Paulus dale nosi niakaan serwisu hanesan Kristus klosan
10
Oras ne'e, ha'u, Paulus du'uk mak katak lia ne'e. Emi balu dale ha'ak, “Kalo Paulus namutuk no ami, nia dale mamamar dei. Mais kalo Paulus dook, nia naberan aan dale maka'as.” Nunia tebes ka? Nune'e mai. Ha'u kusu kodi karaik aan no laran furak hanesan Kristus laran, nebee emi hanono baa ha'u. 2 Ha'u kusu nune'e, tan emi balu ha'ak, ha'u la koo beran. Sia na'ak, amikaan hahalok hanesan ema mak la tuir Maromak. Kalo sia la nanawa dale nunia, ha'u kmai, ha'u kdale maka'as baa sia. Ha'u katak kedan lia ne'e baa emi hotu-hotu, nebee oras ha'u kmai, ha'u lalika de'an sia. 3 Ita ema raiklaran da-daun dei. Tebes. Mais kalo ita sakar ema seluk, ita lalika hakaat malu, hanesan ema mak la natene Maromak. 4 Kalo ita sakar ema, keta halu'a, itakaan ro'at-meik la manesak no ema mak la natene Maromak. Kalo ita sakar ema ida mak ulun fatuk to'o toe no ita, ita hoo Na'i Maromak beran mak bele nadodok niakaan lia tatuur mak nia nodi sakar ita. 5 Na'i Maromak beran bele sobu lia huun hotu-hotu mak sakar Nia, no lia huun hotu-hotu mak nalo ema la no'uk natene Nia. Niakaan beran nia moos bele natudu dalan atu seluk itakaan hanoin dalan tuan, nodi hanoin dalan foun. Hodi nunia, ita bele hanoin tuir Kristus Niakaan hanoin.a 6 Emi wa'in hanono baa Kristus ti'an, hodi halo tuir Niakaan hakaran hotu-hotu. Mais emi balu la ho'uk hanono baa Nia. Tan lia nia, ami hadi'a aan taa ukun baa ema mak la nanono baa Nia.7 Emi hakara haree loos lia mak naksain dei. Mais musti haree noo, ema neon laran. Noo ema seluk mak nafolin aan na'ak Kristus klosan. Kalo nunia tebes, ema nia musti simu na'ak, ami moos Kristus klosan hanesan nia. 8 Arumak emi haneo ha'ak, ha'u kfoti aan tan beran mak itakaan Na'in latan baa ami ka? Lale! Nia latan beran nia baa ami atu hodi hakbiit emi, lahoos atu hadodok emi. Tan baa nia, ha'u la kfoo leet baa ema atu namoe ha'u, nodi nahaat ha'ukaan serwisu iha emikaan klaran. 9 Ha'u la kakara kata'uk emi kodi ha'ukaan hakerek sia. 10 Mais noo ema mak dale na'ak, “Keta titu Paulus. Masik nia dale krakat iha hakerek laran moos, kalo nia mai du'uk, nia dale mamamar. Niakaan dale la noo beran.” 11 Nebee ema mak dale bosok nunia, nanoin lia ne'e: saa mak ami hakerek hosi dook, manesak no saa mak ami atu dale oras ami iha emikaan klaran.
12 Noo ema mak dale wa'in na'ak, sia nia, Kristus klosan maka'as. Ami la haksakar aan hanesa amikaan serwisu ho siakaan serwisu. Ema oin nunia buka ema manesak nu'u sia, nebee sia tane malu, tan sia ilas ida! Siakaan hahalok nunia momok basuk! 13 Ami la dale wa'in nosi lia mak la noo tatuur. Ami dale loos lia hosi serwisu mak Na'i Maromak latan baa ami. Ami halo loos saa mak Nia naruka ami halo bodik emi. Ami la serwisu sees hosi nia. 14 Tan lia nia, kalo ami de'an emi, fatan ami dale nunia. Tan ami ne'e, ema mak hato'o uluk Kristus Niakaan Lia Di'ak baa emi. Emi moos simu amikaan dalen nia. Kalo lahoos nunia, ami la fatan dale nunia. 15 Kalo ema seluk serwisu iha emikaan klaran, ami la dale ha'ak, siakaan serwisu nia, amikaan serwisu folin. Lale. Mais ami haloon nebee emikaan fiar bele hetak biit. Hodi nunia, amikaan serwisu iha emikaan klaran bele tu'an bei-beik, 16 to'o ami bele baa katak Kristus Niakaan Lia Di'ak baa ema seluk sia. Ami hakara baa fatin seluk sia mak kre'is baa emi, mak ema seluk sei la baa katak lia Kristus dauk. Hodi nunia, ami la basak aan baa malu ho sia.