Paulus nia, Kristus klosan tebes
9
Arumak emi ha'ak, ha'u la koo beran kakerek nune'e. Keta nunia, tan Yesus Kristus du'uk mak boi ha'u dadi baa klosan. Ha'u karee du'uk itakaan Na'in nia. Ha'u kre'is baa Nia ti'an. Emi hotu-hotu moos fiar baa Nia, tan ha'ukaan serwisu. 2 Masik ema seluk na'ak, ha'u lahoos Kristus klosan moos, emi hatene du'uk ha'ak, Nia mak solok ha'u baa emi. Kalo emi sei buka lia kakaer tenik, haree baa emikaan tuur-hariik du'uk. Emi kre'is baa itakaan Na'in ti'an. Dadi malorek ona, ha'u ne'e, Niakaan klosan tebes.3 Bodik ema mak la simu ha'u hanesan Kristus klosan, ha'u atu kataa sia nune'e: 4 Arumak emi haneo ha'ak, ha'u ko Barnabas la bele simu haa-hemu hosi ema mak ami hanorin ka? 5 Arumak emi hanoin ha'ak, ami la bele hola feto hosi feto sarani sia, nebee tuir haliku bele-bele ho sia ka? Tuir loos, Na'i Yesus klosan seluk sia baa naliku bele-bele no siakaan feen. Petrus no Na'i Yesus alin sia moos nunia.a 6 Arumak emi haneo ha'ak, ha'u ko Barnabas dei mak la bele buka moris hosi ema mak ami hanorin ka? 7 Keta haneo nunia. Mana dei baa sondadu sia. Sia bele simu hahaak no tais nosi ulun. Mana dei baa ema makserwisu iha to'os anggor sia. Sia bele naa nosi to'os isin. Mana dei baa makbalin sia. Sia bele nola susu ween nosi bibi malae mak sia naliku.
8 Ha'u kdale nunia, lahoos tuir ema raiklaran hanoin. Na'i Maromak Ukun-badu du'uk mak katak nunia. 9 Iha Ukun-badu mak Nia natuun baa bei Musa, noo hakerek na'ak, “Karau baka mak serwisu sama hare, keta futu hatoos nunun nebee nia bele naa.” Arumak emi haneo ha'ak, Na'i Maromak nakara karau baka loos dei mak bele naa ka?b 10-11 Lale! Nia moos katak na'ak Nia rai matan baa ami! Noo hakerek na'ak, “Oras ema makfila rai no maksama hare serwisu, sia natene kedan sia atu simu fafa'ek.” Dadi, la sala, kalo ema mak naliku hutun sarani moos simu fafa'ek nosi siakaan serwisu. Baa oras ami hanorin emi lia nosi Maromak Kmalar, lia nia hanesan ema mahalo to'os ida kuda fini. Hanorin hotu, fatan basuk kalo ami simu saseban hosi emi!c 12 Ema seluk mak nanorin emi, sia bele simu saseban nosi emi. Kalo ema seluk sia bele simu saseban nunia, ami hoo beran liu tan sia!
