Foo tatulun hodi neon no laran
8
Mamaluk sia mak ha'u kadomi! Ami hakara nebee emi hatene Na'i Maromak laran di'ak mak Nia natudu baa hutun sarani sia iha rai Makedonia. 2 Masik sia netan susar wa'in moos, sia neon boot bei-beik. Masik sia du'uk mukit moos, sia sei foo tatulun baa ema makfiar seluk sia. 3 Ha'u karee kodi matan sia foo hotu-hotu tuir siakaan babelen. Nunia ti'an, sia sei foo tu'an tenik. La noo mak naseten sia. 4 Sia du'uk mak nusu ami loke dalan, nebee sia bele nola fafa'ek atu tulun mamaluk makfiar sia mak kona susar iha Yerusalem.a 5 Uluk, ami haloon nebee sia bele nalo nune'e. Mais saa mak sia nalo ti'an nia, liu tan nosi saa mak ami haloon baa, tan sia moos latan neon no laran baa itakaan Na'in. Sia dale baa ami na'ak, “Ami latan amikaan moris nebee serwisu hamutuk ho emi, tan lia nia tuir Na'i Maromak nakara.”6 Tan hutun sarani Makedonia siakaan knaninuk di'ak nunia, ami husu Titus fila nikar baa emi iha Korintus atu tulun emi nebee emi moos tuir tulun ema susar sia iha Yerusalem. Uluk, Titus tulun emi hahuu libur osan bodik sia. Oras ne'e, ami husu nebee nia fila nikar, tulun emi hato'o emikaan serwisu nia.b 7 Emikaan serwisu bodik Na'i Maromak, di'ak ti'an. Emikaan fiar, biit. Emikaan dalen, furak. Emi hatene lia wa'in hosi Na'i Maromak ti'an. Emi biit basuk. Emi hadomi ami liu. Mais oras ne'e, ha'u kakara nebee emi moos laran maluak hodi tuir libur osan bodik hutun sarani mak netan susar iha Yerusalem.
8 Ha'u la kaseten emi, mais kakara sukat emi dei. Hutun sarani sia iha Makedonia sei no'i libur osan bodik ema iha Yerusalem. Oras ne'e, ha'u kusu emi iha Korintus, emi moos hakara tuir hatudu emikaan dadomin ka? 9 Emi hatene ti'an, itakaan Na'in Yesus Kristus natudu laran di'ak baa emi. Uluk, Nia nu'u ema maksoin. Mais Nia boi namukit aan, nebee nasoi emi.
10 Tinan uluk nia, emi iha Korintus hakara tulun maluk sia iha Yerusalem. Emi moos hahuu libur osan ti'an. Tuir ha'u, oras ne'e emi musti halo nune'e: 11 Hato'o emikaan serwisu hodi foo hotu saa mak emi hakotu ti'an atu foo. Emi hakara foo hira, foo baa ona. Mais keta halu'a foo hodi neon no laran. 12 Surak ita foo hodi neon no laran, ita bele foo tuir itakaan babelen. Hodi ita dei. Ita lalika foo liu nosi itakaan babelen.
13 Ha'u la kakara katodan emi, nebee ema seluk noran kmaan. Ha'u kakara ita hotu-hotu hatiu bele-bele siakaan susar nia. 14 Oras ne'e emi hoo naresin, mais siakaan naklara. Kleu-leur sia moos bele selu nikar, kalo emikaan naklara. Hodi nunia, kmaan no todan, ita hatiu bele-bele. 15 Hakerek Moon na'ak,
“Ema mak netan wa'in,
la naresin.
Ema mak la netan wa'in,
la naklara.”c
Titus sia serwisu tuan libur osan bodik ema Yerusalem
16 Ha'u ksera dodan baa Na'i Maromak, tan Nia namaus Titus to'o Titus nakara tulun emi, hanesan ha'u kakara tulun emi. 17 Tebes. Oras ami husu nia atu baa naree emi, nia moos no'uk, tan nia beer basuk. 18 Mais nia la baa mesan, tan ami moos solok maluk ida baa bele-bele no nia. Hutun sarani hotu-hotu iha ne'e tonun ema nia, tan niakaan serwisu katak Lia Di'ak. 19 Ema malikuk sia iha hutun sarani ne'e boi nola nia atu namutuk no ami hato'o tatulun baa ema susar sia iha Yerusalem. Hodi hala'o serwisu ne'e, ami haboot itakaan Na'in, hodi hatudu ha'ak ami tebe-tebes hakara atu tulun sia. 20 Kalo libur hotu osan ti'an, ami hakara hato'o osan boot nia bele-bele baa Yerusalem, nebee la noo ema ida mak nasalak ami na'ak, ami hato'o osan nia la tuir dalan. 21 Tan ami hakara hatudu amikaan neon moos iha Na'i Maromak oin no ema raiklaran oin.d
22 Ami moos solok maluk ida tenik atu baa bele-bele no Titus nebee serwisu tuan emi libur osan iha Korintus. Ami sukat ti'an niakaan lisan dala wa'in hodi haree malorek Niakaan serwisu bodik itakaan Na'in. Nia baa tulun emi nodi neon no laran, tan nia natene emi halo lia mak di'ak.
23 Kalo ema nusu emi na'ak, Titus ne'e see, katak ha'ak nia ha'ukaan soman mak serwisu bele-bele no ha'u bodik emi. Nia nadi'a aan atu baa bele-bele no maluk rumak sia mak hutun sarani boi ti'an nebee serwisu tuan emi libur osan. Siakaan serwisu nia nanis atu nakneter Kristus. 24 Oras sia to'o nebaa, emi musti haliku sia di'a-di'ak. Hodi nunia, hutun sarani seluk sia bele naree emikaan dadomin. Naree nunia, sia moos bele natene tan saa ami tonun emi.