Hamulak lala'ok
2
Oras ne'e, ha'u atu kahuu foo lia tate'an nune'e: Hamulak bodik ema hotu-hotu. Kalo emi se'i oin baa Na'i Maromak, hakro'an nebee Nia tulun ema susar sia. Hamulak hodi sera dodan baa Nia, tan Nia laran di'ak. 2 Hamulak bodik na'in no ulun sia. Hodi nunia, ita hotu-hotu bele moris mamatek no dame, tuir Na'i Maromak hakaran. Tan moris nunia, fatan bodik ema mak lo'u-sudur baa Nia. 3 Hamulak nunia moos kona baa Maromak neon. Nia, itakaan Maksorin 4 mak nakara sori ema hotu-hotu. Nia moos nakara ema hotu-hotu natene hanorin loos. Hanorin nia, nune'e:5 Na'i Maromak, ida dei.
Ailalete moos, ida dei. Ailalete nia, mak Yesus Kristus. Yesus Kristus mak nalo Na'i Maromak laran malirin baa ita ema raiklaran.
Yesus, ema raiklaran nodi aan.
6 Nia latan isin lolon atu sori ita nosi itakaan salan.
Maromak Niakaan oras to'o ti'an atu nalore hanorin nia baa ema hotu-hotu. 7 Tan baa nia, Nia boi nola ha'u kdadi klosan atu kbaa katak ema mak lahoos Yahudi sia iha fatin hotu-hotu, kodi kanorin sia nebee sia fiar baa Na'i Yesus no moris tuir dalan mak loos. Saa mak ha'u katak ne'e, tebes no loos.a
8 Ha'u kakara nune'e: Kalo emi libur malu atu hamulak, emi musti di'a-di'ak ho malu. Keta hirus malu. Keta toe malu. Kalo foti liman atu hamulak, emikaan neon musti moos.
9-10 Nunia moos, feto sia. Ha'u kakara nebee sia nahulin isin lolon nalo fatan. Tau faru mak noo kneter. Sia keta natudu lisan nebee ema natutuk matan baa sia tan siakaan fuuk ilas oi-oik, lale, siakaan faru folin todan mak la noo kneter, lale, sia nafutar aan liu resik nodi mean-mutin no morteen. Lia mak nalo feto kabaas, lahoos nunia. Lia mak nalo feto kabaas, mak ne'e: siakaan hahalok di'ak no siakaan neon moon. Lia nia mak fatan bodik feto mak lo'u-sudur baa Na'i Maromak.b 11 Kalo emi ema sarani libur malu atu rona hanorin, feto sia musti tuir ukun nodi rona hanorin nia di'a-di'ak. Sia keta mu-muun. 12 Tuir ha'u, la kona, kalo feto sia nasa'ek aan to'o ukun mane no nanorin mane. Di'ak liu, feto sia mamatek dei. 13 Tan Na'i Maromak nase'i uluk Adam, foin nase'i Efa.c 14 Lahoos Adam mak kona be'ur uluk nosi diabu ulun, mais feto. Nahuu hori oras nia, ema raiklaran nakur Na'i Maromak ukun.d 15 Masik nunia moos, feto bele netan moris, tan nahoris oan.e Surak sia fiar baa Yesus Kristus, sia moris nadomi malu, sia moris fatan bodik Kristus eman nodi neon moon.