Ami solok hakerek ne'e baa emi iha hutun sarani iha kota Tesalonika. Emi boi ti'an atu tuir Na'i Maromak, itakaan Ama, no Yesus Kristus, itakaan Na'in.^a 2 Nebee, itakaan Ama Maromak no itakaan Na'in Yesus Kristus natudu laran di'ak baa emi, nebee emi bele moris manek no dame.

3 Mamaluk sia! Ami musti hamulak hodi sera dodan baa Na'i Maromak nohuun, tan emi. Hamulak nunia fatan tebes, tan emi hetak fiar baa Na'i Maromak no hetak hadomi malu. 4 Ami dale lia nosi emi baa Na'i Maromak eman sia iha fatin hotu-hotu ha'ak, masik ema tonan nasusar emi moos, emi haterus aan hodi fiar nohuun.

5 Na'i Maromak nodi susar nia, atu nalore na'ak, Nia nakotu lia nodi moon. Hodi terus susar nunia, Na'i Maromak nalo emi fatan atu hana'i baa Nia no dadi Niakaan renun. 6 Tan Nia neon loos, Nia moos selu nikar ema mak nasusar emi nunia. 7-8 Nosi ikus, Nia babilan nebee emi bele hakbois hosi susar laran, hanesan ami moos hakbois. Lia nia atu dadi baa oras Na'i Yesus namaan aan tuun mai nosi lale'an nodi ha'i lakan boot, namutuk no Niakaan makbukar lale'an maka'as sia. Hotu, Nia taa ukun baa ema mak la no'uk natene Maromak, no ema mak la no'uk tuir Na'i Yesus Manfatin Di'ak. 9 Sia dodok tan netan kastikar mak sasa fa'e sia nima-nimak nosi Na'i Yesus oin. Hodi nunia, sia la noran tenik Niakaan beran no Niakaan ahar maksinak.^b 10 Mais oras Nia namaan aan mai nikar nia, makfiar hotu-hotu foti-nahaas Niakaan naran nodi nakneter Nia. Oras nia, emi moos tama iha makfiar nia siakaan leet, tan emi simu ti'an Manfatin Di'ak mak ami katak baa emi.

11 Tan baa nia, ami hamulak bei-beik bodik emi, nebee Na'i Maromak filak emi kfatan atu dadi baa Niakaan ema. Nebee, Nia foo beran baa emi atu bele halo lia di'ak tuir emikaan fiar. 12 Kalo emi moris nunia, ema seluk sia foti-nahaas Na'i Yesus naran. Hotu sia mose emi, tan emi tuir Nia. Lia ne'e sia hotu-hotu bele dadi, tan itakaan Ama Maromak no itakaan Na'in Yesus Kristus natudu laran di'ak baa ita.