Hadi'a aan simu Na'i Yesus namaan aan mai nikar
5
Mamaluk sia! Ami lalika hakerek hodi halore baa tuku hira, baa loron dala hira, Na'i Yesus namaan aan mai nikar. 2 Tan emi hotu-hotu hatene ti'an, Niakaan mamain nia teki-tekis, hanesan ema na'ok mai baa kalan.a 3 Niakaan mamain mai nia moos hanesan ema mak tuur di'a-di'ak, la noo udan-anin, teki-tekis netan dinu. Hanesan no nu'u feto mak teki-tekis moras nahoris. Kalo lia nia sia to'o, ita la bele dudu. Nunia moos, oras Na'i Yesus namaan aan mai nikar.4-6 Mamaluk sia! Keta arumak Niakaan mamain nia sa'e tan emi, hanesan na'ok mai baa kalan boot oras ema toba dukur. Keta nunia! Tan ita la moris iha makukun ona, hanesan ema mak toba dukur sia. Ita mak fiar baa Yesus moris iha kroman ti'an. Ita musti hadi'a aan atu simu Nia, hodi daka isin lolon di'a-di'ak. Lia ne'e sia hotu-hotu, emi hatene ti'an! 7 Ema mak nakara toba, toba baa kalan. Ema mak nakara lanu tua, lanu baa kalan. 8 Mais emi keta nunia. Ita ne'e moris iha kroman ti'an. Dadi ita musti daka aan hanesan sondadu mak kaer ro'at-meik. Kalo ita fiar Yesus nohuun hodi hadomi malu, hahalok nia hanesan sondadu mak tau heli karas. Kalo ita haloon bei-beik baa Na'i Yesus mak sori ita nosi Na'i Maromak hahibun, hahalok nia hanesan sondadu mak tau sabeo besi.b
9 Na'i Maromak la boi nola ita atu kona kastikar, mais atu hetan moris, tan ita fiar baa itakaan Na'in Yesus Kristus. 10 Nia mate bodik selu nola ita. Kalo Nia namaan aan mai nikar, ita atu moris ho Nia nima-nimak, masik ita mate ti'an ka, ita sei moris ka. 11 Hakbiit malu neon hodi lia ne'e, hanesan emi halo uluk nia.
Paulus nanorin ema Tesalonika
12 Mamaluk sia! Hakneter ina no ama mak babilan ema sarani sia. Tan sia serwisu susi rui bodik emi, no foo natene nebee emi keta monu. 13 Hakneter hodi hadomi sia, tan siakaan serwisu. Emi moos musti moris dame malu.
14 Mamaluk sia! Noo lia hira mak ami atu foo hatene tenik nune'e: De'an baruk teen sia, nebee sia serwisu tebe-tebes. Hakbiit ema neon mamar sia. Hariik hosi ema beran lalek sia. Haterus aan ho ema hotu-hotu.
15 Hanoin! Keta selu aat hodi aat, mais harui aan halo di'ak nohuun baa ema hotu-hotu. Keta halo di'ak baa itakaan ema dei, mais baa ema seluk no.
16 Neon di'ak nohuun. 17 Hamulak loron-kalan. 18 Noo saa dei, susar ka, manek ka, sera dodan baa Na'i Maromak. Tan hahalok nunia mak Nia nakara nosi ema mak tuir Yesus Kristus. 19 Keta saseni Maromak Kmalar serwisu. 20 Kalo maluk ida dale na'ak, nia simu mamenon nosi Na'i Maromak, keta haraik dalen nia! 21 Leno lia nia di'a-di'ak, nebee emi bele hatene mamenon nia nahabut tebes nosi Na'i Maromak ka, lale. Kalo tebes, tuir baa. 22 Mais hakdook aan hosi aat hotu-hotu.
Paulus narohan hakerek
23-24 Ha'u kamulak kodi kakro'an, nebee Na'i Maromak namoos emikaan neon no laran. Nia mak nalo ita bele dame malu. Hodi nunia, oras itakaan Na'in Yesus Kristus namaan aan mai nikar, ita bele hariik iha Niakaan oin hodi isin moos no kmalar moos. Nia bolu ita dadi baa Niakaan ema moos. Ita bele fiar ha'ak, Nia nanis nalo nunia baa ita, tan Nia atu nala'ok saa mak Nia nameno ti'an.
25 Mamaluk sia! Keta halu'a hamulak bodik ami iha ne'e.
26 Ha'u kusu, nebee emi hato'o tabe hadomi baa mamaluk sarani sia iha nia!
27 Ha'u kusu kodi Na'i Yesus naran, nebee emi leno ha'ukaan hakerek ne'e bodik mamaluk sarani hotu-hotu.
28 Nebee, itakaan Na'in Yesus Kristus natudu laran di'ak baa emi hotu-hotu.
Nunia dei.
Dame,
Paulus