5
Ita hatene ha'ak, oras ne'e ita tau heik itakaan isin lolon iha raiklaran ne'e, hanesan batane mak nariik heik. Masik itakaan isin lolon atu dodok moos, ita lalika neo-neon, tan Na'i Maromak nadi'a kedan ti'an fatin kabaas bodik ita iha lale'an. Fatin nia, lahoos ema raiklaran mak nariik, mais Na'i Maromak du'uk mak nariik. Fatin nia nafati nohuun. 2 Ita horan todan ho isin lolon tuan ne'e, tan beer simu isin lolon foun, hanesan tais foun iha lale'an. 3 To'o nebaa, ita la hakwalan, tan tau tais foun ti'an.a Ita la dadi loos kmalar, mais ita simu isin lolon foun iha lale'an. 4 Baa oras ita sei hein iha isin lolon mak bele dodok ne'e, ita hakro'an, tan horan susar todan. Masik nunia moos, ita la ho'uk mate hela itakaan isin lolon. Lale! Ita ho'uk habusik hela isin lolon tuan, seluk kedan hodi moris foun iha lale'an. 5 Na'i Maromak nadi'a kedan moris foun nia bodik ita. Nia moos latan Niakaan Kmalar baa ita, atu dadi lia kakaer bodik Niakaan mamenon nia.6 Tan baa nia, ita fiar nohuun baa Na'i Maromak. Ita hatene ha'ak, baa oras ita sei iha isin lolon raiklaran ne'e, ita moos sei dook hosi Maromak. 7 Oras ita sei moris iha raiklaran, ita haloon baa Maromak tan ita fiar baa Nia, lahoos tan ita haree Nia. 8 Mais ita hatene, kalo ita mate la'o hela itakaan isin lolon raiklaran ne'e, ita horan sotir tan ita moris hamutuk ti'an ho Na'i Maromak iha lale'an. 9 Masik ita sei moris iha raiklaran ka, ita moris ti'an iha lale'an ka, ita harui aan halo Na'i Maromak neon di'ak. 10 Keta halu'a. Nosi ikus, ema hotu-hotu musti nataa baa Kristus. Tan Kristus, Ema Makotu Lia mak tetu ema hotu-hotu siakaan moris iha raiklaran. Tetu notu, Nia selu fatan basuk, tuir ema ida-idak hahalok. Nia natene, ema ida-idak niakaan hahalok na'ak, hahalok nia di'ak ka, hahalok nia aat.b
Ita bele di'a-di'ak ho Na'i Maromak, tan Kristus
11 Tan ami hanoin ha'ak, Kristus atu tetu amikaan moris nunia, ami hata'uk hodi hakneter Nia. Ami moos harui aan hamaus ema seluk, nebee sia fiar baa Nia. Na'i Maromak natene amikaan neon. Ha'u kakara, nebee emi moos hatene amikaan neon. 12 Ami la dale aan du'uk. Mais ami foo lia krarain baa emi, nebee emi neon boot tan ami, no emi lalika moe. Hodi nunia, emi bele hataa ema mak ibun boot tan siakaan serwisu folin. Masik siakaan serwisu noo folin moos, siakaan neon la moos. 13 Arumak emi filak ami nu'u ema bulak. Mais kalo ami bulak tebes, ami halo nunia atu hodi tulun emi. Kalo ami la bulak moos, ami halo nunia atu hodi tulun emi.
14 Kristus dadomin mak babilan ami. Ami fiar ha'ak, Ema na'in ida, mak Kristus, mate atu selu nola ema hotu-hotu. Lia nia nu'u ita hotu-hotu mate ti'an hodi habusik hela moris tuan, to'o ita la hoo beran sa-saa tenik iha raiklaran. 15 Kristus mate bodik ema raiklaran hotu-hotu, nebee sia netan moris foun, no la moris tuir siakaan beer du'uk ona. Sia moris tuir Niakaan beer, tan Nia mate hotu moris nikar bodik sia.
16 Tan lia nia, ita keta sukat ema hodi sasukat raiklaran ona. Uluk, ita sukat Kristus hodi sasukat raiklaran, mais oras ne'e la nunia ona. 17 Ema mak talin malu no Kristus, nia dadi ema foun mak noo moris foun. Nia la nu'u uluk ona, tan nia la'o nela moris tuan no simu nola moris foun ti'an. 18 Hotu-hotu ne'e, Na'i Maromak mak nalo. Nia mak loke dalan nebee ita di'a-di'ak hikar ho Nia, tan Kristus kasu mohu itakaan salan. Hotu, Nia moos foo ita serwisu hatudu dalan baa ema seluk sia, nebee sia moos bele di'a-di'ak nikar no Nia.
19 Hanoin! Baa oras Kristus sei iha raiklaran ne'e, Na'i Maromak nodi Nia nalo ema di'a-di'ak nikar no Na'i Maromak. Nia la sura siakaan salan, to'o sia la natiu sala kastikar ona. Hotu, Nia foo serwisu baa ita atu katak baa ema seluk sia, nebee sia moos bele di'a-di'ak nikar no Nia.
20 Ami ne'e, Kristus sasi'an. Na'i Maromak naruka ami atu hamaus ema hodi mai, nebee sia di'a-di'ak hikar ho Nia. Tan baa nia, ami hodi Kristus naran hato'o lia baa emi ha'ak, “Na'i Maromak beer nebee emi di'a-di'ak hikar ho Nia.” 21 Kristus du'uk la nalo sala. Mais Na'i Maromak nalo Nia natiu itakaan salan. Na'i Maromak nalo nunia nebee ita bele moris neon loos hanesan Kristus.