2 Lia nune'e maluk sia: Tan ema maus kona sokur baa lia ne'e, di'ak liu mane noo feen du'uk. Feto moos noo la'en du'uk. Hodi nunia, sia la monu baa sala.

3 Mane mak noo feen sia, keta dudu emikaan feen no la toba ho nia. Feto mak noo la'en siam keta dudu emikaan la'en no la toba ho nia. 4 Kalo feen-la'en nola malu ti'an, ne'e na'ak feen latan ti'an isin lolon bodik la'en. La'en moos latan ti'an isin lolon bodik feen. 5 Dadi, keta dudu malu. Kalo hakara hamulak nebee hamulak tebe-tebes, feen-la'en bele hola lia hamutuk atu fa'e heik malu lai. Kalo hamulak nia hotu ti'an, hamutuk hikar lai-lais nebee keta monu baa sala, tan diabu ulun buka leet atu sokur ema mak la netu aan. 6 Lia ne'e, ha'u kasara loos dei. Lahoos Na'i Maromak ukun. 7 Tuir ha'u, di'ak liu ema la nola malu, nu'u ha'u ne'e. Mais Na'i Maromak fa'e babelen mak fatan baa ema ida-idak. Nia foo ema balu bele noo feen-la'en, balu lale.

8 Oras ne'e, ha'u atu katak baa ema klalon sia no feto faluk sia, lia nune'e: Di'ak liu emi la hoo feen-la'en, nu'u ha'u ne'e. 9 Mais kalo emi la bele hetu aan, di'ak liu hoo feen-la'en dei. Tan kalo lale, emikaan nawan aat du'uk bele nahaat nikar emi.

10 Oras ne'e, ha'u atu katak lia soe malu. Itakaan Na'in du'uk naruka ti'an na'ak, feen la bele soe la'en. 11 Mais kalo feen la'o nela la'en, feen la bele nala'e seluk mane. Di'ak liu, fila nikar atu dame malu no la'en. Nunia moos la'en, la bele soe feen.^a

12 Oras ne'e, ha'u atu katak baa ema seluk sia. Lia ne'e nosi ha'u du'uk, lahoos nosi itakaan Na'in. Lia nune'e: kalo mane ida fiar baa Na'i Maromak, mais feen la fiar, mane nia la bele soe feen, kalo feen sei nakara moris namutuk no nia. 13 Nunia moos, kalo feto ida fiar baa Na'i Maromak, mais la'en la fiar. Feto nia la bele soe la'en kalo la'en sei nakara moris namutuk no nia. 14 Hodi nunia, la'en mak la fiar baa Na'i Maromak bele dadi moos, tan talin malu no feen mak fiar. Feen mak la fiar, bele dadi moos, tan talin malu no la'en mak fiar. Hotu, siakaan oan sia moos dadi moos iha Na'i Maromak oin. Kalo lale, oan sia la dadi moos. 15 Mais kalo mane mak la fiar la'o nela feen mak fiar, habusik baa. Kalo feto mak la fiar la'o nela la'en mak fiar, habusik baa. Na'i Maromak bolu ita atu dadi Niakaan ema mak moris manek no dame. Ita lalika talin aan ho ema mak la fiar sia. 16 Feto mak fiar baa Na'i Maromak sia, arumak emi bele sori hola la'en. Mane mak fiar sia, arumak emi bele sori hola feen. Arumak bele, arumak la bele. Emi moos la hatene.

17 Uluk, baa oras Na'i Maromak bolu nola emi dadi baa Kristus eman, emi ida-idak ho tuur-hariik du'uk. Oras ne'e, ida-idak musti tuir Kristus dalan moris hodi emikaan tuur-hariik uluk nia, tan Na'i Maromak mak babilan kedan moris nunia. Hanorin ne'e, ha'u kanorin baa hutun sarani sia iha fatin hotu-hotu.

18 Ha'u kfoo knaninuk nune'e: noo ema Yahudi mak uluk namane aan tuir siakaan adat, foin rona Na'i Maromak bolu atu dadi baa Kristus eman. Ema nunia, lalika heli adat hamane aan nia. Nunia moos, ema lahoos Yahudi mak uluk la namane aan, foin rona Na'i Maromak bolu sia. Sia lalika namane aan ona. 19 Ita hamane aan ka, la hamane aan ka, lia nia la noo folin. Lia mak noo folin mak ne'e: ita halo tuir Na'i Maromak ukun. 20 Oras Na'i Maromak bolu o, Nia la naruka tenik sa-saa nosi lia hamane aan. Dadi, emi ida-idak hafati baa emikaan tuur-hariik uluk.

