Ema mak fiar baa Kristus simu moris foun
2
Uluk, Na'i Maromak nafoli emi hanesan ema mak mate ti'an, tan emi hakur Niakaan ukun hodi halo sala oi-oik. 2 Emi moris tuir raiklaran beer no tuir diabu ulun beer. To'o oras ne'e moos, diabu ulun sei namaus bei-beik ema raiklaran nebee sia sakar Na'i Maromak. 3 Uluk, ita hotu-hotu moris nunia. Ita moris tuir itakaan beer du'uk hodi halo tuir a'aat hotu-hotu iha itakaan neon laran. Itakaan huun, ema maksalan. Na'i Maromak nahibu ita no ema hotu-hotu. 4-5 Nia nafoli ita ema mak mate ti'an. Masik nunia moos, Nia neon monu baa ita, tan nadomi ita liu basuk. Hotu, Nia natudu laran di'ak nodi solok Yesus Kristus mai atu foo moris foun baa ita. Ne'e na'ak, ita hetan moris tan Na'i Maromak laran di'ak.a 6 Yesus Kristus mate, mais Na'i Maromak nalo Nia moris nikar. Hotu, Na'i Maromak foti sa'e Nia kaer ukun iha lale'an. Oras ne'e, Na'i Maromak moos nalo nunia baa ita. Nia foo moris foun baa ita, no foti sa'e ita kaer ukun hamutuk ho Yesus Kristus iha lale'an. 7 Na'i Maromak nalo nunia, nebee Nia bele natudu nima-nimak dadomin no Niakaan laran di'ak mak maka'as basuk bodik ita mak fiar baa Yesus Kristus. 8-9 Ita hetan moris tan Na'i Maromak laran di'ak, lahoos tan itakaan hahalok di'ak. Ita hetan, tan Na'i Maromak foo loos baa ita. Tan lia nia, la noo ema ida mak bele ibun boot na'ak, "Na'i Maromak sori ha'u, tan ha'ukaan hahalok di'ak." 10 Na'i Maromak foo moris baa ita, tan ita talin malu ti'an ho Yesus Kristus. Nia nalo nunia, tan nase'i ita nebee ita halo lia di'ak hotu-hotu mak Nia nakotu kedan hori uluk bodik ita.Na'i Maromak simu ema nosi klubun hotu-hotu
11 Mamaluk Efesus sia. Masik emi lahoos ema Yahudi, emi hatene ti'an ha'ak, ema Yahudi sia kaer metin siakaan ukun-badu hamane aan. Sia titu naraik emi tan emi la tuir siakaan ukun-badu nia. Mais tuir loos, ukun-badu nia, lia isin lolon dei, lahoos lia neon laran. 12 Oras emi sei la fiar dauk baa Yesus Kristus, emi la bele dadi Na'i Maromak eman, tan emi la tama iha Niakaan mamenon mak uluk Nia namate no no amikaan bei Abraham. Emi hein iha raiklaran ne'e, mais la bele haloon baa Na'i Maromak tan emi, ema matak 13 mak moris salin hosi Nia. Mais oras ne'e, Yesus Kristus loke dalan ti'an, nebee emi bele talin malu ho Na'i Maromak. Yesus Kristus mate nalo Na'i Maromak laran malirin, nebee emi bele dame ho Na'i Maromak no dadi baa Niakaan ema.
14 Uluk, ami klubun Yahudi la moris di'a-di'ak malu ho emi klubun seluk sia, hanesan noo kadidin fatuk sasa fa'e ita. Mais Yesus Kristus mate nodi sobu nahaat kadidin nia ti'an. Tan lia nia, ita mak uluk funu malu, bele dame malu dadi ema klubun mesak ida ona. 15 Uluk, ami klubun Yahudi halo tuir Ukun-badu Musa nebee ami bele di'a-di'ak ho Na'i Maromak. Mais oras Yesus Kristus mate, Nia natuka ti'an dalan tuan nia, nodi loke dalan foun, nebee ema nosi klubun Yahudi no klubun seluk sia moos bele di'a-di'ak no Na'i Maromak. Hodi nunia, ita hotu-hotu talin malu dadi baa klubun foun ida mak moris dame malu.b 16 Nodi mate baa ai karuus, Kristus no'as lakon lia hotu-hotu mak nalo ita funu malu. Hodi nunia, klubun rua mak uluk funu malu nia, dadi klubun mesak ida. Nia moos nalo klubun mesak nia di'a-di'ak nikar no Na'i Maromak.c 17 Nia namaan aan mai raiklaran ne'e nodi Manfatin Di'ak baa ami klubun Yahudi mak hatene Maromak ti'an, no emi klubun seluk sia mak sei la natene Nia dauk. Kristus foo natene baa ita na'ak, “Uluk, emi moris funu malu. Mais oras ne'e, Ha'u kloke dalan ti'an nebee emi bele moris dame malu.”d 18 Ne'e na'ak, Kristus loke dalan ti'an nebee ami klubun Yahudi ho emi klubun seluk sia bele moris kre'is ho Ama Maromak, tan Kmalar Lulik natudu dalan mesak ida nia bodik ita.
Kristus eman hanesan uma hamulak ida
19 Tan Yesus Kristus loke dalan nunia ti'an, emi mak lahoos Yahudi sia, la dadi ema matak ona. Oras ne'e, emi dadi ti'an baa Na'i Maromak renun no Niakaan ema uma laran. 20 Knaninuk, hanesan Na'i Maromak nakara nariik uma ida. Dala uluk, Nia tau fatuk tatuur. Fatuk tatuur nia, mak Yesus Kristus. Dala rua, Nia nariik uma riin. Uma riin nia, mak Niakaan mako'an no klosan sia. Dala tolu, Nia nada fatuk sia. Fatuk hada nia sia, mak ita, Na'i Maromak eman. 21 Uma nia bele nariik metin, tan fatuk sia nada aan baa malu di'a-di'ak iha fatuk tatuur leten. Uma nia hetak kleur, hetak boot, to'o dadi fatik lulik bodik ema namulak baa Na'i Maromak. 22 Oras ne'e, emi mak lahoos Yahudi sia moos, Na'i Maromak nalo emi dadi hanesan fatuk hada. Nia nada namutuk ita hotu-hotu dadi Kmalar Lulik hein fatin.