Ema aat kaliuk ida musti mai uluk lai, foin Yesus namaan aan mai
2
Mamaluk sia! Ami hakara halore nosi lia itakaan Na'in Yesus Kristus namaan aan mai nikar. Baa oras nia, ita hotu-hotu atu haklibur bele-bele ho Nia.a 2 Mais noo ema mak katak na'ak, Na'i Yesus namaan aan mai nikar ti'an. Keta kona be'ur nunia. Masik ema na'ak, sia netan lia nia nosi Maromak Kmalar ka, sia rona nosi ema ka, sia netan hakerek nosi ami ka, keta fiar! Tan bosok! 3 Keta foo leet baa ema atu nalekan emi nunia. Lia loos nune'e. Noo ema aat kaliuk ida mak sakar maka'as Na'i Maromak. Ema nia musti mosu uluk lai, foin Na'i Yesus namaan aan mai. Ema nia atu sakar Na'i Maromak, to'o ema lear tuir sakar no. Ema nia, nalo liu resik to'o fatan tama ha'i naraka! 4 Nia atu foti aan aas liu ai'oi hotu-hotu, no sakar hotu-hotu mak ema lo'u-sudur baa. Nia moos atu tama baa Na'i Maromak Uma Hamulak Huun nodi lalore aan na'ak, “Ha'u ne'e, Maromak!”b5 Oras ha'u ksei kamutuk ko emi, ha'u katak kedan lia nosi ema aat nia. Emi nanis sei hanoin.
6 Oras ne'e, ema aat nia sei la mosu dauk, tan noo maksaseni. Emi hatene ti'an maksasenin nia. 7 Oras ne'e, ema aat nia nala'ok niakaan serwisu nodi nakfunin dei, tan noo maksaseni nia. Mais nosi ikus, maksasenin nia nabusik liman. 8 Nunia, foin ema aat nia mosu nodi nala'ok lo-loren niakaan serwisu aat. Mais oras Na'i Yesus namaan aan mai nikar, Nia atu nadodok ema aat nia nodi lia fuan ida dei.c
9 Mais oras Na'i Yesus sei la namaan aan mai dauk, diabu ulun latan niakaan beran hotu-hotu baa ema aat nia, nebee nia bele nalo tadak blaar oi-oik, to'o ema simu na'ak, nia nodi Maromak beran.d 10 Hodi nunia, nia bosok nola ema lear. Hotu, ema lear nia moos dodok, tan sia netan kastikar mak sasa fa'e sia nosi Na'i Maromak. Na'i Maromak buka dalan atu sori sia, mais sia dudu Niakaan laran di'ak nia, nodi la fiar baa hanorin loos. 11 Tan baa nia, Na'i Maromak taka siakaan neon baa hanorin loos, hotu nabusik sia fiar baa lia tolek sia. 12 Hotu, Nia natuun kastikar baa sia, tan sia la fiar hanorin loos, mais nakara hotu-hotu mak la loos.
Makfiar sia musti naterus aan
13 Mamaluk sia! Ami hamulak hodi sera dodan bei-beik baa Na'i Maromak, tan Nia nadomi emi. Hori Nia sei la nase'i raiklaran dauk, Nia nakotu ti'an atu sori emi. Hotu Nia natuun Niakaan Kmalar atu namoos emi, tan emi fiar hanorin loos. 14 Baa oras ami katak Na'i Maromak Manfatin Di'ak baa emi, Nia nodi Manfatin nia atu bolu emi, nebee emi bele simu kneter hamutuk ho itakaan Na'in Yesus Kristus.
15 Tan lia nia, emi musti haterus aan, mamaluk sia! Kaer di'a-di'ak hanorin hotu-hotu mak ami hanorin ti'an no ami hakerek ti'an baa emi.
16-17 Ami hamulak bei-beik baa itakaan Ama Maromak no itakaan Na'in Yesus Kristus, nebee nakbiit emikaan neon, to'o emi bele halo lia di'ak hotu-hotu. Ami haberan aan hakro'an nunia, tan ami hatene ha'ak, Na'i Maromak nadomi ita liu basuk. Tan Nia laran di'ak, Nia la nanawa nakbiit ita. Ita bele haloon baa Nia nohuun.