Na'i Yesus klosan sia iha Yerusalem simu Paulus
2
Tinan sanulu resin haat siku, ha'u ko Barnabas fila kikar baa kota Yerusalem. Ami moos ho ema makfiar ida naran Titus. Nia lahoos ema Yahudi.a 2 Ami baa nebaa, tan Na'i Maromak mak naruka. To'o baa, ha'u katak kalore baa fukun sarani sia kosi Lia Di'ak mak ha'u kanorin ti'an baa ema lahoos Yahudi sia. Oras nia, ha'u kdale ko sia mesan, nebee sia bele tetu saa mak ha'u kanorin nia, loos ka, lale. Kalo sia nakotu na'ak la loos, ema bele dale na'ak, ha'ukaan serwisu nia butan.3 Mais, sia simu. Sia moos nakotu na'ak, masik Titus nia ema Yunani moos, nia lalika namane aan tuir ukun-badu Yahudi. 4 Mais noo ema na'in hira la simu nunia, tan sia nanorin seluk. Sia nia, mamaluk sarani, mais sia oin-kotuk. Sia tama no-nook iha amikaan klaran atu seten ema mak lahoos Yahudi, nebee tuir ukun-badu Yahudi. Tuir loos, ita la tatalik tenik ho ukun-badu nia sia ti'an. Ita lalika hana'i baa ukun-badu nia sia hanesan ata ona, tan Yesus Kristus sori ita ti'an. 5 Tan lia nia, ami la simu siakaan hanorin kale'uk nia. Emi bele fiar nohuun baa Lia Di'ak mak ha'u kanorin ti'an baa emi nia, tan hanorin nia mak tebes no loos.
6 Oras nia, fukun nia sia simu ha'ukaan hanorin nodi la tu'an sa-saa. Sia nia, ema nafoli na'ak, ema boot. Mais Na'i Maromak la fihir oin. Masik sia ema boot ka, ema ki'ik ka, la saa ida.b 7 Surak sia natebes na'ak, Na'i Maromak solok ha'u baa kodi Niakaan Lia Di'ak baa ema lahoos Yahudi, hanesan Nia moos solok Petrus nodi Niakaan Lia Di'ak baa ema Yahudi. 8 Na'i Maromak latan beran baa Petrus atu dadi klosan bodik ema Yahudi. Nunia moos, Nia latan beran baa ha'u atu kdadi klosan bodik ema lahoos Yahudi. 9 Oras nia, ema nafoli Yakobus, Petrus,c no Yohanis na'ak, sarani ulun. Baa oras sia na'in tolu natene nola na'ak, Na'i Maromak natudu ti'an laran di'ak baa ha'u, sia moos kaer liman no ami rua Barnabas atu dadi tadak na'ak, ami hotu-hotu neon mesak ida ti'an. Sia nakara ami mak hodi Lia Di'ak bodik ema lahoos Yahudi, no sia na'in du'uk mak nodi bodik ema Yahudi. 10 Mais noo lia ida mak sia naruka baa ami na'ak, keta halu'a tulun ema mukit sia. Mais tuir loos, ha'u kalo nanis nunia ti'an.
Paulus de'an Petrus iha Antiokia
11 Dala ida Petrus mai kota Antiokia. La kleur, ha'u kde'an nia loke fore tan nia nalo sala. 12 Oras nia foin mai Antiokia, sura loron nia tuur naa-nemu namutuk no mamaluk mak fiar mak lahoos Yahudi. Mais la kleur, Yakobus belun ema Yahudi sia moos mai Antiokia. Naree nunia, Petrus nakiduk nela mamaluk lahoos Yahudi nia sia, no la tuur naa-nemu no sia ona. Nia nata'uk ema Yahudi mak nanorin na'ak, Kristus eman musti kaer metin ukun-badu Yahudi, no musti moris salin nosi ema mak lahoos Yahudi.
13 Naree Petrus nalo nunia, mamaluk Yahudi rumak sia moos nalo tuir. To'o Barnabas moos oin-kotuk nunia. 14 Mais ha'u katene sia la tuir tebe-tebes Lia Di'ak isin. Ha'u moos de'an Petrus iha siakaan oin ka'ak, “Hoi, Petrus! O ne'e, ema ida nosi klubun Yahudi mak simu ukun-badu Yahudi hori uluk. Mais oras ne'e, Na'i Maromak loke dalan ti'an nebee ema mak fiar baa Yesus Kristus la tatalik no ukun-badu nia sia ona. Mau moos natebes lia nia ti'an. Dadi, nunabee oras ne'e mau sei seten mamaluk lahoos Yahudi, nebee sia nalo aan nu'u ema Yahudi?”
15 Ha'u kde'an Petrus nunia, tan ami rua ema Yahudi hotu. Amikaan klubun Yahudi la manesak no klubun seluk sia, tan amikaan klubun natene kedan Na'i Maromak kleur ti'an. 16 Mais oras ne'e, ita hatene ha'ak Na'i Maromak nafoli ita na'ak, ema loos, lahoos tan ita halo tuir ukun-badu Yahudi, mais tan ita fiar baa Yesus Kristus. Ami du'uk fiar baa Yesus Kristus, nebee Na'i Maromak simu ami, tan ami hatene ti'an Na'i Maromak la simu ema, tan ema nia nalo tuir ukun-badu. Mais Nia simu ema, tan fiar baa Yesus Kristus.d
17 Tan lia nia, ami hanorin ema ha'ak, Na'i Maromak simu ema tan fiar baa Kristus. Keta arumak ami sala tan fiar baa Kristus, hotu la tuir tenik ukun-badu Yahudi ona. Lale! Ami la sala. 18 Kalo ha'u ktuir kikar ukun-badu mak ha'u kla'o kela ti'an nia, foin ha'u ksala! 19 Uluk, ha'u kaka'as aan moris tuir ukun-badu nia sia, mais la bele. Oras ne'e, ha'u kla'o kela ti'an ukun-badu nia sia, nebee ha'u kbele moris talin malu ko Kristus. Moris nunia lai, foin Na'i Maromak simu ha'u. Dale badak dei, ha'u kmate ti'an, hedi baa ai karuus kamutuk ko Kristus. 20 Oras ne'e lahoos ha'u mak moris, mais Kristus mak moris iha ha'ukaan isin lolon. Ha'u ketan moris foun ne'e, tan ha'u kfiar baa Na'i Maromak Oan. Nia nadomi ha'u liu resik, to'o mate selu nola ha'u. 21 Na'i Maromak simu ha'u tan Nia laran di'ak, lahoos tan ha'u kmoris tuir ukun-badu. Kalo ema bele di'a-di'ak no Na'i Maromak tan moris tuir ukun-badu, lia nia isin na'ak, Kristus mate nia butan dei.
Lia nia, mak ha'u katak baa Petrus iha Antiokia.