Klala'ok haliku ema sarani sia
5
Timo! Keta de'an katuas sia modi maka'as. Mais dale baa sia modi kneter, hanesan o dale baa o aman du'uk. Foo babiit baa mane nurak sia, hanesan mane malun du'uk. 2 Dale baa ferik sia, hanesan dale baa o inan du'uk. Dale baa feto nurak sia, hanesan dale baa o feton du'uk. Okaan neon musti moos baa sia.Lia feto faluk
3-5 Ema sarani musti tulun feto faluk mak ema lalek. Mais feto faluk mak noo oan no bein oan, oan no bein oan sia mak musti naliku feto faluk nia. O musti manorin ema sarani sia, nebee sia natene selu siakaan feto faluk kolen. Tan hahalok nunia, kona baa Na'i Maromak neon. Mais feto faluk ema lalek, la noo ema naliku. Loron-kalan nia naloon loos baa Na'i Maromak nodi nusu tulun baa Nia dei. Feto faluk oin nunia, ema sarani sia musti naliku.
6 Mais feto faluk mak moris nafurak aan, masik nia sei moris moos, nia la noo folin.
7 Manorin lia nia sia hotu-hotu baa ema sarani sia, nebee ema seluk la dale nahaat siakaan naran.
8 Kalo ema ida la no'uk naliku familin du'uk, kaliuk ema uma laran du'uk, nia soe lakon niakaan fiar baa Na'i Maromak. Ema nia aat liu tan ema mak la natene Maromak.
9 Kalo boi feto faluk atu dadi sarani ulun sasi'an, niakaan lala'ok musti nune'e: niakaan otas la bele tuun nosi tinan neen nulu. Uluk, nia moris loos no la'en ida dei. 10 Ema natene nia laran di'ak. Nia naliku oan sia di'a-di'ak. Nia laran maluak. Nia tulun makfiar sia nodi serwisu ki'ik sia. Nia nakara tulun ema susar. Nia nodi liman rua tulun bei-beik ema mak nalo lia di'ak.
11 Keta boi feto faluk nurak atu dadi sarani ulun sasi'an. Keta to'o sia nakara noo la'en tenik. Hodi nunia, sia la noo leet naliku ema sarani. 12 Tan sia la noo leet nunia, sia nahaat siakaan mamenon mak uluk sia nameno iha Na'i Maromak oin. Ema moos atu nasalak sia. 13 Keta to'o sia nahuu baruk, hotu nalau aan tama-sai uma, dale nahaat ema naran. Aat liu tenik, kalo sia baa kahur ema seluk lian, no dale lia mak la makonak. 14 Di'ak liu, feto faluk nurak sia noo la'en tenik ona, nebee nahoris oan no naliku uma kain du'uk. Hodi nunia, ema mak funu ita, la netan lia krarain atu nadois itakaan naran. 15 Tuir loos, noo feto faluk nurak balu mak la'o sala dalan, tuir diabu ulun dalan.
16 Bodik feto makfiar sia, kalo noo feto faluk, sia mak musti naliku feto faluk nia. Keta habusik ema sarani seluk mak naliku. Hodi nunia, ema sarani seluk bele naliku feto faluk ema lalek sia.
Lia ema sarani ulun
17 Ema musti hakneter ema sarani ulun mak naliku di'a-di'ak hutun sarani. Kaliuk, ulun mak narui aan nalore Maromak Manfatin, no ulun mak manorik. 18 Hakerek Moon na'ak, “Kalo hodi karau sama hare, keta hatoos nunun nebee bele naa.” Hakerek Moon moos na'ak, “Ema mak serwisu fatan netan kansera.”a
19 Kalo ema tula sala baa sarani ulun, keta simu nunia dei! Musti noo saksiin na'in rua-tolu lian manesak, foin tetu lia nia.b 20 Tetu hotu ti'an, kalo ulun nia sala, de'an nia. Kalo nia sei nalo sala nunia bei-beik, de'an tenik nia iha hutun sarani oin. Hodi nunia, ema rumak sia la tuir niakaan lala'ok la makonak nia.
21 Mato'o lia lala'ok ne'e baa ema sarani sia. Keta fihir oin no keta kli'is. Na'i Maromak no Yesus Kristus dadi saksiin na'ak, oras ne'e ha'u karuka o ti'an atu mato'o lia lala'ok ne'e. Makbukar lale'an mak Na'i Maromak boi ti'an moos, dadi saksiin.
22 Keta lai-lais foti sarani ulun. Leno uluk niakaan moris. Kalo ema foti ulun mak la moon, hotu nia nalo sala, ema mak foti ulun nia moos, natiu nola sala nia. Tan lia nia, o musti daka aan nebee moris moon.
23 Ha'u krona o kabun moras bei-beik. Di'ak liu, kahur wee no anggor ween oan ida, malo baa aitahan. Keta memu wee moon dei.
24 Manoin! Ema balu salan malorek ti'an. Masik sia la to'o dauk makotu lia oin, ema hotu-hotu natene siakaan salan ti'an. Mais balu tenik salan, kleu-leur foin naksain. 25 Nunia moos, ema mak nalo lia di'ak sia. Ema balu nalo lia di'ak mak naksain kedas. Balu tenik nalo lia di'ak, mak sei la naksain dauk. Mais kleu-leur, lia di'ak nia moos nanis naksain.