Ami solok hakerek ne'e bodik emi mak tuir itakaan Ama Maromak no itakaan Na'i Yesus Kristus iha kota Tesalonika.

Ami hakro'an nebee Na'i Maromak natudu laran di'ak baa emi, nebee emi bele moris manek no dame.^a

2 Mamaluk sia! Loron-kalan ami hamulak bodik emi hotu-hotu. Ami sera dodan baa Na'i Maromak nohuun, tan emi fiar baa Yesus. 3 Ami moos hanoin serwisu mak emi hala'ok, tan emi fiar baa Yesus no hadomi Nia. Emi haterus aan ho serwisu nia sia hodi haloon baa Nia. Ami sera lia nia sia hotu-hotu baa Na'i Maromak, itakaan Ama.

4 Mamaluk sia! Ami hatene ha'ak, Na'i Maromak nadomi emi. Nia boi nola emi dadi baa Niakaan ema uma laran. 5 Hori hirak nia, ami mai Tesalonika, emi hanono di'a-di'ak Manfatin Di'ak mak ami halore. Emi lahoos hanono dei, mais emi moos haree du'uk Kmalar Lulik beran, to'o emi simu Manfatin Di'ak nia hodi neon no laran. Baa oras nia moos, emi haree du'uk amikaan knaninuk, to'o emi hatene tebe-tebes Na'i Maromak dalan. 6 Tan baa nia, emi boi tuir dalan nia, hodi tuir amikaan knaninuk no Na'i Yesus knaninuk. Masik ema nasusar emi tan lia nia sia, emi la kakoen, tan Kmalar Lulik haboot emikaan neon.^b

7 Hodi nunia, emi dadi knaninuk bodik makfiar hotu-hotu iha rai Makedonia no rai Akaya. 8 Mais la tuka baa nia dei. Tan Maromak Manfatin keke lema nosi emi iha Tesalonika to'o fatin hotu-hotu. Oras ne'e, ami atu dale saa tenik, tan ema hotu-hotu rona ti'an emikaan fiar baa Na'i Maromak. 9 Iha nabee dei ema dale na'ak, emi simu ami hodi liman rua. Emi moos soe lakon emikaan ai'oi lulik sia, hotu fila atu haliku Maromak Mak Moris No Loos. 10 Ema moos dale na'ak, emi sei hein Na'i Maromak Oan Yesus mai nosi lale'an. Hori hirak nia, ema no'o Nia, mais Na'i Maromak nalo Nia moris nikar. Nosi ikus, Na'i Maromak taa ukun baa ema raiklaran, Yesus mak sori ita nosi Maromak hahibun.