Paulus foo tate'an nebee ema Korintus babilan di'a-di'ak siakaan moris
13
Ha'u atu kmai karee emi ne'e, dala tolu ona. Hakerek Moon na'ak, “Kalo ema ida tula sala baa ema seluk, musti noo mataa lia rua-tolu mak dale manesak lai, foin bele simu. Kalo lale, keta simu.”a 2 Baa oras ha'u kmai baa emi dala rua, ha'u kfoo katene ti'an baa ema nia sia mak moris nalo aat. Oras ne'e, ha'u kfoo katene tenik baa sia, bele-bele no ema seluk hotu-hotu mak moris nalo aat. Uluk, ha'u kfoo katene ti'an. Oras ne'e, ha'u katak tenik. Kalo ha'u kmai ti'an iha emi nebaa, ha'u la kamamar sia.3 Kalo noo ema nosi emi naneo na'ak, Kristus la foo beran baa ha'u atu kaliku emi, niakaan lia kakaer nune'e: Kalo Kristus babilan nola emi, Nia nanis serwisu nodi beran boot iha emikaan klaran. La serwisu namamar aan. 4 Baa oras ema no'o Nia iha ai karuus, Nia namamar aan tebes, tan rai mohu Niakaan beran. Mais Na'i Maromak latan beran baa Nia, nebee Nia moris nikar. Ita mak dadi baa Kristus eman, masik ita du'uk la biit moos, Na'i Maromak foo moris foun baa ita. Tan lia nia, ami bele haliku emi hodi Niakaan beran.
5 Emi ida-idak musti sukat neon du'uk atu hatene ha'ak, emi fiar tebes baa Kristus ka, lale. Kristus beran naksain iha emikaan moris ka, lale? Sukat aan nunia. Kalo emi la talin aan ho Kristus, emi la dadi baa Niakaan ema. 6 Kalo emi sukat ami, emi bele haree Kristus beran naksain iha amikaan moris. Hodi nunia, ami sasin, tan ami ne'e klosan tebes. 7 Ami haloon baa Na'i Maromak, nebee emi keta halo lia aat. Ami la haloon nunia, nebee ema simu ami na'ak Kristus klosan tebes, mais tan ami beer nebee emi moris loos. Kalo ema balu dudu sees ami, la saa ida. 8 Ita la bele sakar lia loos, mais ita musti hariik hosi lia loos. 9 Kalo ami mak mamar, emi mak biit moos, la saa ida. Mais ami haloon nebee emi tebe-tebes biit. 10 Masik ha'u kdook kosi emi, ha'u kakerek oras ne'e, nebee ha'u kmai, ha'u lalika de'an emi tenik. Tan ha'u ne'e, itakaan Na'in klosan. Nia latan beran baa ha'u, nebee kakbiit emi, lahoos kadodok emi.
Paulus narohan hakerek
11 Mamaluk sia mak ha'u kadomi! Ha'u kodi lia fuan rohan ne'e, foo tabe furak baa emi. Halo loos lia hotu-hotu. Hanono di'a-di'ak ha'ukaan lia tate'an. Moris neon ida. Buka dalan atu di'a-di'ak ho malu. Tan Na'i Maromak nadomi emi, ha'u kaloon nebee Nia namutuk no emi bei-beik, nodi tulun emi, nebee emi bele moris dame malu.
12 Emi musti hasee malu hodi de'i kabaas mak fatan bodik Na'i Maromak eman sia. Na'i Maromak eman sia iha ne'e, solok tabe furak bodik emi hotu-hotu.
13 Ha'u karo'an nebee, itakaan Na'in Yesus Kristus natudu laran di'ak baa emi. Nebee, Na'i Maromak natudu dadomin baa emi. Nebee, Kmalar Lulik babilan emi nalo neon mesak.
Nunia dei,
Paulus