21 Ha'u kfoo knaninuk ida tenik. Uluk, baa oras Na'i Maromak bolu o, kalo o dadi ata baa ema ida, mafati nunia dei. La saa ida. Kalo bele sai mosi ata, sai ona! Mais kalo la bele, la saa ida. 22 Kalo Na'i Maromak bolu nola ata ida, Kristus dadi Na'in bodik ata nia. Kalo Na'i Maromak bolu nola ema boot ida, ema boot nia dadi baa Kristus atan. 23 Kristus selu kotu emi nodi folin mak boot basuk! Dadi hana'i baa Kristus dei. Keta hana'i baa ema.

24 Mamaluk sia! Uluk, baa oras Na'i Maromak bolu nola ita, ita ida-idak ho itakaan tuur-hariik du'uk. Oras ne'e, ita musti tuir Na'i Maromak hodi hafati baa itakaan tuur-hariik uluk nia.

25 Emi moos husu baa ha'u hosi lia ema mak sei klalon. Na'i Maromak la katak ha'u nosi lia ne'e. Mais emi bele fiar saa mak ha'u kdale, tan Na'i Maromak natudu dodan baa ha'u ti'an. Ha'u kanoin nune'e: 26 Oras ne'e ita hasoru susar oi-oik. Dadi, kalo ema moris nunabee ti'an, moris nunia ona. Nune'e: 27 Kalo hoo feen ti'an, keta soe nia. Kalo la hoo feen dauk, keta buka ona. 28 Mais kalo hoo feen, la sala. Nunia moos feto nurak sia. Kalo hoo la'en, la sala. Mais hanoin! Ema mak nola malu, nanis nasoru maufinu oi-oik iha raiklaran ne'e. Ha'u kfoo katene baa emi ka'ak, kalo emi la hola malu, emi la hasoru maufinu nia sia.

29 Ha'u kanoin nune'e mamaluk sia! Oras rai falu fila kre'is mai ona. Dadi, ema mak noo feen, keta tau neon baa feen dei, mais nia musti rai neon baa Na'i Maromak no. 30 Nunia moos, ema mak tanis tan susar. Di'ak liu nakbiit aan nanawa tanis nodi nalu'a susar nia, nebee nia bele rai neon baa Na'i Maromak. Ema mak neon boot, di'ak liu nalu'a neon boot nia, nebee nia bele rai neon baa Na'i Maromak. Ema mak bele sosa wa'in, di'ak liu moris nu'u ema mak la noo sa-saa, nebee nia bele rai neon baa Na'i Maromak. 31 Ema mak buka sasoin raiklaran, di'ak liu moris nu'u ema mak la rai neon baa sasoin raiklaran, nebee nia bele rai neon baa Na'i Maromak. Tan la kleur ona, moris raiklaran ne'e atu lakon mohu.

32 Ha'u kakara nebee emi lalika halau aan hodi neo-neon. Ema mak la noo feen, noo leet wa'in atu rai neon baa Na'i Maromak beer. Nia bele buka dalan atu serwisu bodik nalo Na'i Maromak neon di'ak. 33-34 Mais ema mak noo feen, musti rai neon baa raiklaran beer. Masik nakara rai neon baa Na'i Maromak beer moos, nia moos musti buka dalan atu nalo feen neon di'ak. Tan lia nia, ema mak noo feen, niakaan neon nakfa'ek rua.

Nunia moos, feto faluk, no feto mak sei la noo la'en dauk. Sia bele rai neon baa Na'i Maromak beer, nebee neon no isin lolon dadi moos. Mais feto mak noo la'en, niakaan neon nakfa'ek rua. Masik nakara rai neon baa Na'i Maromak beer moos, nia moos musti buka dalan atu nalo la'en neon di'ak. 35 Ha'u katak lia ne'e sia baa emi, nebee emi bele hetan sotir. Lahoos atu kodi katodan emi. Kakara nebee emi halo mak loos hodi rai neon baa Na'i Maromak beer, nebee emikaan neon la nakfa'ek aan.

36 Kalo mane ida noo sasudin mak otas to'o ti'an, habusik sia nola malu ona. Saa tenik, kalo mane nia la bele netu aan. Hodi nunia, sia la nalo sala. Keta hein le'u-le'ur, to'o mane nia nalo lia mak la loos. 37 Mais kalo nia bele netu aan, nia lalika lai-lais noo feen. Surak nia du'uk mak nakotu nunia. Masik netu aan kleur moos, di'ak. 38 Mane mak nola feto, nia nalo di'ak. Mais mane mak la nola feto moos, nia nalo di'ak liu tenik.

39 Feto feen talin malu no la'en to'o mate. Mais kalo la'en mate ti'an, nia bele nala'e seluk mane, surak la'en foun nia moos fiar baa Kristus. 40 Tuir ha'u, feto faluk nia hetak sotir kalo nia la noo la'en tenik. Ha'u koran ka'ak, lia tate'an ne'e mai nosi Na'i Maromak Kmalar mak moris iha ha'ukaan neon.