Ita hakbois hosi Ukun-badu tan Kristus sori ita ti'an
5
Uluk, ami ema Yahudi hatiu todan Ukun-badu nosi Musa. Mais oras ne'e, Kristus foti nola todan nia ti'an nosi ami, tan ami fiar baa Nia. Ne'e na'ak, ami hakbois ti'an. Dadi, emi keta kona be'ur to'o hana'i hikar baa Ukun-badu nia hanesan ata!2 Rona! Ha'u ne'e Paulus, mak dale ne'e. Kalo emi hamane aan tuir ukun-badu Yahudi nebee Na'i Maromak simu emi, ne'e na'ak Kristus mate la noo folin ona. 3 Tebes. Ha'u katak ti'an ka'ak, kalo ema tuir Ukun-badu namane aan, ema nia moos musti nalo tuir mohu Ukun-badu nia sia. 4 Ema mak nala'ok Ukun-badu nebee Na'i Maromak simu nia, ema nia moris salin aan ti'an nosi Kristus nodi dudu fila Na'i Maromak laran di'ak. 5 Mais tan ita fiar baa Yesus Kristus, Kmalar Lulik moris iha itakaan neon. Hodi nu'unia, ita bele haloon baa Na'i Maromak nebee Nia nafoli ita na'ak ema loos. 6 Dadi, ita hamane aan ka, la hamane aan ka, lia nia la noo folin ona. Lia mak noo folin mak ne'e: ita fiar baa Kristus no hadomi ema seluk.
7 Uluk, emi moris tuir hanorin loos. Mais oras ne'e, see mak tolek nola emi ti'an, to'o la tuir hanorin loos ona? 8 Hanorin tolek mak emi rona nia, la mai nosi Na'i Maromak mak bolu emi atu dadi baa Niakaan ema. 9 Hanoin, tan kleu-leur hanorin tolek nia bele nahaat ema wa'in kakutak, hanesan tua teen oan ida nasa'e naboot tubi.a 10 Mais tan Yesus Kristus mak itakaan Ulun, ha'u kfiar ka'ak, Nia atu nalo emi fiar hikar baa hanorin uluk mak ha'u kanorin baa emi nia. Ha'u moos fiar ka'ak, Na'i Maromak du'uk mak kastikar maktolek teen mak nahaat emikaan fiar.
11 Nune'e, mamaluk sia! Noo ema mak katak na'ak, ha'u kanorin ema nebee namane aan tuir ukun-badu Yahudi. Lia nia la loos. Kalo ha'u kanorin nunia, nanis ema Yahudi sia la sakar ha'u. Mais tan ha'u kanorin ka'ak, Yesus mate iha ai karuus atu sori ema, lia ne'e mak nalo sia sakar ha'u. 12 Ema mak nabenar emi nosi lia hamane aan, habusik sia ku'it du'uk aan!
13 Mamaluk sia! Na'i Maromak bolu emi, nebee emi moris hakbois hosi ukun-badu hakaran. Mais keta tan hakbois ti'an, emi moris tuir emikaan hakaran du'uk! Keta! Emi musti moris hadomi malu hodi haliku malu, nu'u ata naliku na'in. 14 Hakerek Moon na'ak, “Musti hadomi ema seluk, oin nudaar hadomi isin lolon du'uk.” Kalo halo tuir ukun-badu ida ne'e, emi hala'o ti'an ukun-badu hakaran hotu-hotu.b 15 Mais kalo emi hakaat malu, lale, rakut malu, emi lei haree dei! Nosi ikus, emi hadodok emikaan isin lolon du'uk.
Raiklaran beer la kona malu no Kmalar Lulik beer
16 Ha'u katak nune'e: Kalo ita moris tuir Kmalar Lulik beer, ita la tuir tenik raiklaran beer, 17 tan raiklaran beer sakar Kmalar Lulik beer. Kmalar Lulik beer moos sakar raiklaran beer. Dadi, kalo ita halo tuir ida ti'an, ita musti halu'a ida.c 18 Kalo Kmalar Lulik babilan ita ti'an, ita lalika hana'i baa ukun-badu ona.
19 Kalo ita halo tuir raiklaran beer, itakaan hahalok aat malorek nune'e: ita halo lia kfoer, ita halo hahalok kadoor, ita la moe halo hahalok aat, 20 ita lo'u baa ai'oi lulik sia, ita buan manas, ita funu malu, ita toe malu, ita laran moras baa ema mak liu ita, ita krakat, ita neon toos, ita sasuku ema, ita tokar lauk, 21 ita tinu aat, ita lanu aat bele-bele to'o la hatene aan, no ita halo sala seluk sia. Hori uluk, ha'u katak baa emi ti'an ka'ak, kalo ita halo nunia, ita la bele dadi Na'i Maromak eman.
22 Mais, kalo ita moris tuir Kmalar Lulik beer, itakaan hahalok nune'e: ita hadomi ema, ita neon boot, ita hakara dame, ita heti neon, ita laran di'ak, ita tulun ema, ita kaer mamenon, 23 ita halo hahalok mamar, no ita daka aan di'a-di'ak. La noo ukun-badu ida kois mak badu lia ne'e sia. 24 Kalo ita dadi ti'an baa Yesus Kristus eman, ita la tuir tenik raiklaran beer ona, tan itakaan a'aat sia hedi mate ti'an baa ai karuus hamutuk ho Yesus. 25 Kmalar Lulik foo moris foun baa ita ti'an, dadi ita musti halo tuir Niakaan beer nohuun. 26 Ne'e na'ak, ita keta rotus kneter, keta sakar malu, no keta hirus ema.