Moris mak kona baa Na'i Maromak neon
4
Lia nune'e, mamaluk sia! Ami hamaus emi, nebee moris kona baa Na'i Maromak neon. Ami hanorin nunia ti'an, emi moos tuir nunia ona. Mais tan emi dadi Na'i Yesus ema uma laran, ami husu nebee emi hetak harui aan tenik. 2 Emi hatene ti'an, lia mak ami hanorin baa emi nia hodi itakaan Na'in, Yesus beran. 3 Na'i Maromak nakara nune'e: Moris moon no dook hosi lia kfo'er. 4 Musti bali aan du'uk, nebee moris moon to'o ema nakneter emi. 5 Keta beer aat, hanesan ema mak la natene Maromak. 6 Keta malo sala baa maluk makfiar. Keta buka sotir hosi sia. Tan Na'i Maromak atu kastikar lisan aat nia sia. Hori uluk, ami halore lia nia sia baa emi ti'an. 7 Na'i Maromak bolu ita atu dadi Niakaan ema mak moris moon, lahoos ema mak moris hanesan ema mak nalo lia kfo'er nia sia. 8 Ema mak nakur hanorin ne'e, lahoos sakar ema raiklaran dei, mais sakar Na'i Maromak mak natuun Niakaan Kmalar Lulik baa emi.a9 Ha'u lalika kakerek tenik nosi lia hadomi malu, tan Na'i Maromak du'uk nanorin lala'ok nia baa emi ti'an. 10 Ami rona ha'ak, emi hadomi mamaluk sia hotu-hotu iha rai Makedonia. Mais lia nune'e, mamaluk sia! Oras ne'e, ami husu nebee emi hetak hadomi malu tenik. 11 Harui aan, moris mamatek. Keta kahur ema lian, mais bali lian du'uk. Serwisu buka haan hodi liman du'uk. Keta haloon baa ema seluk. Lia ne'e sia ami katak baa emi hori uluk ti'an. 12 Kalo emi moris nunia, emi la hatodan ema. Ema mak la fiar baa Yesus Kristus naree hahalok nunia, nanis sia dale na'ak, “Tebes! Yesus eman ne'e sia moris moon tebes!”
Lia Na'i Yesus namaan aan mai nikar
13 Mamaluk sia! Oras ne'e, ha'u kalore lia ida tenik baa emi, nebee emi bele hatene lia nosi ema mak mate ti'an. Lia mak loos nune'e: Na'i Maromak atu nalo ema mak mate ti'an moris nikar. Tan lia nia, kalo Kristus eman ida mate, emi lalika susar hanesan ema mak la natene lia ne'e. 14 Ita fiar ha'ak, Yesus mate, hotu Na'i Maromak nalo Nia moris nikar. Tan baa nia, ita moos bele fiar ha'ak, ema mak fiar mak mate ti'an, Na'i Maromak atu nalo sia moris nikar, hotu naklibur sia namutuk no Yesus.
15-17 Loron ikus, Na'i Yesus namaan aan nosi lale'an tuun mai raiklaran, noo lia maliak maka'as ida naruka. Makbukar lale'an ulun moos naruka nebee huu kfui. Hotu Na'i Yesus ema mak mate ti'an sia moris nikar. Sia ni'it aan namutuk no ita mak sei moris ne'e, sa'e baa kalo'an atu simu Na'i Yesus namaan mai nia. Hotu, ita hotu-hotu moris ho Nia nima-nimak.b