Tan Paulus Kristus klosan, Kristus mak tetu niakaan serwisu
4
Dadi, emi musti halo baa ami nune'e: keta mose ami, tan ami ne'e, Kristus ain-liman dei. Na'i Maromak fiar ami atu daka di'a-di'ak Niakaan lia mak uluk sei lia subar. 2 Ema mak serwisu bodik na'in, musti serwisu tuir na'in hakaran, 3 tan na'in mak tetu niakaan serwisu, lahoos ema seluk. Dadi, kalo emi hakara tetu ha'ukaan serwisu, ne'e loos emi. Nunia moos kalo ema seluk nakara tetu ha'ukaan serwisu, ha'u la ktitu. Ha'u la ktetu ha'ukaan serwisu du'uk. 4 Masik ha'u du'uk koran ha'u kserwisu loos ti'an, sei la nanis dauk nunia. Tan Na'i Yesus Kristus du'uk mak tetu ha'ukaan serwisu. 5 Tan lia nia, emi keta halo aan nu'u ema makotu lia atu tetu ema lian. Hein to'o itakaan Na'in namaan aan mai nikar lai, foin Nia keke nalore lia hotu-hotu. Nia atu nalore lia aat oi-oik mak ema subar iha makukun. Nia moos nalore lia hotu-hotu mak ema naneo iha neon laran. Foin, Na'i Maromak mose ema mak nalo lia di'ak sia.6 Mamaluk sia! Ha'ukaan dalen ne'e, kona baa ha'u ko mau Apolos. Ha'u kfoo knaninuk kosi ami rua kodi kanorin emi nosi lia ida nune'e: Halo tuir lia mak hakerek iha Hakerek Moon laran dei. Keta tuir seluk. Kalo emi halo nunia, emi la boi oin hodi hasa'ek ida no haraik ida, tan ami rua manesak. 7 Nunabee? Emi hafolin aan liu ema makfiar seluk sia ka? Keta! Hotu-hotu mak emi simu, emi hetan hosi Na'i Maromak. Dadi tan saa emi loko aan nu'u emi du'uk mak harui aan hola? 8 Emi halo aan nu'u lia hotu-hotu mak emi hetan nia, emi mak buka du'uk. Nu'u la noo saa ida mak Na'i Maromak foo baa emi. Nu'u emi hoo folin boot ti'an hanesan na'i boot iha Na'i Maromak oin, mais ami Kristus klosan folin lalek. Mais arumak emi dadi na'i tebes, ami bele kaer ukun bele-bele ho emi ka?
9 Isin ida-idak ha'u koran ahan Na'i Maromak nalo ami mak Kristus klosan hanesan ema folin lalek. Ami nu'u ema bui mak nein simu ukun mate. Ema hotu-hotu iha raiklaran ne'e, no Na'i Maromak Niakaan makbukar lale'an sia moos, nobun nodi nale'uk ami. 10 Mais, emi lale. Emi maka'as liu ami! Emi halo aan matenek lia Kristus ti'an. Mais ema naraik ami na'ak, momok basuk, tan ami serwisu bodik Kristus. Sia nafoli emi biit basuk, mais ami, lale. Sia foti-nahaas emi, mais la nakneter ami kois. Nunia tebes! 11 To'o oras ne'e moos, ami horan salaen no hanroo. Amikaan tais moos, aat hotu. Ema ta'e nakdiuk ami. Ami dadi ema tablaun mak la noo uma. 12 Ami serwisu kole ti'an hodi liman du'uk. Kalo ema dale ami oi-oik, ami hataa loos ha'ak, “Ami haloon nebee Na'i Maromak nalo lia di'ak sia bodik emi.” Kalo ema nasusar ami, ami boi haterus aan dei.a 13 Kalo ema dale nahaat amikaan naran, ami boi hataa hodi dale kabaas dei. Masik nunia moos, ema sei nalo ami nu'u krehut.b
14 Ha'u kakerek lia ne'e sia, lahoos atu kodi kamoe emi. Mais atu kanorin emi, tan kadomi emi hanesan ha'ukaan oan du'uk. Etuk, ha'u katak baa emi, nebee emi fila hikar mai dalan loos. 15 Masik ema rihun-rihun bele nanorin dalan Kristus baa emi moos, ha'u kmesan mak emikaan ama, tan ha'u ne'e, ema uluk fohon mak nanorin Kristus Niakaan Lia Di'ak baa emi, to'o emi fiar baa Nia. 16 Tan lia nia, ha'u kusu nebee emi tuir di'a-di'ak ha'ukaan knaninuk.c
17 Tan ha'u kakara nunia, ha'u ksolok ti'an Timotius baa emi. Ha'u kdodan nia hanesan ha'ukaan oan du'uk. Ha'u kfiar nia, tan nia talin aan no itakaan Na'in. Nia bele tulun emi nodi nalore ha'ukaan moris dalan mak talin malu no Yesus Kristus. Lia ne'e mak ha'u kanorin baa hutun sarani sia iha fatin hotu-hotu.
18 Emi balu loko aan tan haneo ha'ak, ha'u la kaksakar aan kmai tenik kota Korintus. 19 Mais kalo itakaan Na'in nakara, la kleur ona ha'u kmai. Foin ha'u katene sia atu nalo saa. Sia ibun boot loos dei ka, sia noo beran tebes. 20 Na'i Maromak, Na'i mak noo beran. Niakaan renu keta ibun boot dei, mais musti natudu Na'i Maromak beran iha siakaan moris. 21 Nunabee? Ha'u kmai, ha'u kdale maka'as kodi ktonan emi ka? Ha'u kmai, katudu dodan no laran di'ak baa emi?