Efesus 3

Paulus nodi Lia Di'ak baa ema mak lahoos Yahudi

Na'i Maromak nakara nebee emi klubun lahoos Yahudi sia moos bele dadi baa Niakaan ema. Tan nia, Nia solok ha'u, Paulus ne'e, atu katak lia Yesus Kristus baa emi. Oras ne'e, ha'u kdadi baa ema bui ti'an tan kala'ok serwisu nia. 2 Emi hatene ti'an ha'ak, Na'i Maromak solok ha'u, tan nakara natudu laran di'ak baa emi mak lahoos Yahudi sia. 3 Tebes. Uluk, Na'i Maromak la nalore dauk nosi lia mak Nia nakotu ti'an bodik ema lahoos Yahudi. Mais oras ne'e, Nia nalore ti'an lia nia baa ha'u. Lia nia mak ohin ha'u kakerek babadak baa emi ti'an. 4 Kalo emi leno hotu ha'ukaan hakerek ne'e ti'an, emi bele hatene malorek Na'i Maromak hakaran nosi lia Yesus Kristus mak Nia nalore ti'an baa ha'u. 5 Uluk aan, ema raiklaran sei la natene Niakaan hakaran dauk. Mais oras ne'e, Nia nodi Kmalar Lulik atu nalore Niakaan hakaran nia baa Niakaan mako'an no klosan sia ti'an. 6 Niakaan hakaran nune'e: Kalo ema mak lahoos Yahudi fiar baa Yesus Kristus Niakaan Lia Di'ak, sia moos bele dadi Na'i Maromak eman namutuk no ema Yahudi sia. Ne'e na'ak, oras ne'e ita hotu-hotu dadi klubun ida ti'an no simu bele-bele matak-malirin hosi itakaan Ama Maromak.

7 Tan Na'i Maromak hakaran nia, Nia natudu laran di'ak nodi boi ha'u kdadi baa Niakaan ain-liman. Nia latan beran baa ha'u kodi kala'ok Niakaan serwisu. 8 Nosi Na'i Maromak eman hotu-hotu, ha'u ne'e mak la folin basuk. Masik nunia moos, Nia sei boi ha'u atu kalore Lia Di'ak baa ema lahoos Yahudi sia, nebee sia moos bele natene Kristus laran di'ak mak maka'as kaliuk. 9 Hori Na'i Maromak nase'i raiklaran ne'e, Niakaan hakaran atu solok Kristus mai nia, sei lia subar. Mais oras ne'e, Nia nakara naroma ema hotu-hotu neon nebee sia bele natene Niakaan hakaran nia. 10 Nia moos beer nodi Niakaan ema mak dadi klubun mesak ida nia, atu natudu Niakaan matenek kaliuk baa makaer ukun no makaer beran hotu-hotu iha kroman no iha kukun. 11 Baa oras Nia sei la nase'i raiklaran dauk, Nia nakotu kedan ti'an atu sori ema raiklaran. Hotu, Nia nato'o lia nia nodi itakaan Na'in, Yesus Kristus. 12 Tan lia nia, ita mak fiar ti'an baa Yesus Kristus lalika hata'uk ona mai dale ho Na'i Maromak. Tan Nia nanis simu ita.

13 Mamaluk sia! Ha'u ketan susar oras ne'e tan kaliku emi mak lahoos Yahudi sia. Mais keta haneo resik! Masik ha'u katiu susar ne'e, emi mak simu niakaan dadi'ak.

Paulus namulak tenik bodik ema Efesus sia

14 Kalo ha'u kanoin kola Na'i Maromak laran di'ak mak maka'as kaliuk nia, ha'u kakni'a kodi sera dodan baa Nia. 15 Nia mak Ama bodik famili hotu-hotu iha lale'an no raiklaran.

16 Ha'u kakro'an, nebee Nia natuun matak-malirin wa'in boot baa emi, tuir Niakaan kabaas.

Nebee, Niakaan Kmalar nakbiit emikaan neon nodi Niakaan beran boot,

17 to'o Yesus Kristus moris nafati iha emikaan neon, tan emi fiar baa Nia nohuun.

Nebee, emi moris talin malu ho Niakaan dadomin, to'o dadomin nia nahabut iha emikaan neon.^a

18-19 Nebee, emi ho Kristus eman hotu-hotu bele hatene di'a-di'ak Niakaan dadomin. Ema raiklaran la bele sukat nola Niakaan dadomin nia. Tan dadomin nia, boot kaliuk, luan kaliuk, le'an kaliuk, no wa'in kaliuk!

Nebee, Niakaan dadomin nakonu nola emikaan neon no laran, to'o sesu sai lia aat hotu-hotu.^b

20 Na'i Maromak beran mak Nia nodi serwisu iha itakaan neon no laran, maka'as kaliuk. Nia bele nodi beran nia nalo liu tan tenik nosi lia hotu-hotu mak ita husu no ita hanoin. 21 Tan lia nia, ita mak Yesus Kristus eman musti foti-hahaas Na'i Maromak naran hori nima-nimak to'o nima-nimak. Tebes!