Ema sarani keta toe malu
3
Mamaluk sia! Oras ha'u ksei kamutuk ko emi, emi hanesan ema mak sei la kre'is dauk baa Maromak Kmalar. Emi sei moris tuir raiklaran beer. Ha'u la kbele kanorin emi hanesan kanorin ema matas, tan emi sei nu'u lawarik oan. 2 Ha'u kanorin lia kmaan dei baa emi, tan emi sei la bele simu lia todan dauk, nu'u lawarik mak sei la bele naa na'an dauk. Tuir loos, emi musti biit ti'an, nu'u ema matas mak naa na'an ona. Mais emi nu'u kau mea oan mak sei nemu susu.a 3 Emi sei moris tuir emikaan hakara du'uk. Kalo ema liu emi, emi hirus hodi toe oi-oik! Malolok ti'an emi ne'e, ema mak tuir raiklaran beer. 4 Emi balu ha'ak, “Ha'u ne'e, Paulus eman.” Balu tenik na'ak, “Ha'u ne'e, Apolos eman.” Sura emi dale nunia, emi hatudu du'uk ha'ak, emi tuir tebes raiklaran beer.bEmi ahan Na'i Maromak Niakaan to'os
5 Tuir loos, Apolos nia see? Ha'u, Paulus ne'e moos see? Ami rua dadi ema ain-liman loos dei. Ami mak hatudu dalan nebee emi bele fiar baa Kristus. Apolos nala'o serwisu tuir Na'in ukun. Ha'u moos nunia! 6 Ha'u mak katak uluk lia Kristus baa emi, nu'u kuda fini. Hotu Apolos mai nanorin emi, nu'u tolo fini nia. Mais Na'i Maromak mak nalo fini nia tubu to'o boot.c
7 Ema mak kuda fini no ema mak tolo fini, la noo folin. Ida mesan mak noo folin. Ne'e mak, Na'i Maromak. Tan Nia mak nalo fini tubu no moris to'o boot. 8 Ema mak kuda no ema mak tolo, sia rua serwisu bele-bele. Nanis Na'in atu selu baa ema hotu-hotu mak nala'o Niakaan serwisu. 9 Ami rua, mak Na'i Maromak eman serwisu. Emi, mak Niakaan to'os.
Emi ahan uma mak Na'i Maromak nariik
9 Emi moos hanesan uma ida mak Na'i Maromak foin nariik nola. 10 Nia natudu laran di'ak baa ha'u, nalo ha'u dadi nu'u badaen ulun. Nia moos tulun ha'u, nebee kanorin uluk lia tatuur baa emi, hanesan kariik uma tatuur. Hotu, ema seluk mai nanorin tu'an baa emi, hanesan nariik uma baa tatuur nia leten. Badaen ida-idak musti serwisu di'a-di'ak atu nariik tuir loos. 11 Lia tatuur ne'e, mak Yesus Kristus. Na'i Maromak rai ti'an lia tatuur ne'e baa emikaan neon. Tan lia nia, ema seluk la bele rai tatuur seluk baa emikaan neon.
12 Badaen sia nariik uma baa uma tatuur leten nodi uma ruin oi-oik. Balu nodi uma ruin mak noo folin, nu'u mean, mutin, no fatuk maksinak. Balu tenik nodi uma ruin folin lalek, nu'u ai, au no bebak. 13 Mais nosi ikus, badaen ida-idak niakaan serwisu isin atu naksain to'o ema hotu-hotu bele natene niakaan serwisu nia, di'ak ka, lale. Baa oras nia, Na'i Maromak atu sukat badaen ida-idak niakaan serwisu, nu'u nodi ha'i sunu, atu natene serwisu nia sei nafati ka, lale. 14 Kalo Na'i Maromak sukat nodi ha'i, hotu uma ruin sei nafati, Na'i Maromak atu foo saseban baa badaen nia iha lale'an. 15 Mais kalo uma ruin namotuk mohu, Na'i Maromak la foo saseban baa badaen nia. Badaen nia sei netan moris, mais la simu saseban sa-saa. Sia nu'u ema ida mak ha'i naa uman, to'o sasoin hotu-hotu namotuk mohu. Nia kre'is mate, foin nalai sai.
Emi ahan uma hamulak
16 Emi moos hanesan uma hamulak bodik Maromak, tan Niakaan Kmalar nabesi aan iha emikaan leet. Emi hatene tebes ka?d 17 Kalo ema ida nahaat Na'i Maromak uman nia, sintidu! Keta to'o ikus, Na'i Maromak moos nahaat ema nia! Na'i Maromak Niakaan hein fatik musti moos. Tan lia nia, emi musti moris moos, tan emi dadi baa Niakaan hein fatin.
18 Keta be'ur aan! Kalo ema ida nafolin aan na'ak nia matenek to'o natene lia hotu-hotu tuir matenek raiklaran oras ne'e, ne'e na'ak, ema nia la natene kois saa ida. Mais kalo ema ida noran la natene kois sa-saa, foin bele dadi matenek. 19 Na'i Maromak nafoli ema raiklaran siakaan matenek na'ak, momok dei. Hakerek Moon na'ak:
“Noo ema mak nafolin aan matenek,
mais Na'i Maromak nodi siakaan kakutak dois du'uk,
atu kesi nahaat fila sia!”e
20 Hakerek tenik na'ak,
“Itakaan Na'in natene nola
saa mak ema matenek nanoin.
Nia natene na'ak, siakaan hanoin nia, butan dei.”f
21-22 Na'i Maromak foti ema sia atu naliku emi. Dadi keta tonun ida ha'ak, nia maka'as liu. Tan Na'i Maromak latan hotu-hotu baa emi. Ha'u, mau Apolos, no mau Petrus,g Na'i Maromak latan ami baa emi. Nia moos foo lia hotu-hotu iha raiklaran atu tulun emi, masik emi moris ka, emi mate ka. Nia latan hotu-hotu mak iha baa oras ne'e no hotu-hotu mak iha baa ikus atu dadi baa emikaan. 23 Emi du'uk, Kristus Niakaan. No Kristus, Na'i Maromak Niakaan.