Sintidu baa ema mak nanorin kale'uk
4
Oras ne'e, Maromak Kmalar katak malorek ti'an na'ak, nosi ikus ema sarani balu atu dudu itakaan fiar. Hotu sia tuir kukun mak be'ur ema raiklaran, to'o sia la'o sala no tuir diabu hanorin. 2 Ema mak nanorin nunia, dale seluk, nalo seluk. Sia huun tolek teen no neon tomak. 3 Sia nanorin na'ak, ema keta hola malu. Sia moos naluli hahaak oi-oik. Tuir loos, Na'i Maromak nase'i hahaak, nebee ita mak fiar baa Kristus no hatene hanorin loos, bele haa hodi sera dodan baa Nia. 4 Hotu-hotu mak Na'i Maromak nase'i nia, di'ak. Keta haluli oi-oik. Simu dei hodi hamulak sera dodan baa Nia. 5 Tan Maromak Manfatin no itakaan hamulak, naloos hahaak hotu-hotu.Yesus Kristus eman serwisu mak di'ak
6 Timo! Foo matene lia ne'e sia hotu-hotu baa mamaluk makfiar sia. Kalo o malo nunia, o dadi Yesus Kristus eman serwisu mak di'ak. Maromak Manfatin natudu dalan baa ita, nebee ita bele fiar baa Nia. Manfatin nia moos nalore hanorin mak loos no hanorin mak kale'uk. Tan lia nia, o musti kaer metin Manfatin nia hanesan haan mak nakbiit okaan isin. 7 Keta soe haat leet hodi dale karin mak la kona baa Na'i Maromak neon. Keta hanono ferik lekan dalen mak la noo huun dikin. Di'ak liu, bali isin lolon, nebee moris di'ak tuir Na'i Maromak beer.
8 Hatoman aan hakbiit itakaan isin, ne'e di'ak,
mais folin oan ida dei.
Hatoman aan moris tuir Na'i Maromak beer,
ne'e mak folin kaliuk.
Folin nia
lahoos baa moris raiklaran oras ne'e dei,
mais to'o no moris ikus baa.
9 Tebes! Lia ne'e sia, tebes no loos! Rai baa neon, nebee keta malu'a. 10 Ita haloon baa Maromak mak moris. Nia, maksorin bodik ema hotu-hotu, kaliuk bodik ita makfiar. Etuk, ita serwisu harui aan maka'as bodik Nia.
11 Timo, manorin lia ne'e sia hotu-hotu modi maruka ema nala'ok tuir. 12 Keta foo leet baa ema naraik o, tan o sei nurak. O musti dadi knaninuk bodik ema makfiar sia, nebee sia tuir okaan dale, okaan hahalok, okaan lala'ok hadomi ema, okaan fiar baa Yesus Kristus, no okaan moris moon. 13 Oras emi sei hein ha'u kmai, keta malu'a leno Hakerek Moon bodik ema makfiar sia. Makbiit sia modi manorin sia di'a-di'ak.
14 Mala'ok di'a-di'ak okaan babelen mak Na'i Maromak foo baa o, baa oras ema sarani ulun sia namulak nodi nasa'e liman baa o ulun. Baa oras nia, sia nato'o Na'i Maromak lia mamenon kona baa okaan moris no okaan serwisu. 15 O musti madinas mala'ok lia nia sia! Nebee ema hotu-hotu bele naree okaan moris no okaan serwisu mak hetak di'ak. 16 Daka aan, nebee o moris loos no manorin loos nohuun. Kalo o moris nunia, Na'i Maromak atu loke dalan baa o mo ema sia mak nanono baa o. Hodi nunia, emi bele moris nima-nimak ho Na'i Maromak.