalo ita moris tuir Na'i Maromak hakaran hodi horan to'o no saa mak iha, ita hetan sotir boot hanesan ema maksoin.
7 Oras ita moris, ita mai mamuk. Oras ita mate, ita moos fila mamuk. 8 Surak, noo haan no tais, to'o ti'an!
9 Ema mak nakara soi, maus kona sokur, to'o monu baa kuak oi-oik, tan naneo soi dei. Hanoin oin nunia nahoris dinu no nadodok moris. 10 A'aat oi-oik moris tan ema rotus osan. Ema balu nabu'a osan nunia, to'o sia sees nela siakaan fiar mak loos no nadodok siakaan moris du'uk.
Kaer metin hanorin mak o simu ti'an
11 Timo! O ne'e, Na'i Maromak niakaan. Tan baa nia, o musti moris nune'e: Moris moon, dook mosi lia aat hotu-hotu. Tuir Na'i Maromak hakaran hotu-hotu. Fiar baa Yesus Kristus bei-beik. Madomi ema hotu-hotu. Materus aan mo susar. Moris furak mo ema hotu-hotu. 12 Marui aan tebe-tebes atu mala'ok hanorin hotu-hotu mak ita fiar. Na'i Maromak foo moris nima-nimak baa o ti'an. O katak sain ti'an okaan fiar nunia iha ema lear oin. Dadi kaer metin moris nima-nimak nia. 13-14 Oras ne'e, ha'u kusu o mamate menon ma'ak, o tuir Na'i Yesus ukun hotu-hotu. Keta makur ukun ida moos, nebee ema la netan okaan salan. Tuir tebe-tebes, to'o loron itakaan Na'i Yesus Kristus namaan aan mai nikar. Ha'u kusu o mamate menon nunia iha Na'i Maromak oin. Tan Nia mak foo kmalar bodik makmoris hotu-hotu. Ha'u kusu o moos mamate menon nia iha Yesus Kristus oin. Tan Nia moos katak lia loos iha Gubernur Pontius Pilatus oin.a
15 Na'i Yesus boot kaliuk, beran kaliuk!
Na'in baa na'in hotu-hotu.
Ulun baa ulun hotu-hotu.
To'o niakaan oras,
lia ne'e sia hotu-hotu naksain.
16 Nia mesan mak la mate.
Nia moris iha kroman mak ema raiklaran la bele terus.
La noo ema raiklaran ida kois mak bele titu nola Nia.
Sera kneter hotu-hotu baa Nia nima-nimak!
Nia kaer beran hotu-hotu iha liman nima-nimak!
Nunia tebes!
Lia ema maksoin
17 Timo, katak baa maksoin raiklaran ne'e ma'ak, keta loko aan no keta hakrai aan baa sasoin. Tan sasoin hotu-hotu atu lakon mohu. Di'ak liu, hakrai aan baa Na'i Maromak mak moris. Tan Nia mak fakar tuun hotu-hotu bodik ita, nebee ita bele horan moris furak. 18 Katak baa sia nebee sia nodi sasoin nalo lia di'ak. Nebee, sia madinas natudu hahalok di'ak. Nebee, sia laran maluak baa ema. Nebee, sia fa'e matak-malirin mak Na'i Maromak foo baa sia. 19 Hodi nunia, sia nariik moris mak folin, tan sia babilan kedan bodik moris baa awan-wainrua.
Paulus narohan hakerek
20-21 Timo! Daka di'a-di'ak Manfatin hotu-hotu mak Na'i Maromak rai baa o. Ema balu naneo na'ak sia mesan mak matenek. Mais siakaan ‘matenek’ nia, la noo tatuur, tan sia fiar hanorin kale'uk. Keta manesa lia fuan mo sia. Keta kahur ho bosok teen sia. Keta dale lia mak la tuir Na'i Maromak beer.
Ha'u kakro'an nebee, Na'i Maromak natudu laran di'ak baa o.
Nunia dei.
Dame,
Paulus