Klala'ok boi ema sarani ulun
3
Noo ema mak dale na'ak, “Kalo ema ida nakara dadi ema sarani ulun, ema nia boi serwisu mak di'ak basuk.” Tebes. 2 Mais ema sarani ulun lala'ok musti nune'e: Nia naran morin. Nia moris moon no feen ida dei. Nia natene netu aan. Nia mamatek. Ema nakneter nia. Nia simu bainaka nodi laran maluak. Nia natene nanorin ema seluk. 3 Nia lahoos tua lanuk teen. Nia lahoos makta'e ema. Makonak liu basuk, kalo nia ema mak laran di'ak, mak nakara dame, no la rotus osan. 4 Nia musti bali uma kain du'uk. Niakaan oan musti nakneter no nanono baa nia. 5 Tan kalo ema la bele bali uma kain du'uk, oin nunabee bele bali Na'i Maromak eman sarani sia?6 Kalo boi ulun, boi ema mak tuir Kristus kleur ti'an. Keta boi ema mak foin fiar. Tan ema oin nunia maus loko aan. Keta to'o Na'i Maromak deku nia, hanesan Na'i Maromak deku diabu ulun. 7 Ema seluk moos musti nakneter sarani ulun. Hodi nunia, nia la moe aan. Diabu ulun moos la bele fo'at naloti nia.a
Ema sarani ulun sasi'an
8 Nunia moos ema sarani ulun sasi'an musti nune'e: Nia naran morin. Nia nanaan la karuak. Nia lahoos tua lanuk teen. Nia la naa sotir liu resik. 9 Nia neon moon. Nia kaer metin hanorin mak Na'i Maromak nalore ti'an baa ita ema makfiar sia. 10 Kalo emi atu boi ema sarani ulun sasi'an, leno di'a-di'ak uluk niakaan moris no niakaan serwisu. Kalo la noo sala, foin foti nia baa sarani ulun sasi'an.
11 Ema sasi'an feenb moos musti moris fatan no di'ak. Musti moris la nahaat ema naran. Musti netu aan. Musti ema fiar nia.
12 Sasi'an mane musti moris moon no feen ida dei. Musti natene bali uma kain du'uk. Musti naliku oan sia. 13 Kalo sarani ulun sasi'an naliku ema sarani di'a-di'ak, nanis ema hetak nakneter nia. Nia moos hetak naberan aan katak nosi niakaan fiar baa Yesus Kristus.
Lia tatuur nosi itakaan fiar
14-15 Timo! Ha'u kaloon, la kleur ona, ha'u kbele ma'i karee o. Mais kalo noo sasenin, ha'ukaan hakerek ne'e bele to'o uluk baa o. Kakerek ne'e atu foo katene baa o nosi lia Na'i Maromak ema uma laran siakaan moris lala'ok. Keta malu'a ma'ak, Na'i Maromak mak sia fiar nia, Maromak mak moris. Sia hanesan uma mak noo tatuur no kakuluk biit, mak tane Na'i Maromak hanorin loos.
16 Na'i Maromak loke ti'an lia funin boot nosi itakaan fiar. Itakaan fiar tatuur nia, nune'e:
Kristus namaan aan mai iha raiklaran ne'e,
nola ema raiklaran ilas hanesan ita.
Maromak Kmalar dadi saksiin na'ak,
Yesus ne'e, Ema Moon.
Maromak Niakaan makbukar lale'an sia naree Nia ti'an.
Niakaan Lia keke lema ti'an, to'o baa ema iha fatin hotu-hotu.
Iha rai hotu-hotu ema fiar Nia ti'an.
Na'i Maromak foti sa'e Nia baa lale'an, hotu Nia nabesi aan iha fatin kneter.
Itakaan fiar tatuur mak nia.