Paulus nalore lia kabaas mak Kristus natudu baa nia, ahan nia me'i
12
Maluk sia, foo leet baa ha'u atu kdale wa'in oda tenik. Dale wa'in la noo folin, mais tan ha'u kdale wa'in nune'e ti'an, di'ak liu ha'u moos katak tenik baa emi lia mak itakaan Na'in natudu baa ha'u, ahan me'i. 2-4 Ha'u katene ema ida mak talin aan no Kristus. Tinan sanulu resin haat mak liu ti'an, nia kona loi sa'e baa lale'an mak aas kaliuk. Ha'u la katene, oras sa'e nia, sei nodi isin lolon ka, nodi kmalar dei. Na'i Maromak mesan mak natene. Mais ha'u katene malorek ka'ak, baa oras nia sa'e baa Na'i Maromak Fatin Kabaas nia,a nia rona lia fuan sia mak maka'as basuk, to'o ema raiklaran la bele dale. 5 Ha'u kakara dale wa'in nosi lia nia, mais la kakara dale aan du'uk. Kalo ha'u kdale wa'in, ha'u kdale loos nosi lia mak ha'u la kbiit kalo. 6 Tuir loos, kalo ha'u kakara dale wa'in kosi ha'ukaan babiit, la mamuk, tan noo lia wa'in mak ha'u kbele dale. Mais ha'u ketu aan nebee ema keta mose ha'u liu nosi saa mak sia rona no naree iha ha'ukaan moris du'uk, 7 masik Na'i Maromak natudu lia kabaas nia baa ha'u ahan me'i.Mais Na'i Maromak nabusik ha'u kona susar, nebee ha'u keta loko aan tan lia kabaas nia. Diabu ulun solok niakaan maktuir ida atu kako'en ha'u nohuun, hanesan noo tadak ida mak tu-tuu ha'ukaan isin. Aikee! Ha'u ksusar tebes! 8 Ha'u karo'an no kaloon dala tolu ti'an, nebee Na'i Maromak foti nola lia nia nosi ha'u. 9 Mais Nia nataa na'ak, “Lale. Ha'u atu tulun o kodi katudu laran di'ak baa o. Lia nia, to'o ti'an. O moran o du'uk la biit, foin Ha'ukaan beran hetak nakbiit o.” Tan Na'i Maromak katak nunia, ha'u kdale wa'in baa oras ha'u du'uk la kbiit, nebee Kristus beran nakbiit ha'u. 10 Kalo ha'u koran aan la kbiit atu kalo serwisu ida, ha'ukaan neon mamatek dei. Masik ema dale nahaat ha'u, nasusar ha'u, no tonan ha'u tan dadi Kristus klosan moos, ha'ukaan neon mamatek dei. Oras ha'u la kbiit, Kristus beran nakbiit ha'u.
Paulus neo-neon baa hutun sarani iha Korintus
11 Emi moris hanesan ha'u la dala ida dauk baa kanorin emi iha Korintus nebaa. Tan lia nia, kakara la kakara, ohin nia ha'u kdale nu'u ema momok mak dale. Tuir loos, ha'u lalika dale wa'in, tan emi du'uk mak musti dale wa'in nunia hosi ha'u. Tebes. Ha'u la koo folin sa-saa. Mais kalo hanesa ha'u ho ema mak katak na'ak sia “klosan maka'as basuk”, siakaan maka'as sei la to'o ha'u.
12 Sura leet Na'i Maromak solok klosan ida, ema nia nodi beran nalo tadak blaar oi-oik atu natudu kakaer na'ak, Na'i Maromak mak solok nia. Keta halu'a oras ha'u iha emikaan klaran, ha'u moos kalo tadak blaar nunia. Mais ha'u kserwisu nunia kodi ketu aan dei. 13 Keta krakat. Tan noo lia ida mak ha'u la kalo baa emi oras serwisu iha kota Korintus. Masik klosan seluk sia nalo iha hutun sarani seluk sia moos, ha'u lale. Lia nia mak, ha'u kusu emi kansera ha'u.
14 Lia nune'e! Ha'u kadi'a aan ti'an atu kmai emi dala tolu ona. Ha'u la kbuka emi kansera ha'u. Ha'u moos la buka emikaan sasoin. Tuir itakaan adat, la fatan lawarik oan sia rai sasoin bodik inan-aman. Adat loos, ema matas mak rai sasoin bodik oan sia. Ha'u la kbuka emi rai sasoin bodik ha'u, tan emi hanesan ha'ukaan oan sia! Ha'u kbuka loos emikaan neon no dadomin. 15 Ha'u kakara sosa naha bodik emi. Ha'u moos kakara serwisu maka'as, nebee emi bele moris tuir Na'i Maromak hakaran. Kalo ha'u kadomi emi liu resik nunia, emi moos musti hadomi ha'u. Tan saa emikaan neon naktomak basuk nunia? Keta, tan lia nia la fatan.
16 Emi balu simu ha'ak, ha'u la katodan emi. Mais balu na'ak, ha'u ktolek no be'ur kola emi, to'o ha'u kalo emi nu'u karau tuu inun. 17 Nunabee? Ha'u moos solok ha'ukaan ema sia baa emi. Arumak sia be'ur emi ka? 18 Ha'u karuka Titus, nebee baa emi. Ha'u moos solok maluk ida seluk atu baa bele-bele no nia. Arumak Titus be'ur nola emi ka? Lale. Titus no ha'u, ilas mesak. Ami serwisu lia manesak, tan haneo manesak.
19 Mamaluk sia mak ha'u kadomi! Ohin nia, arumak emi haneo ha'ak, ami haloos aan iha emikaan oin ka? Lale! Hotu-hotu mak ami dale ne'e, Na'i Maromak natene ti'an. Ami la bele subar sa-saa hosi Nia. Ami moos talin malu ho Kristus. Ami hadomi emi. Hotu-hotu mak ami halo, ami halo atu hakbiit emi.
20 Kalo ha'u kmai emi ti'an, keta to'o emikaan hahalok la tuir ha'ukaan hakaran. Hotu emi moos la hakara ha'ukaan hahalok. Keta to'o noo ema mak toe malu, mak hirus malu, mak rai hirus, mak naneo loos isin lolon du'uk, mak dale nadois ema naran, mak tula aat lia baa ema, mak loko aan, no mak tokar lauk hotu-hotu. 21 Kalo ha'u kmai baa emi, ha'u kneo-neon tan emikaan hahalok nia sia. Keta to'o tan emikaan hahalok, Na'i Maromak namoe ha'u iha emikaan oin. Keta to'o ha'u kmusti katodan emi, tan ema wa'in nosi emi sei moris nalo aat. Sia la no'uk nalo neon aat nodi fila tuir Na'i Maromak dalan loos. Sia sasobo! Noo mak nalo lia kfo'er no nakur biti kluni. Sia nalo oi-oik, la natene moe.