2 Ha'u kusu baa maluk feto na'in rua nia, mak Yodia no Sinteke, nebee sia keta toe malu ona, tan siakaan Ulun mesak ida.

3 Maluk! Ha'u kfiar o, dadi ha'u kusu o babilan feto na'in rua nia, to'o sia di'ak malu. Uluk sia serwisu maka'as tulun ha'u kalore Manfatin Di'ak baa ema. Sia moos serwisu nunia ti'an no Klemens no belu seluk sia. Na'i Maromak nakerek ti'an siakaan naran iha Niakaan hakerek mak noo ema naran mak atu moris nima-nimak no Nia iha lale'an.

4 Emi musti neon di'ak loron-kalan tan emi talin malu ho Na'i Maromak ti'an. Ha'u katak kikar tenik: neon di'ak nohuun baa.

5 Emi musti halua laran baa ema hotu-hotu. Keta halu'a ha'ak, Na'i Yesus kre'is ti'an atu namaan aan mai nikar. 6 Kalo emi hetan susar sa-saa dei, keta neon ki'ik. Mais hamulak hodi haro'an nebee Na'i Maromak tulun emi iha lia hotu-hotu. Baa oras emi hamulak, keta halu'a foti neon hodi sera dodan baa Nia. 7 Kalo emi halo nunia, Na'i Maromak nalo emi neon noku. Tebes! Ema raiklaran la natene lia neon noku mak ita hetan hosi Na'i Maromak nia. Mais tan emi fiar baa Yesus Kristus, Na'i Maromak daka emikaan neon no laran.

8 Mamaluk sia! Lia badak nune'e: keta hanoin wa'in. Mais daka neon no laran atu hanoin lia mak kona baa Na'i Maromak neon. Hanoin lia di'ak mak nalo ema neon di'ak. Hanoin lia moon. Hanoin lia loos. Hanoin lia furak. Buka dalan nebee ema seluk bele netan kneter. Buka dalan atu foti lia di'ak. Keta hanawa hanoin lia di'ak ne'e sia hotu-hotu. 9 Ha'u kanorin emi ti'an atu tuir Na'i Maromak dalan moris. Emi moos musti haninu ha'ukaan moris, hodi halo tuir hotu-hotu mak ha'u kdale no kala'ok ti'an. Kalo emi tuir nunia, Na'i Maromak namutuk no emi. Nia nakbiit emi, nebee emi bele moris dame no bele neon noku.

10 Ha'u ksera dodan kodi tonu-kaboot Na'i Maromak, tan emi la halu'a ha'u. Ha'u katene, uluk emi hanoin ha'u, mais sei la noo leet atu tulun ha'u. 11 Tuir loos, ha'u la kusu sa-saa. Ha'u koran sa-saa hotu-hotu to'o, tan ha'u kmoris toman kodi neon di'ak baa sa-saa mak iha. 12 Loron balu, ha'u koran liman mamuk. Loron balu, ha'u koran moris naresin. Masik ha'ukaan kabun salaen ka, bosu ka, ha'u katene loos kalo di'ak ha'ukaan neon sura loron. 13 Ha'u kbele katerus aan baa lia hotu-hotu, tan Kristus mak nakbiit ha'u!

14 Masik nunabee moos, ha'u ksera dodan tan emi hatudu laran di'ak, hodi tulun ha'u oras ha'u kona susar. 15 Uluk, baa oras ha'u kla'o kela rai Makedonia atu baa katak Manfatin Di'ak iha fatin seluk, emi hosi kota Filipi mesan dei mak tulun selu osan dalan bodik ha'u. Ema sarani seluk sia, lale. Mais emi hatene lia nia ti'an. 16 Nu'u baa oras ha'u ksei iha kota Tesalonika, emi solok osan dala ida-rua, atu tulun ha'u.^a 17 Oras ne'e, ha'u la kakara kusu sa-saa tenik kosi emi. Mais ha'u kakara nebee, Na'i Maromak selu emi nodi natuun matak-malirin, tan emi laran di'ak baa ha'u. 18 Ha'u ksimu kola ti'an kosi Epafroditus tatulun hotu-hotu mak emi solok nia. Tatulun nia dadi matak-malirin bodik ha'u. To'o oras ne'e moos, ha'u la koran sa-saa mak la to'o. Tatulun nia nu'u sera tunun mak morin bodik Na'i Maromak. Nia simu sera nia, tan nalo Nia neon di'ak.^b

19 Na'i Maromak mak ha'u ksudur baa nia, soi kaliuk. Nia natene tebe-tebes saa mak emi buka. Nia atu natudu laran di'ak nodi natuun matak-malirin maka'as baa emi, tan emi talin malu ho Yesus Kristus. 20 Tan baa nia, ita musti foti-hahaas Ama Maromak naran to'o nima-nimak. Nia tebes!

21 Ha'u ksolok tabe baa Na'i Maromak eman hotu-hotu mak tuir Yesus Kristus iha kota Filipi.

Ha'ukaan belun sia iha ne'e moos, solok tabe.

22 Ema makfiar hotu-hotu iha kota Roma ne'e moos, solok tabe.

Nunia moos, mamaluk sia mak serwisu iha na'i boot tofatik. Sia solok tabe furak baa emi.

23 Ha'u kakro'an nebee itakaan Ulun Yesus Kristus natudu laran di'ak baa emi hotu-hotu.