2 Emi musti harui aan hamulak bei-beik no madinas sera dodan baa Na'i Maromak. 3 Keta halu'a hamulak bodik ami, hodi hakro'an nebee Na'i Maromak loke dalan baa ami atu bele katak baa ema hosi lia Kristus mak uluk sei lia subar. Hanoin! Ha'u ktama bui ne'e, tan ha'u katak lia Kristus baa ema. 4 Hamulak nebee ha'u kbele kalore tebe-tebes lia Kristus nia, to'o ema bele natene di'a-di'ak lia isin.

5 Moris di'a-di'ak ho ema mak la fiar baa Kristus. Babilan di'a-di'ak leet mak Nia foo baa emi.^b 6 Kalo emi dale, dale mamamar hodi lia mak kona baa ema neon. Keta dale halekan sia, mais hodi lia fuan malolok, nebee, kalo ema nusu nikar emi, emi bele hataa fila sia.

7 La kleur ona, Tikikus atu tone nasara baa emi nosi ha'ukaan tuur-hariik. Tikikus nia, maluk mak ita hadomi. Nia babilan di'a-di'ak Na'i Maromak eman sia. Uluk, nia nala'o Na'i Maromak Niakaan serwisu namutuk no ha'u.^c 8 Ha'u ksolok nia tone atu nakbiit emikaan neon, no nasara baa emi nosi amikaan moris iha ne'e.^d 9 Ha'u moos solok fila Onesimus. Onesimus nia, maluk mak ita hadomi. Nia serwisu bodik Na'i Maromak di'ak basuk. Nia moos, emikaan ema du'uk. Sia rua atu nasara baa emi nosi lia hotu-hotu mak dadi ti'an iha ne'e.^e

10 Aristarkus solok tabe baa emi. Ema neti natoos nia iha bui namutuk no ha'u. Barnabas niakaan feton oan Markus moos, solok tabe. Uluk, ha'u kameno kedan baa emi ka'ak, kalo Markus mai naree emi, simu nia di'a-di'ak.^f 11 Yesus (ema ida seluk mak ema nanaran na'ak, “Yustus”), nia moos solok tabe baa emi. Nosi belu hotu-hotu mak nala'o Na'i Maromak ukun, sia na'in tolu dei nosi ema klubun Yahudi. Sia ne'e, mak nakbiit ha'ukaan neon.

12 Emikaan belun Epafras iha ne'e moos solok tabe baa emi. Nia moos dadi Yesus Kristus ain-liman. Nia namulak biit bodik emi. Nia nakro'an nebee Na'i Maromak nakbiit emi, to'o emi fiar tebe-tebes hodi tuir Niakaan hakaran hotu-hotu.^g 13 Ha'u karee kodi matan du'uk, Epafras serwisu susi ruin bodik emi no bodik ema makfiar sia iha kota Laodikia no kota Herapolis.

14 Tabe nosi Demas no makdook Lukas mak ita hadomi.^h

15 Ha'u moos solok tabe baa mamaluk makfiar sia iha kota Laodikia. Keta halu'a solok ha'ukaan tabe baa Ina Nimfa no mamaluk makfiar sia mak libur aan iha niakaan uma.

16 Kalo emi iha Kolose leno hotu hakerek ne'e ti'an, solok liu baa ema makfiar sia iha kota Laodikia, nebee sia moos bele leno. Emi moos musti leno hakerek mak uluk ha'u ksolok ti'an baa sia.

17 Foo hatene baa Arkipus ha'ak, “Keta malu'a serwisu mak uluk o simu ti'an hosi Na'i Maromak. Mala'o serwisu nia to'o mohu.”ⁱ

18 Keta halu'a ha'ak, ema sei neti natoos ha'u iha bui ne'e.

Ha'u kakro'an nebee, Na'i Maromak natudu laran di'ak baa emi.

Haree dei! Hakerek ne'e, ha'u kteken kodi ha'ukaan liman du'uk.