3 Tan Na'i Maromak kaer Niakaan mamenon, ami fiar ha'ak, Nia atu nakbiit emi no lituk emi nosi a'aat. 4 Ami moos fiar ha'ak, Na'i Yesus tulun emi, nebee emi halo tuir hanorin hotu-hotu mak ami hanorin ti'an baa emi. Nanis emi moos atu tuir nohuun.

5 Ami hakro'an, nebee Na'i Yesus babilan emi, nebee emi bele hetak hatene Na'i Maromak dadomin no hetak haterus susar, hanesan Kristus naterus susar.

6 Mamaluk sia! Ha'u kodi Na'i Yesus naran, karuka nune'e: keta kahur ho baruk teen no tablaun sia. Tan sia la tuir amikaan knaninuk. 7 Emi hotu-hotu hatene, emi musti hola knaninuk hosi amikaan moris baa oras ami hein ho emi. Baa oras nia, emi haree du'uk ami la dala ida moos soe butan leet. 8 Mais ami serwisu susi rui loron-kalan, nebee ami la hatodan emi. Ami moos la dala ida simu loos haan nosi emi. 9 Tuir loos, ami ne'e, Na'i Maromak eman serwisu. Ami hoo beran atu husu hosi emi. Mais ami la ho'uk halo nunia, tan ami hakara hatudu knaninuk di'ak bodik emi, nebee emi halo tuir. 10 Hori hirak nia, ami moos haruka ha'ak, “Ema mak la serwisu, keta naa.”

11 Oras ne'e ami rona ti'an ha'ak, noo ema nosi emi mak tablaun no la no'uk serwisu. Sia nalau aan nodi kahur ema lian. 12 Ami hodi Na'i Yesus Kristus naran, foo hatene baa ema oin nunia sia, nebee sia nanawa tablaun. Di'ak liu, sia serwisu buka haan nodi kosar ween du'uk.

13 Mamaluk sia! Keta hanawa halo di'ak!

14 Hatadan di'a-di'ak ema mak la no'uk tuir saa mak ami hakerek ne'e. Keta hamalu ho sia, nebee sia moe aan. 15 Mais keta funu sia. Hasee sia di'a-di'ak, hanesan mamaluk du'uk.

16 Na'i Yesus, Na'i Dame. Ha'u kakro'an nebee, Nia natuun Niakaan dame baa emi nohuun. Nebee, Nia namutuk no emi nohuun.

17 Ha'u kakerek lia fuan tatakan ne'e sia, kodi ha'ukaan liman du'uk, nebee emi bele hatene ha'ak, hakerek ne'e tebe-tebes nosi ha'u. Iha ha'ukaan hakerek seluk sia, ha'u moos kalo nunia.

18 Nebee, itakaan Na'in Yesus Kristus natudu laran di'ak baa emi hotu-hotu.