Mais emi hatene lia ne'e ti'an. Ami la dala ida dauk hodi beran nia haseten emi. Ami hetu aan baa lia oi-oik, nebee keta hatodan emi. Hodi nunia, emi hakara hanono baa Kristus Niakaan Lia Di'ak mak ami hanorin baa emi. 13 Hanoin kokon! Na'ilulik mak naliku ema Yahudi iha siakaan Uma Hamulak Huun, sia moris nosi sera mak ema nodi. Ema mak naliku osan sera fatin, sia naa na'an sera nia.d 14 Nunia moos, Na'i Maromak naruka na'ak, ema mak serwisu nodi nanorin Kristus Niakaan Lia Di'ak, sia moris nosi serwisu nia folin.e
15 Tebes. Ha'u kbele kalo nunia, mais la kakara. Lahoos ha'u kalo hakerek ne'e, nebee emi atu foo saseban baa ha'u. Lale. Ha'u kaliku emi kleur ti'an kodi la kusu saa ida. Di'ak liu ha'u kmate nosi ema dale ha'u na'ak, ha'u ema madiduk. 16 Masik ha'u kanorin nohuun Kristus Niakaan Lia Di'ak moos, ha'u la kbele loko aan. Ha'u kmusti kanorin kosi Kristus, tan Nia mak solok ha'u. Kalo la kalo tuir, ha'u ksusar ona! Nanis ha'u kona kastikar. 17 Kalo ha'u kala'ok serwisu ne'e, tan ha'ukaan beer du'uk, ha'u kfatan simu kansera. Mais ha'u kala'ok serwisu ne'e, tan Kristus mak solok ha'u. Ha'u kmusti serwisu tan Nia fiar na'ak ha'u kbele kala'ok serwisu mak folin todan ne'e. 18 Kalo nunia, ha'u ksimu saa? Ha'u la kbuka kansera, mais kanorin Kristus Niakaan Lia Di'ak kodi la kusu sa-saa. Serwisu nia nalo ha'u neon di'ak, to'o koran hanesan simu ti'an kansera. Dadi, masik ha'u koo beran hanesan ema seluk mak serwisu nanorin Lia Di'ak, ha'u du'uk la ko'uk tau ha'ukaan beran hotu-hotu.
19 Ha'u ne'e, lahoos ema atan. Masik nunia moos, ha'u kalo aan nu'u ata, nebee ema hotu-hotu bele naruka ha'u. Kodi nunia, ha'u hetak kbele tulun ema wa'in nebee tuir Kristus. 20 Oras ha'u kodi Lia Di'ak baa ema Yahudi, ha'u kalo aan nu'u ema Yahudi nebee ha'u kbele kodi sia kre'is baa Kristus. Oras ha'u kodi Lia Di'ak baa ema mak kaer metin Na'i Maromak Ukun-badu, ha'u kala'ok Ukun-badu nia sia, nebee ha'u kbele kodi sia kre'is baa Kristus. (Ha'u kalo nunia, masik katene ka'ak, kalo ita tuir Ukun-badu, lia nia la nalo ita di'a-di'ak ho Na'i Maromak.) 21 Oras ha'u kodi Lia Di'ak baa ema mak la natene Na'i Maromak Ukun-badu, ha'u kdadi nu'u sia, nebee kala'o kodi sia baa Kristus. (Keta to'o ema dale na'ak, ha'u ksoe kela Na'i Maromak Ukun-badu mak Nia natuun baa Bei Musa, tan ktuir Kristus Ukun-badu.)f 22 Oras ha'u kodi Lia Di'ak baa ema mak neon la biit, ha'u kalo aan neon la biit, nebee ha'u kbele tulun sia mai baa Kristus. Bodik ema hotu-hotu, ha'u kalo aan nu'u sia, nebee nunabee moos, ha'u kbele sori kola balu. 23 Ha'u kalo nunia, nebee ema hotu-hotu bele fiar baa Kristus Niakaan Lia Di'ak. Hodi nunia, ha'u moos bele simu matak-malirin mak Nia nakara foo baa Niakaan ema.
24 Ha'u kfoo lia hatetek hosi halai sita malu. Ema wa'in tuir nalai sita, mais ema na'in ida dei mak netan nola. Nunia moos, o musti marui aan tuir Na'i Maromak beer, to'o metan mola. 25 Ema mak tuir sita malu musti rona baa manorik nodi tuir niakaan ukun. Sia narui aan maka'as nebee netan sabeo sita malu, masik sabeo nia, la oras naklaik mohu. Mais ita harui aan atu hetan lia mak nafati nima-nimak. 26 Oras kalai, ha'u la kalai karin, mais karui aan maka'as kalai katutuk kladik baa. Kalo hanesa ha'u ko ema maktukuk, ha'u la ktuku karin, mais tuku fukur. 27 Ha'u ktuir ukun kodi karui aan maka'as, nebee bele katerus aan. Keta to'o ha'u katak Na'i Maromak baa ema seluk, mais ha'u du'uk kakur ukun, hotu Na'i Maromak nasai ha'u.