Na'i Maromak simu ita tan fiar baa Yesus Kristus
3
Hei, ema Galatia sia! Uluk ha'u katak kalore ti'an iha emikaan oin lia nosi Yesus Kristus mate iha ai karuus. Mais oras ne'e, ema be'ur nola emi ti'an! Emi ne'e, momok tebes! 2 Ha'u atu kusu lia ida baa emi nune'e: emi simu Maromak Kmalar Lulik tan emi halo tuir ukun-badu Yahudi ka? Lale! Niakaan Kmalar Lulik mai baa emi tan emi fiar Lia Di'ak mak emi rona hola nia. 3 Dadi tan saa emi momok basuk nunia? Uluk, emi moris tuir Kmalar Lulik beer. Mais oras ne'e, emi hakfilas hodi moris tuir ema raiklaran beer. 4 Hanoin! Baa oras emi foin hahuu fiar baa Kristus, emi kona tonan wa'in boot. Keta to'o emikaan susar tan fiar Kristus nia, la noo folin! 5 Na'i Maromak foo Niakaan Kmalar Lulik nodi natudu tadak blaar oi-oik iha emikaan oin. Nia nalo nunia tan emi tuir ukun-badu Yahudi ka? Lale! Nia nalo nunia tan emi fiar Lia Di'ak nosi Kristus mak emi rona hola nia.6 Hanoin baa ami ema Yahudi bei huun Abraham. Hakerek Moon na'ak, “Tan Abraham fiar baa Na'i Maromak, Na'i Maromak nafoli nia na'ak, ema loos.”a
7 Emi musti hatene di'a-di'ak lia ne'e: ema mak fiar nu'u Abraham, sia mak Abraham husar-binan.b c 8 Hori uluk Na'i Maromak nakara kedan atu simu ema lahoos Yahudi nosi klubun seluk sia. Nia moos nafoli sia na'ak ema loos, surak sia fiar baa Nia. Nia katak ti'an baa Abraham iha Hakerek Moon na'ak, “Tan o, ema klubun hotu-hotu iha raiklaran atu netan matak-malirin.”d 9 Ne'e na'ak, Na'i Maromak nameno atu natuun matak-malirin baa Abraham tan niakaan fiar. Nunia moos baa ema mak fiar baa Kristus. Sia moos netan matak-malirin bele-bele no Abraham.
10 Hakerek Moon na'ak, “Ema mak la tuir mohu Ukun-badu nosi Musa, kona kastikar!” Tan lia nia, ita hatene ha'ak, ema mak tuir Ukun-badu nebee Na'i Maromak simu nia, ema nia nanis kona kastikar, tan la noo ema ida moos mak bele tuir mohu Ukun-badu nia sia.e 11 Mais oras ne'e ita hatene malorek ti'an ha'ak, Na'i Maromak la simu ema tan nalo tuir Ukun-badu. Hakerek Moon na'ak, “Ema mak Na'i Maromak nafoli na'ak, ema loos, nia netan moris tan niakaan fiar. ”f
12 Kalo ita hakara nebee Na'i Maromak nafoli ita na'ak, ema loos, mais ita sei moris tuir Ukun-badu Musa hakaran, ne'e na'ak ita halau aan baa itakaan hahalok du'uk. Hakerek Moon na'ak, “Ema mak nakara moris tuir ukun-badu hakaran, ema nia nalau aan dei no ukun-badu nia sia.”g
13 Masik ita haka'as aan halo tuir Ukun-badu Musa moos, ita sei la bele halo tuir mohu. Tan baa nia, ita sei kona kastikar. Mais oras ne'e, ita hatene ha'ak Kristus selu nola itakaan kastikar nia ti'an. Hakerek Moon na'ak, “Ema mak mate hisa baa ai rii, ema nia kona kastikar nosi Na'i Maromak.” Ne'e na'ak, baa oras Kristus mate iha ai karuus, Nia selu nola ita no simu nola itakaan kastikar nosi Na'i Maromak.h 14 Hodi Yesus Kristus mate nunia, matak-malirin mak Na'i Maromak nameno foo baa Abraham, bele tuun baa ema klubun seluk sia. Tan lia nia, ema hotu-hotu mak fiar baa Kristus, bele simu Maromak Kmalar Lulik mak Nia nameno ti'an nia.
