Lia tulun malu
6
Mamaluk sia! Kalo mamaluk makfiar ida nalo sala, ita mak hatene tebe-tebes Kmalar Lulik beer, musti baa dale mamamar ho nia, hodi nia mai, nebee tuir nikar Na'i Maromak dalan loos. Mais ita musti daka aan, nebee ita keta monu baa niakaan salan nia. 2 Kalo mamaluk ida netan susar, ita musti tulun nia. Hodi nunia, ita halo tuir Kristus ukun. 3 Mais kalo ema ida na'ak, nia maka'as liu niakaan mamaluk sia, mais tuir loos la nunia, nia tolek aan du'uk. 4 Ita ida-idak musti leno itakaan hahalok du'uk ha'ak, di'ak ka lale. Kalo di'ak, ita bele neon boot, mais keta hanesa itakaan hahalok nia baa ema seluk siakaan hahalok, 5 tan nosi ikus ita ida-idak musti hataa du'uk itakaan hahalok. 6 Ita moos musti fa'e itakaan serwisu folin, hodi tulun ema mak nanorin Maromak Manfatin baa ita.7 Hanoin, tan Na'i Maromak natene lia hotu-hotu. Dadi, keta haktolek ho Nia, tan ne'e na'ak, ita tolek aan du'uk. Saa mak ita kuda, nia mak ita ku'u. 8 Kalo ita halo aat tuir itakaan beer du'uk, ita hetan moris dodok. Mais kalo ita halo lia di'ak tuir Kmalar Lulik beer, ita hetan moris loos to'o nima-nimak. 9 Keta baruk halo lia di'ak sia, tan kona baa niakaan oras, ita moos hetan hikar lia di'ak, surak ita haterus aan. 10 Dadi, kalo noo leet, halo kedan lia di'ak bodik ema hotu-hotu, kaliuk, halo bodik itakaan mamaluk makfiar sia.
Paulus narohan niakaan hakerek baa ema sarani sia iha Galatia
11 Lia rohan ne'e, ha'u mak kakerek kodi ha'ukaan liman du'uk. Emi bele haree du'uk ha'u kakerek kalo bo-boot. 12 Hanoin! Maktolek teen nia sia moos fiar baa Yesus Kristus mak mate iha ai karuus. Mais sia mai seten emi nebee hamane aan, tan sia nata'uk ema Yahudi seluk atu nasusar sia kalo sia nanorin na'ak, ema lalika namane aan tuir ukun-badu Yahudi. Tan lia nia, sia setar oin baa ema Yahudi mak kaer metin siakaan ukun-badu. 13 Masik sia du'uk namane aan ti'an moos, sia la tuir mohu Ukun-badu Musa. Sia nakara emi hamane aan, nebee emi dadi baa siakaan ema. Hodi nunia, siakaan klibur atu foti-nahaas sia.
14 Mais ha'u kbeer foti-kahaas itakaan Ulun Yesus Kristus dei. Nia mate iha ai karuus, nebee nalakon mohu lia aat sia mak ema nalo tuir raiklaran beer. Tan lia nia, ha'u la kanoin tenik raiklaran beer. 15 Hamane aan ka, la hamane aan ka, lia nia la noo folin. Lia mak noo folin, mak ne'e: ita simu ti'an moris foun hosi Na'i Maromak. 16 Ha'u kaloon nebee Nia natudu Niakaan dadomin baa ema hotu-hotu mak tuir ha'ukaan hanorin ne'e, to'o sia bele moris manek no dame. Tan sia dadi ti'an baa Na'i Maromak klubun foun.
17 Ha'u kaloon nebee ema keta mai nasusar tenik ha'u nodi lia ne'e. Ha'ukaan isin noo kanek fitar ti'an, tan ha'u kaliku Yesus Kristus.
18 Mamaluk sia! Ha'u kaloon nebee itakaan Na'in Yesus Kristus natudu laran di'ak baa emi hotu-hotu.
Nunia dei!
Tabe nosi ha'u,
Paulus