Kristus eman sia musti moris neon ida, hanesan isin lolon mesak ida
4
Ha'u ktama bui ti'an tan kala'o ha'ukaan Na'in Niakaan serwisu. Oras ne'e, ha'u kfoo lia tate'an nebee emi bele hatene oin nunabee ita musti moris tuir Na'i Maromak beer, tan Nia mak bolu ita dadi baa Niakaan ema. 2 Ita musti moris haraik aan, no moris furak baa malu. Ita musti heti neon hodi haduni malu. Kalo ema ida buka lia no ita, ita keta rai hirus.a 3 Ita harui aan maka'as nebee moris dame malu, tan Kmalar Lulik kesi libur ita ti'an. 4 Hodi nunia, ita hotu-hotu dadi mesak ida hanesan Kristus isin lolon du'uk. Ita hotu-hotu simu Kmalar Lulik mesak ida. Ita hotu-hotu moos haloon baa Maromak mesak ida, tan Nia mak bolu ita hotu-hotu dadi baa Niakaan ema.5 Itakaan Na'in, mesak ida.
Ita fiar baa dalan mesak ida,
nebee ita bele kre'is ho Nia.
Ita simu sarani mesak ida,
nebee ita bele talin malu ho Nia.
6 Maromak, mesak ida.
Nia mak Ama bodik ita hotu-hotu.
Nia mak ukun ita hotu-hotu.
Nia namutuk no ita hotu-hotu.
Nia moris iha itakaan neon hotu-hotu.
Kristus foo babelen oi-oik baa Niakaan ema sia atu nodi tulun malu
7 Tebes. Ita mesak ida. Mais Yesus Kristus foo babelen oi-oik baa ita, nebee ita ida-idak hala'o serwisu bodik Nia. 8 Hakerek Moon na'ak,
“Nia sa'e baa fatin aas atu natuda iha nia,
to'o natoba nola funu.
Hotu, Nia nodi nikar ema bui lear mai.
Nia moos foo fafa'ek baa ema raiklaran sia.”b
9 (Hanoin lia fuan ne'e sia mak na'ak “Nia sa'e”. Kalo Nia sa'e, ne'e na'ak, uluk Nia tuun ti'an iha raiklaran. 10 Ema mak sa'e nia, mak Kristus. Nia tuun mai raiklaran, hotu sa'e nikar baa lale'an atu babilan hotu-hotu iha lale'an no raiklaran.) 11 Nia latan beran baa Niakaan ema, nebee sia nodi nala'o Niakaan serwisu. Balu dadi Niakaan klosan, balu dadi mako'an mak nato'o Niakaan mamenon, balu dadi makbalin bodik Niakaan ema, balu dadi manorik, balu tenik dadi makbukar mak nodi Lia Di'ak baa fatin foun sia. 12 Nia latan beran ne'e sia, nebee hodi hakbiit Kristus eman sia, nebee sia hotu-hotu bele nala'o Niakaan serwisu. Hodi nunia, ita hotu-hotu mak fiar Yesus Kristus bele hetak biit, 13-14 to'o ita fiar neon ida hodi hatene tebe-tebes Na'i Maromak Oan. Ita la nu'u karau tuu inun ona, mak dada baa nabee dei, nia tu-tuir. Ita moos la hanesan lawarik ona, mak maus kona be'ur. Tan lia nia, kalo tolek teen sia mai be'ur ita nodi hanorin la loos, ita la kona be'ur ona. 15 Mais ita musti kaer hanorin loos hodi hadomi ema. Hodi nunia, ita hetak biit, tan ita hanono baa Kristus mak itakaan ulun. 16 Ita hanesan Niakaan isin lolon. Kalo ema ida liman no ain, ibun no inun serwisu tulun malu tuir ida-idak niakaan serwisu, ema nia isin lolon hetak biit. Nunia moos Kristus eman sia. Kalo ita hadomi malu no tulun malu, ita moos hetak biit.c
Kristus eman musti moris tuir dalan foun
17 Rona di'a-di'ak saa mak ha'u kdale ne'e, tan ha'ukaan Na'in du'uk mak katak baa ha'u. Ita la bele moris hanesan ema mak la natene Maromak, tan sia moris tuir siakaan momok dei. 18 Siakaan kakutak naktomak to'o sia se'i kotuk baa Maromak. Sia ulun fatuk no la no'uk titu baa Nia. 19 Sia tuir beer du'uk, to'o moris sasobo. Masik nunia moos, sia la natene moe.
20 Hanorin nosi Kristus mak emi simu hori hirak nia, lahoos nunia. 21 Emi rona lia Yesus ti'an no hatene Niakaan hanorin loos. 22 Hanorin nia na'ak, ita musti la'o hela itakaan moris dalan tuan ona. Tan kalo ita moris sasobo tuir ema raiklaran beer, ita kona be'ur to'o itakaan moris dodok.d 23 Di'ak liu, ita foo leet baa Na'i Maromak nafou itakaan neon no kakutak, 24 nebee ita dadi ema foun tuir Niakaan ilas. Hodi nunia, ita bele moris moos no loos.e
25 Tan lia nia, hanawa haktolek ona. Dale lia loos ho malu, tan ita hotu-hotu talin malu dadi mesak ti'an, nu'u ema ida ain no liman, ibun no inun, matan no tilun, hotu-hotu talin malu dadi mesak baa isin lolon ida.f 26 Kalo nawan sa'e, keta to'o halo sala. Lalika nawan sa'e to'o loro monu! Musti lai-lais di'ak ho malu.g 27 Hodi nunia, diabu ulun la netan leet atu sokur ita. 28 Ema na'ok, hanawa ona! Di'ak liu, serwisu di'a-di'ak hodi liman du'uk, nebee bele fa'e serwisu isin baa ema susar sia. 29 Keta dale lia aat. Masik lia fuan ida dei moos, keta kedas! Di'ak liu, dale lia mak tulun ema no nakbiit siakaan neon. 30 Keta hasusar Kmalar Lulik. Nia nein iha itakaan neon nodi marak ita dadi Na'i Maromak eman. Hodi nunia, ita bele hatene kedan ha'ak, baa oras rai falu fila, Na'i Maromak simu ita atu moris nima-nimak ho Nia. 31 Dadi, keta hirus malu. Keta ruun ne'an baa malu. Keta nawan sa'e baa malu! Keta hakaat malu! Keta dale hahaat malu. No keta halo lia aat seluk sia! 32 Di'ak liu, ita hadomi malu, hodi halo lia di'ak baa malu. Ita musti halu'a lakon ema salan hodi foo pardua baa sia, hanesan Na'i Maromak moos nalu'a lakon itakaan salan nodi foo pardua baa ita.h