Osan tatulun bodik ema sarani sia iha Yerusalem
9
Tuir loos, ha'u lalika kakerek tenik kosi tatulun bodik Kristus eman sia iha Yerusalem. 2 Ha'u katene ka'ak, emi hodi neon no laran atu tulun sia. Ha'u katak ti'an baa hutun sarani iha Makedonia hosi emikaan laran di'ak nia. Ha'u kmose emi kodi dale ka'ak, emi hosi rai Akaya hadi'a aan ti'an hori tinan uluk atu solok osan tatulun. Ha'u moos dale kosi emikaan laran di'ak mak nakbiit ema seluk, to'o sia moos nakara tulun ema susar. 3 Masik nunia moos, ha'u ksolok itakaan maluk sia baa emi atu serwisu tuan emi libur osan. Ha'u katak kedas baa emi, nebee emi hadi'a aan kedan. Keta to'o lia saa mak ami dale wa'in hosi emi, mamuk. 4 Kalo ema Makedonia mai bele-bele no ha'u, mais emi sei la libur mohu osan dauk, ita hotu-hotu moe. Keta to'o ha'ukaan fiar baa emi, la noo krarain. 5 Tan lia nia, ha'u kaneo ka'ak, di'ak liu itakaan maluk sia baa uluk, nebee emi hotu-hotu bele babilan osan tatulun nia, tuir emikaan mamenon uluk nia. Foo hodi laran maluak. Keta foo hodi toos kamoruk.6 Lia huun nune'e: “Ema mak kuda fini wa'in, netan nikar wa'in. Ema mak kuda fini la wa'in, netan nikar la wa'in.” 7 Ema ida-idak musti naneo du'uk, nia atu foo hira. Keta foo hodi neon baluk. Keta foo tan ema naseten emi. Na'i Maromak nadomi ema mak foo nodi neon no laran. 8 Nia nakara natuun matak-malirin baa emi, to'o emi la haklara kois. Nia moos bele foo liu tan tenik, to'o emi bele fa'e resin sia bodik tulun serwisu hotu-hotu mak di'ak. 9 Hakerek Moon na'ak,
“Na'i Maromak foo fafa'ek baa ema mukit sia,
nosi Niakaan laran di'ak.
Niakaan dadi'ak la no rohan,
tan Nia neon loos to'o nima-nimak.”a
10 Na'i Maromak mak foo fini, nebee ema mak nalo to'os bele kuda. Nia mak foo hahaak, nebee ita bele haa. Nia atu foo matak-malirin baa emi, nebee emi bele halo lia loos. Nu'u emi dadi baa ema mak nalo to'os, no Na'i Maromak foo fini baa emi nebee emi kuda. Sura loron Nia nalo emikaan to'os isin, hetak wa'in.b 11 Na'i Maromak nakara foo baa emi, liu tan saa mak emi buka, nebee emi bele tulun ema seluk sia hosi emikaan laran di'ak. Kalo emi tulun ema seluk nunia ti'an, sia nanis sera dodan baa Na'i Maromak. 12 Tebes. Tatulun mak emi foo baa hutun sarani sia iha nebaa, nanis tulun sia. Hotu, ema wa'in sera dodan baa Na'i Maromak. 13 Oras sia simu emikaan tatulun, lia nia natudu kakaer na'ak, emikaan fiar baa Kristus Niakaan Lia Di'ak nia, la mamuk. Hodi halo tuir emikaan fiar, sia atu tonu-haboot Na'i Maromak, tan emi foo tatulun hodi laran di'ak baa sia no ema seluk sia.
14 Ema mak simu nola tatulun nosi emi, sia moos atu namulak bodik emi. Sia nadomi emi, tan Na'i Maromak natudu laran di'ak wa'in baa emi. 15 Mais hanoin! Na'i Maromak foo loos sasoin ida mak kabaas kaliuk baa ita. Ne'e mak, Yesus! Etuk, ita tonu bele-bele Na'i Maromak ha'ak, “Ami sera dodan baa Ita Boot!”