Uluk, Paulus nakotu solok Timotius baa Tesalonika
3
1-2 Surak emi hatene, hori hirak ami la'o hela emi nia, lahoos tuir amikaan hakaran. Oras nia, ami beer fila mai haree emi, mais la bele. Tan ami la terus ti'an rona lia nosi emi, ami solok Timotius baa emi. Mais ha'u ko Silas sei kein iha kota Atena. Timotius nia amikaan maluk mak nala'ok Yesus Kristus Manfatin Di'ak namutuk no ami. Ami solok nia baa atu nanorin emi no nakbiit emi, nebee emi bele fiar hetak biit baa Na'i Maromak. 3 Hodi nunia, emi bele kaer metin emikaan fiar, no la kakoen hasoru susar. Emi hatene ha'ak, ema mak fiar Kristus nanis netan susar. 4 Oras ami sei ho emi, ami katak ti'an nunia. Oras ne'e, lia nia dadi ti'an!a5 Uluk, ha'u ksusar liu resik tan kaneo emikaan tuur-hariik. Tan baa nia, ha'u ksolok Timotius baa emi, nebee kbele katene, emi sei fiar baa Na'i Maromak ka, lale. Ha'u kata'uk, keta arumak diabu ulun sokur emi to'o emi se'i kotuk baa Na'i Maromak. Kalo nunia tebes, ami serwisu butan.
Timotius fila mai nodi ema sarani Tesalonika lian
6 Oras ne'e, Timotius fila mai ti'an nosi Tesalonika, nodi lia mak nalo ami neon di'ak. Nia nasara na'ak, emi fiar Kristus nohuun no emi hadomi malu nohuun. Nia moos katak na'ak, emi hanoin ami, hanesan ami moos hanoin emi.b
7-8 Mamaluk sia! Ami iha ne'e horan todan tan susar oin-kotuk, mais Timotius dalen nia nakbiit ami no nametis amikaan neon. Tan oras ne'e, ami hatene ti'an, emi fiar metin baa Na'i Maromak.
Paulus namulak bodik ema Tesalonika
9 Ami hamulak sera dodan baa Na'i Maromak hodi neon boot, tan emi tuir Nia nohuun. 10 Loron-kalan ami hamulak bei-beik, nebee ita bele hasoru hikar malu. Tan ami hakara hanorin hato'o lia Na'i Maromak dalan moris baa nia.
11 Tan baa nia, ami haloon baa itakaan Ama Maromak no itakaan Na'in Yesus Kristus, nebee loke dalan baa ami atu hasoru emi. 12 Nebee, nalo emi hetak hadomi malu. Nebee, emi moos hadomi ema hotu-hotu, hanesan ami hadomi emi. 13 Hodi nunia, emikaan neon bele biit to'o emi dadi ema laran moon. Loron ikus, kalo Na'i Yesus namaan aan mai nikar no Niakaan ema sia, emi bele hariik iha itakaan Ama Maromak oin, hodi la hoo sala.