Na'i Maromak simu ita, tan fiar baa Yesus Kristus
3
Mamaluk sia! Emi musti neon di'ak, tan emi talin malu ho Kristus. Ha'u kakerek baa emi ti'an nebee keta kona be'ur. Oras ne'e moos, ha'u la kanawa kakerek tenik baa emi nunia.2 Sintidu ho maktolek teen sia. Sia nu'u asu krakat mak naloot nodi seten ema na'ak, “Emi musti hamane aan nebee Na'i Maromak simu emi.” Sia sala ti'an! 3 Ita hatene, Na'i Maromak simu ema, tan fiar baa Yesus. Dadi, Na'i Maromak eman tebe-tebes, mak ita ne'e, mak fiar baa Yesus! Ita mak lo'u-sudur baa Nia, tuir Niakaan Kmalar Lulik. Ita mak foti-hahaas Nia. Ita la bele hetan moris hosi hahalok ema raiklaran. Lia ne'e sia, tebes!
4 Uluk, ha'u moos kaneo sala hanesan sia. Ha'u kaneo ka'ak, ema bele tama dadi baa Na'i Maromak eman, surak namane aan. Mais lia nia, hahalok ema raiklaran dei! Kalo dale hahalok ema raiklaran, ha'u kbele dale loko aan liu hotu-hotu, tan uluk ha'u ktuir besik ukun-badu Yahudi hotu-hotu. 5-6 Ha'ukaan ina-ama nodi ha'u baa kamane aan, baa oras ha'ukaan otas loron walu tuir ukun-badu nia. Ha'u ne'e moos ema Yahudi isin, tan ha'u kosi ema hunun Benyamin, husar-binan besik nosi bei Isra'el. Ha'u moos madinas kaliuk tuir ukun-badu hotu-hotu nosi partee Farisi, to'o la noo ema ida mak bele nasalak ha'u. Liu tan tenik, ha'u madinas kaliuk kasusar ema mak tuir Kristus, tan ha'u kaneo ka'ak, ema nia sia atu nalakon itakaan Ukun-badu.a
7-8 Mais kleu-leur ha'ukaan neon nakfilas, baa oras ha'u kfila tuir Kristus. Oras ne'e, ha'u la loko aan ti'an kodi ha'ukaan moris uluk nia, tan la noo folin ona. Lia mak folin kaliuk, ne'e mak, ha'u kbele katene Yesus Kristus, mak ha'ukaan Ulun. Lia seluk sia, ha'u kfilak nu'u ai ho'ar. 9 Ha'u kbeer moris talin malu ko Yesus Kristus, tan masik ha'u ktuir ukun-badu hotu-hotu moos, sei la nanis Na'i Maromak simu ha'u. Masik ha'u kafolin aan loos ti'an moos, sei la nanis Nia simu ha'u. Ha'u kmusti fiar uluk baa Kristus, foin Na'i Maromak simu ha'u na'ak, “Tan Kristus kasu mohu okaan salan sia, o moos ti'an.”
10 Ha'u kakara katene di'a-di'ak Kristus. Ha'u moos kakara katene di'a-di'ak Na'i Maromak beran mak nodi nalo Yesus Kristus moris nikar nosi mate. Kalo ema nasusar ha'u tan tuir Kristus, habusik baa dei, tan ema moos nasusar Kristus. Kalo ema no'o ha'u, ha'u moos simu, tan Kristus moos mate nunia bodik ha'u. 11 Hodi nunia, kalo nosi ikus ha'u kmate, Nia moos nalo ha'u kmoris kikar.
Ita musti harui aan tebe-tebes tuir Na'i Maromak dalan
12-13 Mamaluk sia! Ha'u kakara basuk tuir Kristus dalan moris no Niakaan hakaran hotu-hotu. Mais kalo ha'u kdale moon, ha'u ksei la tuir malolok dauk. Masik nunia moos, ha'u karui aan bei-beik tan Yesus Kristus boi ha'u ti'an atu tuir Nia. Ha'u ktuir Nia hanesan ema mak nalai biit to'o marak rohan. Ha'u kalai katutuk lo-loos baa oin, la mana kotuk kodi kanoin lia uluk sia, tan ha'u kalu'a lakon lia uluk nia sia ti'an. 14 Ha'u kalai kaka'as aan to'o marak rohan, nebee ketan saseban. Ha'ukaan saseban nia, mak Na'i Maromak atu simu ha'u iha lale'an tan fiar baa Yesus Kristus.
15 Ha'u kusu baa emi hotu-hotu mak moris hodi abut biit iha Kristus ti'an, nebee emi bele neon ida ho lia ne'e sia. Kalo noo ema ida nanoin seluk, habusik Na'i Maromak natudu dalan bodik nia. 16 Mais malorek ti'an na'ak, ita musti kaer metin hanorin hotu-hotu mak Na'i Maromak nanorin baa ita ti'an.
17 Mamaluk sia! Emi musti haninu ha'ukaan moris lala'ok. Emi balu moris nu'u ha'u ti'an. Dadi, emi mak sei dauk, bele haninu hosi sia mak moris nu'u ha'u ti'an.b 18 Mais keta haninu baa ema mak sakar Kristus, tan sia la simu Niakaan mate iha ai karuus. Ha'u kfoo katene baa emi dala ida ti'an nosi ema mak ilas nu'u sia. Oras ne'e ha'u kfoo katene tenik kodi luun turu. 19 Nosi ikus, Na'i Maromak atu dudu sai sia, soe baa ha'i naraka, tan sia la talin malu no Nia. Sia kaer loos lia aat sia, nodi buka dalan atu nabosu aan du'uk, to'o neon boot nodi siakaan a'aat nia sia. Sia la moe nanoin raiklaran beer.
20 Keta tuir sia, mais tuir ami. Ita tama ti'an dadi baa Na'i Maromak oan sia. Ita moos hoo beran tama renu lale'an ti'an, hodi hein itakaan Ulun Yesus Kristus. Nosi ikus, Nia namaan aan mai nosi lale'an atu sori ita nosi Na'i Maromak hahibun. 21 Nia moos atu seluk itakaan isin mak natene kole no mate ne'e, nodi isin foun mak la mate, hanesan Niakaan isin mak maka'as nia. Nia seluk nodi Niakaan beran boot. Nia moos atu nodi beran nia, to'o nalo hotu-hotu iha nabee dei lo'u-sudur baa Nia.