Na'i Maromak nato'o mamenon
15 Mamaluk sia! Oras ne'e ha'u kola knaninuk kosi itakaan moris loron-loron. Ema nalo hakerek bein sasoin nodi nameno nela kedan baa oan. Kalo nia teken niakaan naran baa hakerek nia ti'an, ne'e na'ak, malolok ti'an. Ema seluk la bele nalara no la bele tu'an sa-saa tenik. 16 Nunia moos, Na'i Maromak mamenon baa Abraham no niakaan husar-binan. Iha mamenon nia Na'i Maromak la dale na'ak, “Ha'u kamate menon ne'e ko okaan husar-binan sia” tan Nia la nameno baa husar-binan lear. Mais Nia nameno baa husar-binan na'in ida dei, mak Kristus.i 17 Lia nia nune'e: Na'i Maromak namate menon uluk fohon no Abraham. Tinan atus haat tolu nulu siku ti'an, Na'i Maromak moos natuun Ukun-badu baa ema Yahudi sia tuir siakaan Bei Musa. Masik nunia moos, Na'i Maromak la natuka Niakaan mamenon mak Nia namate ti'an no Abraham.j 18 Nia natuun matak-malirin baa Abraham, lahoos tan Abraham nalo tuir ukun-badu, mais tan Na'i Maromak nakara foo loos baa Abraham. Lia nia hanesan oa ida mak simu bein sasoin nosi aman. Oan simu tan aman nameno nela kedan, lahoos tan oan nalo tuir ukun-badu.k
19 Oras ne'e ha'u atu kusu nune'e: kalo Na'i Maromak simu Abraham tan niakaan fiar, tan saa Nia natuun tenik Ukun-badu baa Musa? Nia tu'an Ukun-badu nia sia atu nodi nanorin ema raiklaran nosi siakaan salan. Nia nakara nebee ema raiklaran moris tuir Ukun-badu nia to'o Abraham husar-binan ida mai. Husar-binan nia mak Kristus. Kalo Nia mai ti'an, Ukun-badu nia la folin ona.
Oras Na'i Maromak natuun Ukun-badu baa ema Yahudi sia, Nia la natuun du'uk. Mais Nia nodi Niakaan makbukar lale'an mai latan baa Musa liman, foin Musa nato'o baa ema Yahudi sia. Hodi nunia, Musa dadi ailalete bodik Na'i Maromak no Niakaan eman sia. 20 Mais baa oras Na'i Maromak namate menon no Abraham, Nia la nodi ailalete, Nia na'in mak nameno du'uk. Hodi nunia, ita hatene ha'ak, Na'i Maromak mamenon baa Abraham, folin kaliuk nosi Ukun-badu nia sia.
Ukun-badu nanorin ema nosi siakaan salan
21 Arumak emi haneo ha'ak, Ukun-badu Musa sakar Na'i Maromak mamenon ka? Lale! Kalo ema raiklaran bele nalo tuir ukun-badu nebee Na'i Maromak simu sia, nanis Ukun-badu Musa mak folin kaliuk. Mais tuir loos, la noo ukun-badu raiklaran ida moos mak ema bele nalo tuir nebee Na'i Maromak simu sia. 22 Hakerek Moon na'ak, ita hotu-hotu tatalik mate ho itakaan salan. Mais ita bele hetan matak-malirin mak Na'i Maromak nameno ti'an nia, surak ita fiar baa Yesus Kristus.
23 Oras Kristus sei la mai dauk, Ukun-badu neti-natoos ita, to'o ita la bele hakbois. Mais to'o baa niakaan oras, Na'i Maromak loke dalan nebee ita bele hakbois hosi Ukun-badu nia sia, surak ita fiar baa Yesus Kristus. 24-25 Ita bele hanesa Ukun-badu Musa nu'u ema makdaka ida mak lituk ita to'o Kristus mai naloos ita iha Na'i Maromak oin. Oras ne'e ita fiar baa Kristus ti'an, dadi makdaka nia lalika lituk ita ona.
Ema mak fiar, bele dadi baa Na'i Maromak eman
26 Oras ne'e, emi dadi baa Na'i Maromak oan ti'an, tan emi fiar baa Yesus Kristus. 27 Ema hotu-hotu mak netan sarani, talin malu metin no Kristus ti'an. 28 Ema mak fiar baa Kristus, masik ema Yahudi ka, lahoos Yahudi ka, ata ka, lahoos ata ka, feto ka, mane ka, sia hotu-hotu manesak iha Na'i Maromak oin, tan sia talin malu no Yesus Kristus. 29 Kristus nia, Abraham husar-binan. Tan emi talin malu ho Kristus ti'an, emi moos dadi baa Abraham husar-binan. Hodi nunia, emi bele simu matak-malirin mak Na'i Maromak nameno ti'an baa Abraham.l