2 Mamaluk sia! Keta taka matan. Loke neon simu ami. Uluk, oras ami iha emikaan klaran, ami la halo sala kois baa ema. Ami la hodi ema baa sala. Ami la be'ur ema atu buka sotir. 3 Ha'u kdale ne'e, lahoos tan atu tula sala baa emi, mais tan ha'u kadomi emi. Masik ita moris ka, mate ka, ita soman malu bei-beik. 4 Oras ne'e, ha'u la kneo-neon ona, tan ha'u kfiar baa emi ti'an. Ha'u kbele neon boot tan emi. Emi moos hakbiit ha'ukaan neon. Dadi, masik ita kona susar ti'an, oras ne'e ha'u neon boot bei-beik tan emi.

5 Uluk, baa oras ami mai iha rai Makedonia, ami kole atu mate tan hetan susar karuk-kwana. Ami toe ho ema matak. Ami moos horan hata'uk.^a 6 Mais tan Na'i Maromak nakara nakbiit ema neon mak noran todan, Nia nakbiit amikaan neon nodi solok Titus mai nikar baa ami. 7 Titus mai ti'an, nia nakbiit amikaan neon, tan nia nasara lia na'ak, oras nia sei iha emi, emi hakbiit niakaan neon. Nia moos dale na'ak, emikaan neon sadi'a ho lia mak uluk dadi ti'an iha emikaan klaran. Nia moos dale na'ak, emi harui aan atu tulun ha'u. Rona kola nunia, ha'u neon boot tebes.^b

8 Ha'u katene, ha'ukaan hakerek uluk mak kodi de'an emi nia, nanis nalo emi susar. Mais ha'ukaan neon la sadi'a. (Tuir loos, uluk ha'ukaan neon sadi'a oan ida, baa oras katene kola, hakerek nia nasusar emi. Mais emi horan todan la oras dei.) 9 Tan lia nia, ha'u neon boot. Mais lahoos tan emi horan todan. Lale! Ha'u neon boot, tan ha'ukaan hakerek nia namaus emi to'o horan neon aat. Hotu, emi katak sain emikaan salan hodi la'o hela emikaan lia mak la di'ak sia, atu fila tuir Na'i Maromak dalan moris loos. Na'i Maromak mak nalo emi to'o halo neon aat nunia. Hodi nunia, emi la lakon aan tan ha'ukaan hakerek nia. 10 Tebes! Kalo ita horan neon aat tuir Na'i Maromak neon, ita hanawa halo lia aat, hodi fila hikar tuir dalan moris mak loos. Lia nia nabusik ita nosi Na'i Maromak Niakaan kastikar. Kalo ita halo neon aat nunia, ita la lakon aan. Mais kalo ita halo neon aat iha ibun dei, nosi ikus ita nanis dodok.

11 Hanoin! Tan ha'ukaan hakerek uluk nia noo folin boot. Emi horan neon aat tuir Na'i Maromak beer. Hotu emi ho'as lakon lia aat sia hosi emikaan moris, tan emi kole ti'an ho emikaan a'aat. Emi moos hata'uk, keta to'o emi atu halo aat hikar. Emi beer atu haree ha'u, hodi hadi'a aan halo lia di'ak. Emi moos hadi'a aan taa ukun baa ema mak nalo sala. Tan emi halo lia loos nia sia, emi dadi ema moos ti'an. Hodi nunia, la noo ema mak bele tula sala baa emi ona. 12 Ha'u la kalo hakerek uluk nia bodik ema mak nalo lia aat nia. Ha'u moos la kakerek bodik ema mak kona niakaan a'aat nia. Mais, ha'u kakerek bodik emi, nebee emi bele hatudu iha Na'i Maromak oin ha'ak, emi hadomi ami tebes. 13 Lia nia mak nakbiit ha'ukaan neon.

Emi moos hakbiit Titus neon, nebee metin. Tan emi halo nunia, amikaan neon moos hetak biit. 14 Uluk, ha'u ktonun emi iha Titus oin. Ha'u moos katak baa nia ka'ak, emi la isin ida dauk hamoe ha'u. Saa mak ami katak baa emi, tebes. Saa mak ami katak baa Titus hosi emi moos, tebes. 15 Sura nia nanoin nola emikaan hahalok no emikaan dalen, nia hetak nadomi emi. Nia moos nanoin, oras nia baa emi, emi simu nia hodi kneter, masik emi neo-neon baa ha'ukaan hakerek nia. 16 Ha'u neon boot, tan ha'u kbele fiar emi baa lia hotu-hotu. Ha'u la kneo-neon tenik baa emi ona!