2
Ha'u kakara nebee emi hatene ha'ak, ha'u moos serwisu susi ruin bodik emi iha kota Kolose, no ema iha kota Laodikia, no ema mak sei la nasoru ha'u dauk. 2 Ha'u kakara kakbiit emikaan neon, nebee emi bele talin malu dadi mesak, hodi moris hadomi malu. Hodi nunia, emi bele hatene tebes Na'i Maromak hakaran nosi lia Kristus mak uluk Nia sei la dale loke fore dauk baa ema raiklaran. 3 Kalo emi talin malu to'o neon ida ho Kristus, Nia foo matenek hotu-hotu mak emi buka. Nia nanorin emi nodi Niakaan matenek, nebee emi bele halo lia di'ak sia. Matenek nia, hanesan sasoin mak folin todan.4 Ha'u katak baa emi lia ne'e sia hotu-hotu, nebee ema keta mai dale namina aan to'o tolek nola emi. 5 Oras ne'e, ita dook baa malu. Masik nunia moos, ha'u kanoin emi bei-beik, tan ha'ukaan neon talin malu ti'an no emi. Ha'u neon di'ak, tan ha'u katene emi moris fatan, no emi sei kaer metin emikaan fiar baa Kristus.
Ita mak talin malu ho Kristus, la kona ukun-badu ona
6 Uluk, emi simu Yesus Kristus dadi baa emikaan Ulun. Oras ne'e, emi musti hanono bei-beik baa Nia, tan Nia sei dadi baa emikaan Ulun. 7 Kalo emi moris talin malu ho Nia, emi hanesan ai huun mak hetak biit, tan abut tama le'an. Emi moos hanesan uma mak biit, tan nariik iha tatuur mak biit. Kalo emi moris tuir hanorin loos, emikaan fiar hetak biit, no emikaan neon no laran nakonu dodan tan lia di'ak mak Na'i Maromak nalo ti'an bodik emi.
8 Sintidu! Keta tuir ema seluk mak nodi matenek raiklaran namaus nola emi, to'o emi sees hosi dalan loos. Siakaan hanorin nia la noo tatuur, tan hanorin nia la mai nosi Kristus, mais mai nosi kakutak ema raiklaran dei.
9 Masik Kristus dadi ema raiklaran hanesan ita, mais Na'i Maromak Niakaan maka'as hotu-hotu iha Kristus. 10 Tan emi talin malu ho Kristus, Nia nalo emi biit to'o emi la hakiduk kois. Nia mak aas liu, mak noo beran, no makaer ukun hotu-hotu. Di'ak ka, aat ka, Nia aas liu hotu-hotu. 11 Baa oras ema Yahudi sia namane aan, sia ko'a nasai isin kulit atu dadi tadak na'ak, sia, Na'i Maromak eman. Baa oras emi dadi baa Kristus eman, nu'u emi moos ‘hamane aan’. Lia nia nune'e: Hamane aan ne'e lahoos ema mak ko'a nasai emikaan isin kulit, mais Kristus mak foti nasai a'aat nosi emikaan neon. A'aat nia, ne'e mak a'aat hotu-hotu mak ita ema raiklaran hakara halo.
12 Baa oras sia sarani emi nodi wee, nu'u emi kona hakoi hamutuk ho Kristus. Hotu, emi hetan moris foun, hanesan Nia. Emi hetan nunia, tan fiar baa Na'i Maromak mak nodi Niakaan beran maka'as nalo Kristus moris nikar nosi mate. Nia moos nodi beran nia serwisu iha emikaan neon.a
13 Uluk, nu'u emi mate ti'an, tan emi halo sala no emi sei la dadi dauk baa Na'i Maromak eman. Masik nunia moos, Nia kasu mohu emikaan salan hotu-hotu, nodi foo moris foun baa emi, hanesan Nia moos foo moris foun baa Kristus baa oras nalo Nia moris nikar.b 14 Tuir loos, ita musti kona kastikar tan hakur Na'i Maromak ukun. Mais baa oras ema nedi no'o Kristus baa ai karuus, oras nia moos Na'i Maromak kasu mohu itakaan kastikar.c d 15 Baa oras nia moos, Nia natoba nola beran kukun no ukun aat hotu-hotu. Hotu, Nia namoe sia iha ema lear oin, nu'u sondadu natoba nola funu, hotu fila mai nadahur nodi lalore funu mak lo'u baa sia ti'an.
16 Mamaluk sia! Noo ema mak nakara seten emi atu nalo tuir siakaan ukun-badu. Kalo sia nalo lia no emi nosi lia ukun-badu haa-hemu, lalika titu sia. Kalo sia nalo lia no emi nosi lia loron di'ak ka, dahur fulan foun ka, ukun-badu loron hanawa serwisu ka, keta rona baa sia.e 17 Lia oin nunia sia la noo folin. Lalatak dei! Lia malolok, mak Kristus.
18 Kalo ema nalo lia no emi tan emi la tuir ukun-badu mak sia nase'i du'uk, keta rona. Tan kalo emi halo tuir, emi la bele simu lia di'ak mak Na'i Maromak atu foo baa emi. Sintidu! Noo ema mak buka atu nahonu emi. Sia nakara nebee emi haraik aan, hodi lo'u baa Na'i Maromak Niakaan makbukar lale'an sia, tan sia naneo na'ak, noo me'i mak nalore baa sia nunia ti'an. Sia nafolin aan di'ak liu ema seluk. Mais lia nia la makonak, tan siakaan kakutak nia, kakutak raiklaran dei. 19 Sia la talin malu no Kristus. Tuir loos, Nia mak Ulun. Niakaan ema sia, dadi baa Niakaan Isin, mak Nia babilan. Nia nalo Niakaan ema sia hetak biit nodi Na'i Maromak beran. Hodi nunia, sia dadi hanesan isin uat no ruin mak talin malu metin, nebee bele tulun malu metin, to'o isin tomak serwisu di'ak.f
Ita mak talin malu ho Kristus, hetan moris foun
20 Emi nu'u mate hamutuk ho Kristus ti'an. Lia nia na'ak, emi la talin malu ho beran aat sia iha raiklaran ne'e ona. Dadi, tan saa emi sei tuir ema raiklaran ukun-badu mak na'ak, 21 “Keta kaer ne'e; keta haa nia; keta kebit ne'e.” 22 Ema raiklaran nase'i ukun-badu nia sia atu nodi nanorin ema. Mais tuir loos, ukun-badu nia sia babilan loos lia mak atu lakon mohu dei. 23 Ema mak nalo tuir ukun-badu, sia nakara nebee ema mose sia na'ak, sia ema matenek, sia ema moon, sia ema mak naraik aan, no sia ema mak nasusar isin lolon du'uk. Mais tuir loos, la nunia. Ukun-badu nia sia la bele babilan nola ema raiklaran kakutak no ema raiklaran neon mak beer nalo aat nohuun.