Paulus katak na'ak, sintidu ho ema seluk mak nalo aan nu'u Kristus klosan
11
Maluk sia! Noo ema iha emikaan klaran mak dale wa'in na'ak, sia Kristus klosan maka'as. Tan baa nia, emi musti foo leet baa ha'u atu kdale wa'in nu'u ema bulak nune'e: 2 Ha'u ne'e, nu'u emikaan ama. Emi, nu'u ha'ukaan oan feto mak sasudin ti'an. Emikaan sasudin nia, ne'e mak Kristus. Ha'u kakara daka emi di'a-di'ak, nebee baa oras emi hola emikaan sasudin, emi sei moos. Tan lia nia, kalo ema nia sia mai seten emi atu nahaat emikaan fiar, nanis ha'u krakat. Mais krakat nia tuir Na'i Maromak beer. 3 Oras ne'e, emi tuir Kristus dalan loos hodi neon moos. Keta to'o ema nia sia mai be'ur nola emi, hanesan uluk aan samea be'ur nola bei Efa. Samea be'ur nunia, tan nia tolek huun.a 4 Ema nia sia mai baa emi ti'an nodi nanorin lia Yesus. Mais siakaan hanorin nia, oin seluk. La manesak no lia Yesus mak uluk ami hanorin ti'an baa emi. Tan saa emi fiar baa sia? Uluk, emi loke neon hodi simu Maromak Kmalar, nebee Nia babilan emi. Oras ne'e, tan saa emi beer simu hola tenik kmalar ilas seluk? Uluk, emi fiar baa Kristus Niakaan Lia Di'ak mak ami katak baa emi. Oras ne'e, tan saa emi fiar tenik baa hanorin ilas seluk?5 Ema nia sia foti aan na'ak, sia Kristus klosan maka'as basuk. Emi moos simu. Mais siakaan beran liu tan ha'u ka? Lale! Ha'u la ksimu hanoin nunia. 6 Masik ha'u la matenek dale moos, ha'u katene tebe-tebes lia isin mak ha'u kdale. Emi moos hatene, tan ha'u kalore rua-ruan baa emi ti'an.
7 Oras ha'u kanorin Na'i Maromak Niakaan Lia Di'ak baa emi, ha'u la kusu emi kansera ha'u. Ha'u karaik aan, nebee kbele foti-kahaas emi. Arumak ha'u sala tan kalo nunia ka? 8 Ema mak tulun ha'u, lahoos emi, mais hutun sarani iha fatin seluk sia. Nu'u ha'u kola kosi sia, nebee kbele tulun emi. 9 Oras ha'u kamutuk ko emi, kalo ha'u kbuka saa ida, ha'u la kusu baa emi. Itakaan mamaluk sia nosi rai Makedonia mak mai tulun ha'u. Ha'u la isin ida dauk katodan emi. Baa awan-wainrua moos, ha'u la kalo nunia.b 10 Kristus Manfatin, tebes no loos. Ha'ukaan dalen ne'e moos tebes no loos, tan ha'u ktalin aan ko Nia. La noo ema ida kois iha emikaan rai Akaya tomak nebaa mak bele nakahik ha'u keta dale wa'in, tan ha'u la katodan emi kodi kusu emi kansera ha'u. 11 Tan saa ha'u kdale nune'e? Arumak emi hanoin ha'u kdale nune'e tan la kadomi emi ka? Lale. Masik emi hanoin nunia moos, Na'i Maromak du'uk natene, ha'u kadomi emi.
12 Hahalok mak ha'u kalo ti'an nia sia, ha'u atu kalo bei-beik, tan ha'u la ko'uk emi kansera ha'u. Hodi nunia, ema nia sia mak foti aan dale na'ak, siakaan serwisu maka'as liu ami, sia la noo tatuur atu dale foti aan ona. 13 Sia na'ak, Na'i Maromak mak solok sia. Sia nalo aan nu'u Kristus klosan. Mais tuir loos, sia naktolek. 14 Mais emi keta blaar! Diabu ulun moos nakfilas aan nu'u Maromak Niakaan makbukar lale'an mak nodi kroman. 15 Keta blaar kalo diabu ulun eman sia moos nalo aan nu'u Na'i Maromak klosan. Na'i Maromak nanis atu selu siakaan a'aat nia.
