Lia hahaak mak ema sera baa ai'oi lulik
(Hanoin Hikar Dalan Moris 4:35,39; 6:4)
8
Oras ne'e, ha'u kdale kosi lia na'an mak ema nodi lo'u-sudur baa ai'oi lulik. Emi hatene wa'in ti'an hosi lia ne'e. Mais lia nune'e: kalo ita hatene wa'in, ita maus loko aan, tan ita hanoin ha'ak, ita matenek liu ema seluk sia. Di'ak liu, ita hadomi ema seluk. Tan lia nia mak nakbiit ema to'o bele naterus aan.2 Kalo ema ida na'ak nia matenek ti'an, ne'e na'ak, niakaan matenek nia sei la to'o dauk. 3 Mais kalo ema ida nadomi Na'i Maromak, Na'i Maromak nanis nadomi nia. Lia nia mak noo folin.
4 Lia na'an mak ema sera baa ai'oi lulik nune'e. Ita hotu-hotu hatene ai'oi lulik mak ema lo'u-sudur baa, lahoos Maromak. Noo hakerek na'ak, “Maromak, mesak ida dei.” No “ai'oi lulik mak ema lo'u-sudur baa, la noo folin kois.” 5 Noo buat wa'in iha lale'an no raiklaran mak ema lo'u-sudur baa nodi temi na'ak, siakaan ‘lulik’ no siakaan ‘na'i’.
6 Mais bodik ita, Maromak mesak dei.
Nia, itakaan Ama.
Lia hotu-hotu nahabut baa Nia.
Ita halo hotu-hotu bodik Nia.
Itakaan Na'in moos, mesak dei.
Ne'e mak, Yesus Kristus.
Na'i Maromak nodi Nia
atu nase'i hotu-hotu.
Ita moris,
tan Nia mak foo moris baa ita.
7 Tebes! Mais ema balu la natene lia nia sia. Uluk, oras sia sei la fiar baa Kristus dauk, sia lo'u-sudur baa ai'oi lulik. Oras ne'e, kalo sia naa na'an lulik, sia naneo na'ak “Hahaak ne'e, dadi baa sera atu lo'u-sudur baa ai'oi lulik. Kalo ha'u kaa, ha'u ksei talin aan ko lia aat nia!” Lia nia natodan siakaan kakutak to'o sia noran la fatan, tan neon la biit. 8 Tuir loos, sia lalika nunia, tan hahaak la bele nodi ita kre'is baa Na'i Maromak. Hahaak moos la bele fa'e ita nosi Nia. Kalo ita haa, ita la sotir. Kalo ita la haa, ita moos la lakon.
9 Sintidu! Masik ita du'uk hatene ha'ak, ita bele halo lia ida, ita lalika halo kalo itakaan maluk sarani ida neon la biit. Keta to'o nia moos nalo tuir, hotu sidi ain tan noran lia nia la fatan bodik nia. 10 Knaninuk nune'e: o matene ti'an ma'ak, maa na'an lulik, la saa ida. Mais arumak o baa maa iha ai'oi lulik fatin. Hotu, maluk sarani ida naree o tuur maa iha nia. Maluk nia dadi neon ruak, tan sei la natene dauk lia nia fatan ka, lale. Mais tan o malo, nia moos nalo tuir. 11 O matene lia wa'in tebes. Mais kalo o malo nunia, o mahaat okaan maluk sarani mak neon la biit. Manoin, tan Kristus moos mate bodik nia! 12 Di'ak liu nune'e: kalo o malo okaan maluk nalo lia mak nia noran sala, o malo sala baa nia ti'an. O moos malo sala baa Kristus. 13 Tan lia nia, kalo ha'u kaa hahaan mak nalo ha'ukaan maluk sarani monu baa sala, di'ak liu ha'u la kaa. Masik to'o wainhira moos, ha'u la kaa. Tan ha'u la ko'uk ha'ukaan maluk monu baa sala.