Naha folin todan mak ema rai iha sasanan rai laran
4
Tan Na'i Maromak natudu dodan baa ami nunia, ami hala'ok Niakaan serwisu. Ami la neon mamar, mais ami haterus aan bei-beik. 2 Hori uluk ami hakotu ti'an atu dudu sees lia aat sia. Ami la halo lia funin mak moe lalek. Ami la tolek. Ami la dale bosok Maromak Manfatin, mais ami hanorin halo loos. Hodi nunia, ema hotu-hotu bele leno du'uk amikaan dale iha Na'i Maromak oin, hotu nakotu du'uk, ami ne'e, ema raiklaran oin nu'u saa. 3 Mais ema mak la no'uk natene Lia Di'ak mak ami hanorin nia, sia atu dodok tan kona kastikar mak sasa fa'e sia nosi Na'i Maromak.4 Oras ne'e, ema wa'in naloon baa diabu ulun. Nia nalo balu kakutak naktomak, to'o neon naktomak no la fiar baa Na'i Maromak. Tan siakaan matan delek nunia, sia la bele naree Na'i Maromak Niakaan sinak. Sia la simu Lia Di'ak nosi Kristus mak mai naroma sia. Masik Kristus ilas ida no Na'i Maromak, sia la titu. 5 Ami la dale aan du'uk, mais ami dale wa'in hosi lia Yesus Kristus, itakaan Na'in. Kalo ami dale aan du'uk, ami dale loos lia ne'e: ami ne'e dadi emikaan ain-liman, tan Yesus mak nakara. 6 Uluk aan, Na'i Maromak dale na'ak, “Musti noo kroman mak naksinak iha fatin makukun.” Hotu, Nia nase'i Niakaan kroman atu naksinak iha itakaan neon laran, tan nakara foo Niakaan kroman baa ita. Lia nia isin na'ak, baa oras ita hanoin lia hosi Kristus, ita moos hanoin Na'i Maromak beran no ahar maksinak.a
7 Ita ne'e, ema raiklaran da-dauk dei. Masik nunia moos, Na'i Maromak bali Niakaan ahar maksinak kabaas nia iha itakaan neon laran ti'an. Lia nia hanesan ema ida rai niakaan sasoin mak noo folin iha sasanan rai laran. Malorek ti'an, ahar maksinak maka'as iha itakaan neon, la mai nosi ita, mais mai nosi Na'i Maromak. 8 Dadi, masik ema tonan no nasusar ita karuk-kwana moos, ita haterus aan bei-beik. Masik ita la hatene atu halo saa moos, ita la neon mamar. 9 Masik ema naloot no namukit ita moos, Na'i Maromak la la'o nela ita. Masik ema ta'e ita moos, ita la dodok. 10 Dala wa'in ami kona tonan kre'is mate, hanesan Yesus moos kona tonan oras Nia mate. Mais hodi nunia, ema iha fatin hotu-hotu bele naree malorek beran nosi Yesus Niakaan moris iha amikaan moris. 11 Nunia tebes! Ami hetan tonan kre'is mate, tan dadi baa Yesus eman. Mais hodi nunia, ema hotu-hotu bele naree Yesus moris iha amikaan moris mak bele mate ne'e. 12 Mais nune'e. Masik ami mate moos, ami la hata'uk dale hosi Kristus. Ami hadi'a aan mate, nebee emi bele hetan moris.
13 Hakerek Moon na'ak, “Tan Ha'u kfiar baa Na'i Maromak, etuk ha'u kdale.” Amikaan hanoin moos manesak. Ami fiar baa Na'i Maromak, etuk ami musti katak Nia baa ema.b 14 Ami hatene ha'ak, Na'i Maromak mak nalo itakaan Na'in Yesus, moris nikar. Nosi ikus, Nia atu nalo ita moris hikar bele, tan ita soman malu ho Yesus. Hotu ita hariik iha Maromak oin, tan Nia simu ita. 15 Nia nalo lia ne'e sia, bodik emi. Sura loron Nia beer natudu laran di'ak hetak wa'in baa ema. Hodi nunia, ema sera dodan hetak wa'in baa Nia nodi katak lia nosi Niakaan ahar maksinak kabaas.
Ita fiar nohuun baa Na'i Maromak
16 Tan lia nia, ita la neon mamar, mais haterus aan bei-beik. Masik itakaan isin lolon dodok, sura loron Na'i Maromak nakbiit itakaan neon. 17 Tuir ita haneo, baa oras ne'e ita kona susar oi-oik. Mais ita musti hanoin, tan loron ikus Na'i Maromak atu foti-nahaas ita. Tan lia nia, ita hafolin saa mak dadi baa oras ne'e, la saa ida! 18 Ita musti haneo baa lia mak la naksain. Tan lia mak naksain, la oras dei. Mais lia mak la naksain, nafati nima-nimak.