Paulus nalore niakaan serwisu bodik Kristus
16 Foo leet baa ha'u kdale katutan tenik nu'u ema bulak, tan ha'u kmusti dale loko aan oda. 17 Ha'u kdale ne'e la mai nosi itakaan Na'in. 18 Ha'u kdale loko aan nune'e, tan atu kalolon ema seluk sia mak foti aan nodi dale wa'in nosi siakaan hahalok du'uk. 19 Masik ha'u kalo aan momok nunia, ha'u katene emi simu ema momok, tan emi hafolin aan matenek liu. 20 Kalo ema mai nalo oi-oik baa emi, emi simu. Sia nalo emi baa ata moos, emi simu. Sia nana'o nola emikaan naha moos, emi simu. Sia be'ur nola emi moos, emi simu. Sia foti aan baa ema boot nodi naraik emi moos, emi simu. Sia basa emi moos, emi simu dei. 21 Mais ha'u koran moe, tan ami la maka'as nu'u sia.
Kalo sia nakara dale wa'in, ha'u moos kaberan aan kalolon sia. (Mais keta halu'a, tan ha'ukaan dalen ne'e, momok dalen!) 22 Kalo sia, ema Ibrani isin, ha'u moos ema Ibrani isin. Sia ema Isra'el, ha'u moos ema Isra'el. Sia bei Abraham husar-binan, ha'u moos bei Abraham husar-binan. 23 Sia Kristus ain-liman, ha'u moos Kristus ain-liman. Tebes. Ha'u ne'e, manesak ko sia. Mais tuir loos, ha'u ne'e liu tan sia. (Keta halu'a, tan ha'ukaan dalen ne'e, momok dalen!) Ha'u kserwisu maka'as liu sia. Ema soe tama ha'u baa bui wa'in liu sia. Ema fota no'at ha'u wa'in liu sia. Ha'u kre'is mate, dala wa'in liu sia.c 24 Ha'u kre'is mate, tan ha'ukaan ema Yahudi du'uk naruka fota no'at ha'u dala lima. Sura ha'u kona oe, sia fota no'at ha'u to'o isin tolu nulu resin siwi.d 25 Dala tolu ema ta'e ha'u nodi ai. Dala ida ema tuda ha'u nodi fatuk atu no'o ha'u. Dala tolu ha'ukaan roo mout. Ha'u kaklele iha tasi loron ida, kalan ida laran.e 26 Dala wa'in ha'u kla'o dook baa nabee dei. Dala wa'in ha'u kre'is mate tan maufinu. Kre'is mate, tan motasa'e, tan ema madauk, tan ha'ukaan ema Yahudi du'uk, tan ema lahoos Yahudi, no tan ema mak nalo aan nu'u maluk sarani. Ha'u moos kre'is mate iha tasi klaran, iha kota laran, no iha fatin fuik.f 27 Ha'u kserwisu susi ruin kodi ketan susar oi-oik. Dala wa'in la no leet toba. Dala wa'in la no leet kaa. Dala wa'in la no leet kemu. Dala wa'in ha'u ksalaen no kanroo. Dala wa'in ha'u kmalirin kre'is mate tan la koo tais. 28 Ha'u la ko'uk sura lia nia sia hotu-hotu, ha'u ksura loos nune'e dei: sura loron ha'u kneo-neon baa hutun sarani sia iha fatin hotu-hotu. 29 Kalo noo ema mak noran aan la bele, ha'u moos tuir koran nunia. Kalo noo mak monu tan kona sokur, ha'u moos tuir moe kodi nawan seti.
30 Kalo ha'u kmusti dale wa'in, di'ak liu ha'u kdale wa'in tan ha'u la kbiit. Tebes! 31 Na'i Maromak, itakaan Na'in Yesus Kristus Aman, natene ha'u kdale ne'e la bosok. Ha'u ktonu-kaboot Nia nohuun.
32 Uluk, iha kota Damsik, na'i Aretas niakaan gubernur naruka ema baa teri ha'u iha kota nanokar, nebee kohi nola ha'u. 33 Mais ha'ukaan belun sia natama ha'u baa ko'e ida, hotu nodi tali natuun ha'u baa kota luan, tuir kota kadidin fatuk. Hodi nunia, ha'u ksasin kosi gubernur liman, mais lahoos tan ha'ukaan babiit.g