Na'i Maromak nase'i lia di'ak bodik ita
6
Tan ami serwisu hamutuk ho Na'i Maromak, ami hakara foo lia tate'an baa emi nune'e: Na'i Maromak natudu laran di'ak wa'in baa emi. Dadi emi keta simu butan dei. 2 Hakerek Moon na'ak,“Kona baa niakaan oras, Ha'u kanono o.
Oras Ha'u ksori ema, Ha'u moos tulun o.”
Hanoin di'a-di'ak, tan oras ne'e kona baa Na'i Maromak loron atu sori ema.a
3 Tan lia nia, ami hakara daka aan nebee moris loos. Ami la ho'uk saseni ema mak mai buka Na'i Maromak dalan moris. Ami dale lia mak loos, nebee ema seluk keta nadois amikaan naran. 4 Ami halo lia hotu-hotu nunia atu hatudu ha'ak, ami ne'e, Na'i Maromak ain-liman mak di'ak. Masik ami hetan susar ka, ami moris iha tokar lauk klaran ka, ami haterus aan hala'ok Niakaan serwisu bei-beik. 5 Nunia moos, oras ami kona ta'e, oras ema natama ami baa bui, oras ema tokar lauk ami, oras ami serwisu susi ruin, oras ami la bele toba, no oras ami horan salaen.b 6 Ami ne'e, Na'i Maromak ain-liman mak serwisu hodi neon loos. Ami hatene tebe-tebes Nia. Ami hetu aan. Ami halo lia di'ak bodik ema. Ami foo leet baa Kmalar Lulik babilan ami. Ami la oin-kotuk hadomi ema. 7 Baa oras ami dale, ami dale lia loos, lahoos lia bosok. Ami simu hola beran hosi Na'i Maromak atu hodi halo lia di'ak. Hodi nunia, ami hoo ro'at-meik nosi Na'i Maromak atu hodi sakar funu no daka moris. 8 Masik ema nakneter ami ka, nadois ami ka, ami haterus nohuun. Masik ema dale nahonu ami ka, daka amikaan naran di'ak ka, ami haterus nohuun. Masik ema dale na'ak, ami dale be'ur ema ka; ema dale na'ak, ami dale lia loos ka, ami haterus nohuun. 9 Noo ema mak la natene ami. Mais noo wa'in mak natene amikaan naran. Dala wa'in ami kre'is mate, mais ami sei moris hafati. Dala wa'in ema tonan ami, mais ami sei la mate. 10 Masik ami horan todan moos, ami neon boot nohuun. Masik ami la hoo osan moos, ami hasoi ema wa'in neon. Nu'u ami ne'e la hoo sa-saa, mais tuir loos, ami hoo hotu sa-saa.
11 Ami dale malorek baa emi iha kota Korintus, tan ami hadomi emi tebe-tebes. 12 Ami la hatoos amikaan dadomin baa emi. Mais emi mak hatoos emikaan dadomin baa ami. 13 Tan baa nia, ha'u kfoo lia tate'an baa emi, nu'u emi ha'ukaan oan sia nune'e: keta hanawa hadomi ami.
Keta talin malu ho ema mak la fiar Kristus
14 Keta talin malu ho ema mak la fiar baa Yesus Kristus, tan ita lahoos nu'u sia. Ita, ema makfiar mak moris loos. La fatan ita hamutuk ho ema mak sakar Na'i Maromak. Keta to'o sia koko ita atu serwisu hamutuk. Ema laran di'ak no ema laran aat la bele soman malu. Kroman la bele kahur no makukun. 15 Kristus no diabu ulun bele neon ida ka?c La bele! Ema mak la fiar baa Na'i Maromak bele simu fafa'ek manesak no ema mak fiar ka? La bele!
16 Nunabee? Arumak emi haneo ha'ak, emi bele tama uluk baa Na'i Maromak Niakaan uma hamulak hodi lo'u-sudur baa Nia, foin sai atu lo'u-sudur baa ai'oi lulik ka? Hahalok nia la fatan! Tan Na'i Maromak, Maromak mak moris. Nia, itakaan Na'in. Ita, nu'u Niakaan uma hamulak, tan Nia nein iha itakaan neon laran. Hakerek Moon na'ak,
“Ha'ukaan uma iha Ha'ukaan ema sia klaran.
Ha'u atu ktama-sai iha siakaan klaran.
Ha'u kdadi baa siakaan Maromak.
Sia moos dadi baa Ha'ukaan ema.”d
17 Na'i Maromak moos katak na'ak:
“Emi musti sai hosi ema seluk klaran no haksasa hela sia.
Keta to'o emi dadi nu'u sia.
Emikaan neon musti moos.
Emi musti hakdook aan hela hotu-hotu mak nahobos neon.
Halo nunia lai, foin Ha'u ksimu emi.e
18 Halo nunia lai, foin Ha'u kdadi baa emikaan Ama;
emi moos dadi baa Ha'ukaan oan.
Tebes!
Itakaan Na'in mak beran kaliuk, katak nunia.”f