3
Na'i Maromak foo moris foun baa emi ti'an, nu'u Nia nalo emi moris hikar hamutuk ho Kristus. Oras ne'e, Kristus nabesi aan baa fatin kneter kaliuk iha Na'i Maromak sorin kwana. Etuk, emi musti hanoin lia mak fatan no Kristus neon.a 2 Keta halau aan baa lia mak nadi'ak ema raiklaran neon, mais halau aan baa lia mak Kristus nakara. 3 Baa oras Kristus mate, nu'u emi moos tuir mate ti'an. Ne'e na'ak, emikaan moris foun nia atu nafati, tan emi talin malu ho Kristus mak namutuk no Na'i Maromak iha lale'an. 4 Kristus moris iha emikaan neon laran, nodi nalo emi moris loos. Baa oras Nia namaan aan mai nikar, emi moos atu mosu mai hamutuk ho Nia. Lia ne'e sia, maka'as tebes!Moris ilas tuan no moris ilas foun
5 Tan lia nia, emi musti foti soe emikaan beer halo aat sia. Nu'u beer makur biti kluni; malo lia kfo'er; malo lia sasobo; malo tuir nawan aat; malo aat oi-oik; no rotus ema sasoin. (Kalo o malo tuir lia nia sia, ne'e hanesan o lo'u-sudur baa ai no fatuk, modi sesu sai Na'i Maromak nosi okaan neon.) 6 Lia nia sia nalo Na'i Maromak nahibu to'o atu kastikar ema mak la no'uk rona baa Nia. 7 Uluk, emi moris nunia, tan emi talin malu ho lia aat nia sia.
8 Mais oras ne'e, emi musti soe emikaan beer halo aat hotu-hotu. Nu'u nawan sa'e; laran manas; rai hirus; dale hahaat ema naran; no ibun kadoor. 9-10 Keta tolek malu, tan emi soe ti'an emikaan beer aat nia, hodi la'o hela emikaan moris tuan ona.b
Oras ne'e, emi seluk emikaan moris tuan hodi neon foun, nu'u ema soe tais tuan mak kadoor, seluk nodi tais foun mak moos. Uluk, Na'i Maromak nase'i emi. Oras ne'e, Nia nalo emi hetak hatene Nia, to'o emi dadi ilas ida ho Nia.c 11 Iha moris foun ne'e, ita la tau marak baa, ha'ak, ema sia ema Yahudi ka, ema lahoos Yahudi ka; ema mak namane aan ka, ema mak la namane aan ka; ema matak ka, ema notar lalek ka;d ata ka, lahoos ata ka. Lia nia sia la noo folin. Lia mak noo folin, ne'e mak, ema talin malu no Kristus, tan Nia moris iha siakaan neon.
12 Na'i Maromak boi emi ti'an, tan Nia nadomi emi. Nia nakara nebee emi dadi baa Niakaan ema moos. Tan lia nia, emi musti dadi ema mak laran maluak, ema mak laran di'ak, ema mak laran mamar, ema mak naraik aan no ema mak neti aan. 13 Emi musti heti neon hodi hatene malu. Kalo noo ema ida nosi emi buka lia no belun, keta rai hirus. Mais emi musti halu'a lakon sala nia, hanesan Na'i Maromak nalu'a lakon emikaan salan.e 14 Lia dadomin, mak folin liu lia hotu-hotu. Dadi emi musti hodi dadomin mak iha emikaan neon atu kesi kabuar malu dadi baa mesak, hanesan ema nodi kabas lahon wa'in, soru, dadi baa tais furak ida.
15 Emi musti foo leet nebee Kristus Niakaan dame babilan emikaan neon, tan Na'i Maromak nakara nebee emi moris dame malu hodi neon ida. Emikaan neon moos musti nakonu dodan, tan Nia boi nola emi ti'an.
16 Kristus Manfatin moos musti babilan emikaan neon no emikaan moris. Manfatin nia hanesan sasoin folin todan mak Nia foo baa emi. Manfatin nia natudu dalan nebee emi bele hatene lia wa'in, tuir Na'i Maromak hanoin. Emi bele hodi Manfatin nia atu hanorin no foo hatene baa malu. Kalo hanorin emikaan ema sia, keta hodi maka'as, mais hodi laran mamar. Sera dodan baa Na'i Maromak nohuun. Foti-hahaas Nia hodi kananuk tonun, hodi kananuk mak Niakaan Kmalar Lulik foo baa emi, no kananuk seluk sia. 17 Emi ne'e, Na'i Yesus Kristus sasi'an. Iha emikaan dalen no emikaan hahalok hotu-hotu, keta halu'a hodi Niakaan naran. Ita moos hodi Niakaan naran atu sera dodan baa Ama Maromak.f
Oin nunabee ema sarani sia moris talin malu
18 Feto mak noo la'en sia! Hanono baa emikaan la'en, tan lia nia fatan bodik ema mak tuir Yesus Kristus.g
19 Mane mak noo feen sia! Hadomi emikaan feen. Keta halo sia laran moras.h
20 Oa sia! Hanono baa emikaan inan-aman iha lia hotu-hotu, tan lia nia mak kona baa Na'i Maromak neon.i
21 Ina-ama sia! Keta tonan oan sia hodi maka'as, nebee sia keta neon ki'ik baa emi.j
22 Ema makserwisu sia! Iha raiklaran ne'e, emi musti halo tuir emikaan ulun iha lia hotu-hotu. Keta serwisu madinas baa oras sia iha dei. Mais harui aan nebee emi halo sia neon di'ak nohuun. Serwisu tuir loos, tan Na'i Maromak titu-naree emi. 23-24 Kalo halo saa dei, serwisu tuir loos hodi laran maluak, hanesan emi serwisu bodik emikaan Ulun Yesus Kristus, lahoos bodik ema raiklaran. Nosi ikus, Nia mak atu selu emikaan kansera nodi foo sasoin baa emi iha lale'an. 25 Mais kalo emi la serwisu tuir loos, Nia atu kastikar emi, tan Nia la fihir oin.k