Paulus nanoin niakaan serwisu uluk iha Tesalonika
2
Mamaluk sia! Emi du'uk hatene oras ami serwisu iha Tesalonika, ami la hasai kosar butan. 2 Emi moos hanoin oras ami sei la mai Tesalonika dauk, ema Filipi sia nasusar no namukit ami. Masik ema funu ami moos, Na'i Maromak nakbiit amikaan neon, to'o ami haberan aan katak Niakaan Manfatin Di'ak baa emi. 3 Lia mak ami hanorin baa emi nia, lahoos hanorin kale'uk. Tan ami la mai atu halekan no tolek emi.a4 Lale! Ami mai hodi neon loos. Na'i Maromak du'uk mak natudu ami hodi Manfatin Di'ak baa emi. Ami mai nebee halo Na'i Maromak neon di'ak, lahoos halo ema raiklaran neon di'ak. Tan Na'i Maromak mak koko itakaan neon na'ak, loos ka, lale.
5 Oras ami hanorin emi, ami la hamina aan atu buka sotir hosi emi. Emi hatene lia nia. Maromak moos natene. 6 Ami serwisu lahoos atu buka ema mose. Emi ka, ema seluk ka, lale! 7 Ami ne'e Kristus klosan. Ami hoo beran hanesan ema boot. Mais ami la ho'uk haboot aan. Ami halo aan hanesan ema ki'ik tan hadomi emi. Ami halo baa emi hanesan ina susu nalo baa oan. 8 Tan hadomi resik nunia, ami foo lahoos Manfatin Di'ak dei, mais ami moos latan to-tomak amikaan isin lolon.
9 Mamaluk sia! Emi sei hanoin baa oras ami hodi Manfatin Di'ak nia mai, ami susi rui loron-kalan atu moris du'uk, tan la ho'uk hakole emi. 10 Baa oras ami sei ho emi, ami moris moon, la halo oi-oik. Emi haree du'uk, Maromak moos naree! 11 Emi moos hatene, ami halo baa emi, hanesan ama susu nalo baa oan. 12 Ami hakbiit emikaan neon, foo hatene baa emi, no hamaus emi nebee moris fatan, kona baa Na'i Maromak neon. Tan Nia mak Na'in. Nia bolu nola emi atu dadi Niakaan renu no simu kneter hamutuk ho Nia.
Na'i Maromak serwisu iha ema Tesalonika neon
13 Ami hamulak hodi sera dodan baa Na'i Maromak nohuun, tan baa oras emi rona Manfatin Di'ak hosi ami, emi simu hodi fiar ha'ak, lia nia lahoos ema raiklaran lia fuan, mais Na'i Maromak Manfatin nodi aan. Oras nia, Na'i Maromak du'uk mak serwisu iha emikaan neon laran.
14 Mamaluk sia! Oras emi foin tuir Na'i Maromak dalan, emikaan ema du'uk nasusar emi. Hodi nunia, emi manesak ho ema sarani rai Yudea sia. Sia moos netan susar nosi siakaan ema Yahudi du'uk, tan fiar baa Yesus Kristus.b
15 Kle'ur ti'an ema Yahudi balu sakar Na'i Maromak. Uluk, oras Nia naruka mako'an sia mai, ema Yahudi nasusar no no'o sia. Nunia moos, ema Yahudi no'o Na'i Yesus. Baa oras ne'e tenik, sia buka dalan atu dudu sai ami. Sia funu ema hotu-hotu, mais Na'i Maromak la nakara sia.c 16 Sia nalo sohan oi-oik, nebee ita lalika hodi Manfatin Di'ak baa ema seluk, tan sia la no'uk Na'i Maromak sori ema seluk. Nodi nunia, sia butuk siakaan salan hetak aas. Etuk, nosi ikus Na'i Maromak nahibu to'o taa ukun baa sia.
Paulus beer nasoru nikar ema Tesalonika
17 Mamaluk sia! Baa oras ne'e, ita dook baa malu. Mais dook baa matan dei, neon lale. Ami buka leet atu mai tone emi tenik, tan ami hanoin emi basuk. 18 Ha'u du'uk karui aan ti'an atu kmai tone emi, mais diabu ulun saseni nohuun. 19 Emi hatene tan saa ami beer tone emi ka? Tan ami rai neon baa emi. Emi mak haboot amikaan neon. Tan see tenik mak kaer metin Na'i Maromak naran, kalo lahoos emi? Oras Na'i Yesus namaan aan mai nikar, ami bele foti oin tan emikaan moris di'ak. 20 Tebes! Emi mak haboot no hafutar amikaan neon.