4
Ha'u kfoo knaninuk ida tenik. Oan bele simu bein sasoin nosi aman kalo aman mate ti'an. Mais kalo oras aman mate oan nia sei ki'ik, nia la bele simu dauk bein sasoin nia. Nia hanesan ata mak la bele nola na'in sasoin. 2 Tan oan nia sei ki'ik, musti noo ema mak naliku nia no babilan niakaan bein sasoin. Nia musti tuir malikuk hakaran, to'o oras mak aman nakotu nela ti'an, foin nia bele simu bein sasoin nia. 3 Ita moos nunia. Oras Yesus Kristus sei la mai dauk, ita sei nu'u lawarik nia. Ita sei tatalik mate ho raiklaran beer, hanesan ata. 4-5 Mais oras mak Na'i Maromak nakotu to'o mai ti'an, Nia solok Niakaan Oan mai atu dadi ema raiklaran, nebee ema raiklaran moos bele dadi baa Na'i Maromak oan. Baa oras Na'i Maromak Oan Yesus Kristus moris iha raiklaran, Nia moris tuir Ukun-badu Musa, nebee Nia bele nasori ema hotu-hotu mak tatalik no Ukun-badu nia.6 Tan ita dadi Na'i Maromak oan ti'an, Nia solok Oan Yesus Kristus Kmalar mai tama baa itakaan neon. Kmalar nia nanorin ita nebee ita bele bolu no bele temi Na'i Maromak ha'ak, “Ama”. 7 Ne'e na'ak, ita bele simu sasoin hotu-hotu mak Nia nameno ti'an, tan ita dadi baa Niakaan oan ti'an. Ita la nu'u ata ona mak la bele simu bein sasoin.a
Paulus neo-neon baa ema Galatia sia
8 Uluk, baa oras emi sei la hatene Na'i Maromak dauk, emi halo aan nu'u ata hodi lo'u-sudur baa buat mak lahoos Maromak. 9 Mais oras ne'e emi hatene Na'i Maromak ti'an. (Di'ak kaliuk kalo ha'u ka'ak, Na'i Maromak mak natene emi.) Dadi nunabee emi sei hakara lo'u-sudur hikar baa buat mak la noo folin no la noo beran? Emi hakara hana'i baa buat nia sia to'o dadi ata tenik ka? 10 Mamaluk sia! Ha'u krona ti'an emi hadahur hikar loron lulik nu'u fulan foun, loro falin, no tinan foun. Tan saa emi halo nunia? Hahalok nunia la noo folin. 11 Ha'u kneo-neon rona lia nia sia! Keta arumak ha'ukaan kolen kanorin emi nia, butan dei.
12 Mamaluk sia! Ha'u kbeer basuk nebee emi moris tuir ha'ukaan moris lala'ok. Masik ha'u du'uk ema Yahudi, mais ha'u kabusik kela ti'an ukun-badu Yahudi nia sia, nebee ha'u kmoris nu'u ema mak lahoos Yahudi. Hanoin hori hirak nia baa oras ha'u kmai baa emi, emi simu ha'u di'a-di'ak. 13 Oras ha'u kmai uluk fohon atu katak Lia Di'ak baa emi nia, ha'ukaan isin la biit. 14 Masik nunia moos, emi la dudu fila ha'u, mais emi simu ha'u nu'u ha'u ne'e, Na'i Maromak Niakaan makbukar lale'an ida. Liu tan tenik, emi simu ha'u nu'u ha'u ne'e, Yesus Kristus. 15 Baa oras nia, ita neon di'ak bele-bele. Mais tan saa, oras ne'e emi la nunia ona? Oras nia, emi hadomi ha'u tebes, to'o emi hakara sukit hola emikaan matan fuan, foo baa ha'u. 16 Oras ne'e, ha'u kmusti dale maka'as baa emi kodi katak tenik hanorin loos baa emi. Mais emi keta ha'ak ha'u kfunu emi. Lale.
17 Maktolek teen nia sia madinas nola emikaan neon, nebee emi tuir ukun-badu Yahudi hotu-hotu. Sia la no'uk ha'u kamalu emi, tan sia nakara emi halau aan tuir sia dei. 18 Kalo ema nakara madinas, madinas halo lia di'ak! Mais keta madinas iha ha'ukaan oin dei!
19 Mamaluk sia! Ha'u kadomi emi hanesan ha'ukaan oan du'uk. Kalo ha'u kanoin kola emi, ha'ukaan neon susar basuk, hanesan feto mak noran moras nahoris. Ha'u katerus aan susar nunia, to'o emikaan neon dadi nu'u Kristus neon. 20 Ha'u kbeer basuk kasoru du'uk emi, nebee ha'u lalika dale maka'as nune'e ona, tan ha'u la katene atu dale saa tenik.
Paulus foo lia hatetek nosi Hagar oan no Sara oan
21 Kalo emi hakara moris tuir ukun-badu Yahudi, di'ak liu emi hatene uluk ukun-badu lala'ok. 22 Iha Hakerek Moon noo lia nosi ema Yahudi siakaan bei Abraham oan mane na'in rua. Nia netan oan ida nosi atan, ida tenik nosi feen.b 23 Ata nia nahoris oan, tan tuir ema raiklaran beer. Mais feen nahoris oan, tan Na'i Maromak nameno kedan nunia baa Abraham.
24 Feto na'in rua nia dadi lia hatetek nodi natudu mamenon oik rua mak Na'i Maromak nodi namate menon no ema raiklaran. Mamenon ida, Nia namate no klubun Isra'el baa oras natuun Ukun-badu baa Musa iha foho Sinai. Tan klubun Isra'el tatalik aan baa Ukun-badu nia, sia dadi ata hanesan Hagar. 25 Foho Sinai iha rai Arab nia, hanesan Hagar. Ema kota Yerusalem oras ne'e mak sei tatalik aan baa Ukun-badu nia moos, sia hanesan Hagar.
26 Mais mamenon ida tenik natudu kota Yerusalem foun iha lale'an. Na'i Maromak eman mak nein iha nia lahoos ata, tan sia la tatalik aan baa Ukun-badu. Sia hanesan amikaan inan Sara, mak Abraham feen. 27 Hakerek Moon na'ak:
“Hei! Feto mak la noo oan!
Neon boot baa ona!
Hei! Feto mak la noran moras nahoris!
Mananu modi neon di'ak baa ona!
Feto mak laran dodok tan la'en la mana nia ona,c
nia atu netan oan wa'in, liu nosi feto mak la'en mana.”d
28 Nune'e mamaluk sia! Ita dadi Na'i Maromak oan tuir Niakaan mamenon. Ita hanesan Isak mak Abraham nahoris, tan tuir Na'i Maromak mamenon. 29 Ata oan mak moris tuir ema raiklaran beer nia, oras boot mai, nia nasusar Isak mak moris tuir Kmalar Lulik beer. Lia nia moos manesak no saa mak dadi baa oras ne'e.e 30 Hakerek Moon na'ak, “Halatu sai ata nia no oan, tan ata oan la bele simu bein sasoin. Feen oan dei mak bele simu sasoin nia.”f
31 Nune'e, mamaluk sia! Ita ne'e lahoos ata oan, tan ita la tatalik aan ho Ukun-badu Yahudi. Ita hanesan oan hosi Abraham feen, tan ita fiar baa Yesus Kristus.